Tuna kan ram leh hnam dinhmun hi a ṭha lo hle a. Hetianga kan kal zel chuan kan hnam ral hun hi a hla vak tawh lo vang tih ngaihdan nei hi kan awm nual tawh a ni. Hetiang dinhmuna kan din chhan hi Politics, Sawrkar, Kohhran leh Tlawmngai Pawlte-a kan hruaituten an tih tur an tih tâwk loh vang leh an tih loh tur an tih fo ṭhin vang a ni a, a mawhphurtu ber an ni. Mipuite pawh hetiang hruaitute thlangtu leh an kalphung ṭha tihpui zeltu kan nih avangin kan dik loh leh ṭhat lohna chhanah hian kan telve tho a ni.
Chuvang chuan Insiamṭhatna kawng awm chhun chu ṭhangtharte zinga mi hmantlâk chher chhuah a ni. Chutiang tih nan chuan Michael Lalmanzuala Foundation(MLF) chu ‘charitable society’-a din fel a ni ta a. A thiltum chu hetiang hi a ni.
1. Zirlai naupang, thiamthei leh tumruh, chhungkaw retheih harsat vanga zirzawm thei lo, Class XI aṭanga Graduation thlenga puih.
2. Zirlai naupang ṭanpui tur chu nungchang ṭha a ni tur a ni a; ram leh hnam siamṭhat nana ngaihtuahna hmang mi a ni tur a ni.
3. Zirlai naupang ṭanpui tur chu an chhungkaw dinhmun leh sum leh pai dinhmun ngun taka zirchian a ni ang.
4. Zirlai naupang MLF Fund aṭanga ṭanpuina pệk chuan MLF-ina kaihhruaina a siam ṭha takin a zawm tur a ni a. Kaihhruaina dan a zawm ṭhat loh chuan MLF Governing Body-in ṭanpuina a titawp thei ang.
5. Graduate chin, lehkha thiam thei tak, merit scholarship hmu, zir zawm nana sum lama harsatna nei chu, zir zawmna hmun panna tur leh admission fee, MLF Governing Body-in ṭul a tih angin ṭanpuina a pe ang.
6. Zirlai naupang ṭanpuina pệk tur chu MLF Governing Body-ina Selection Committee a ruatin uluk takin an thlang ṭhin ang. Dikna hi a pawimawh rualin dik anga lan a pawimawhzia lantir nan Selection Committee-a ṭhu turte chu MLF pawna mi rintlak an ni ang a, an hnathawhah MLF a inrawlh lo vang.
7. Kan pianpui finna hi a ṭha thei ang bera kan hman chuan kan kawng zawh ṭheuhah a vâwrtâwp kan thleng thei tih kan hria a. A hun taka ṭanpui ngai kan ṭanpui chuan Alinery Lalngilneii, Krista Roluahpuia, Lalchhuanzela Ralte angte hi tam tak kan chher chhuak thei ang tih hi kan ring tlat a ni.
Thla riat a nih aṭanga mitdel, chhungkaw khawsak harsa tak chunga taihmakna, tumruhna leh huaisenna avang liau liauva, tuna Bengaluru Christ’s College-a B.A. zirlai N.Vahneichhi, IAS nih tum bera nei a nih vanga IAS Aspirants Whatsapp group te hial lo hawng chu, phû hle-a kan hriat avangin a bul ṭan nan Rs 50,000/-(Cheng Singnga) kan pe a. Mitdelte tan bîka coaching class zawm theih phah nana a hman dawn avanga a lawmthu te pawh a rawn sawi nghe nghe a ni.
MLF-ina a tum ber chu ram leh hnam tana mi hmantlâk leh ṭangkai chher chhuah a ni a. Hetiang dan kan siam anga kan mi thlante chu ram leh hnam siamthat nana mi ṭangkai an nih ngei kan ring a. Chutiang mi a tam thei ang ber kan chher chhuah theih nan Zoram mipuite hnenah thilphal taka ‘MLF’ hnena “donation” pe turin kan ngen a. Kan pawisa neih apiang chu a hmanna tur dik taka hmang ngei turin inrintawkna kan nei a ni.
Bank Account te pawh kan hawng tawh a, kan bank account chu hetiang hi a ni:
Michael Lalmanzuala Foundation
SBI A/c No. 38835034300
Chaltlang Branch
IFSC: SBIN0018501
Michael Lalmanzuala H. Lalbiakṭhuama
President Secretary
Post a Comment