NAUPANG RUKBO LEH KHUAL THUTHANG - TIMES OF MIZORAM

Breaking

Home Top Ad

Post Top Ad

NAUPANG RUKBO LEH KHUAL THUTHANG

THUMAHRUAI:
Ka thupui hman atang hian ka sawi tum chu a chiang nghal viau mai thei e. Social Mediaa kan thu hmuh hmasak sak hi kan thawn darh a, kan zavaiin kan chiai tlang ta dial dial thin hi a ni ber mai. Sawinawn leh ta thin ila, Immanuel Thi zaman phuah dan dik lote hi a darh zing khawp a. Kum 5 vel kalta atang khana dikloh zia kan sawi nawn fo. A dikloh zawk hi a darh chak zel a. Lo tuipui e mem tawk kan nei ziah bawk.

Thuthang diklo avangin Karbi ramah tlangval pahnihin nunna an chan ringawt tawh bawk a nih kha. Social Mediaa thu thawn darh tur chin leh awih tur chin hi thliar thiam a, finfiah nawn ngei ngei kan chin a tul hle mai.

Tunlai thuthang kaihhnawih hian thil pawimawh tak tak I han sawi teh ang.


ASSAMA NAUPANG RUK BO:
“Assamah naupang ruk bo ching an awm a, chuti khati,” tih hi a darh nasa a. Kan chai luih luih a. Sawi belh tur nei, mi dang aia hre tam leh belhchhan chak kan tam nite pawh hian a lang.

Mizorama a thu rawn darh dan tak chu hetiang hi a nih kha,

“Nava min hrilh ania. Guwahati ah kidney etc vel hralh tur Target hrim hrim Gang an che nasa hle a ni awm e. Thingtlang hmun hrang hrang atangin mi 500 bawr vel an ruai a, Chung ho chu hmun hrang hrang ah an inthehdarh ta a, an Target ber chu naupang a ni a. An organ hralh duh avangin. Chuvangin fimkhur hle ang che u. Guwahati ah heng misual ho hi tlem te an man tawh a, police te pawhin an chhui mek zel a.

Naupang kha veng fimkhur hle rawh u aw.

Vai thirchhe Siam, thil zuar, cooker chhe Siam etc etc....tumah in chhungah luh tir suh u”

“Heng naupang te hi an School atang te a kidnap in an body parts te hralh atan an tih hlum hnu motor pakhat a hmuh chhuah hlauh ani. Mahni fa te theuh veng tha tura in chahna atan theh darh ani...”

Assam lama mi rintlak ka zu zawt a. A taka thil thleng a awm awm an hriat loh thuin min chhang. Rumours erawh chu a awm ngei. Police Station pahnih leh an police hotute zu biak pawhnaah pawh ka zu biak chin hi chuan chutiang report a awm loh thu leh an hriat loh thu pawh an sawi nghe nghe a ni.

Chu chu naupang rukbo hi a awm ngai lo e, tihna lam a ni lo a, tunlaia thuthang kaihhnawih kan zawh fiahna min chhanna a ni.

1.10.2019-A KA ZAWHNA DAWN:
Major Kunga, CHAN hnen atangin, “Nimin piah khan lunglei khaw chhungah naupag pa 2 ruk bo an ni a, a ru bo tu te hiii vai thir chhe zong aga in soi te an ni aa mhse lunglei an chhuah san hma inn lunglei police te cuan an man hman ani. I fimkhur tlag ag uu…tih hi thudik a ni em?” tih a ni a. Ka chhanna chu thudik lo a ni e, tih a ni.

Hetiang hian awlsam takin thu a darh a. Kan hriat pawh, kan hriat sual zawng zawng nen a darh a.


KOLASIB-A NAUPANG BO LEH ZEL DIN THU: Hei hi ni 1.10.2019-ah vek a darh leh chuaih chuaih bawk a.

BREAKING NEWS
“Kolasib ah tun mai khan Naupang kum 4 mi chu a Pa in Dawra thil a leisan lawk hlanin vaiin an rubo hman. Tunah hian Information ah an puang dum dum mai.
I fimkhur tlang vek teh ang u. Vai mi rukbo ching hi a tak tak ani tlat, kan fate min rukbo sak ve hma ngeiin fimkhur em em a ngai.” Tih a ni.

Mahse, hei pawh hi thil awmdan dik tak chu hei zawk hi a lo ni a.
“Vawiin Dt. 1.10 19 chhûn dar 12:30 Pm bawr vel khan, Hmeichhe Naupang Kum 3 mi - Julie Lalhruaimawii d/o Lalrammawia of Kharzawl, Bilkhawthlir chu a Pa hian Kolasib ah Adhar Card Siamtir a tumna ah a hruai a. Adhar Card siamna dawr Hmar Arsi Dawr Diakkawn Kolasib ah, dawr chhûng a an awm lai in, a Pa hriat loh hian a tei chhuak a, hei hi lo hmu leh han sawizui thei an awm lem lo. Naupang hi Diakkawn Biakin tláng lam ah chho in, Salem Veng pan thla a, Jubilee Road ah lo kual chhuak a, Bazaar thleng lo a AG Veng lam a peng ni a rin ani. Pi Lalhlimpuii (58) w/o VL Siama(L) of AG Veng, New Diakkawn Kolasib chuan an kawt ah Thing a Eh laiin, he hmeichhe naupang hi lokal in, "a Pa bulah min hruai rawh a rawn ti a", ani chuan "khawnge in awm" tiin, Naupang hian "khu tah" ti chauh in a chhang thiam a, tichuan an hmu leh ta ani. Naupang hi Vai hruai a nih hmel loh a, Hmar Arsi dawr bul a, Pi Sangpuii Hawker ah hian, helai vèl bawr hian Vai thil lei an awm thu an sawi nen chuan Vai rukbo ang in Thu a thang ta anih hmel.”

Thil a nilo zawngin kal sela, pawi sawiloin kut an tawrh theihna boruak a ni nghal der mai.

NAUPANG TE NGAIHVEN LEH FIMKHUR PUI:
1. Naupang hi ruk bo leh hruaibo an awl a. Tuten emaw, eng hunah emaw an ruk bo remchang em em an ni. Mihringa sumdawnna hi khawvela sumdawnna lian a nih avangin, naupang ruk bo hi an awl ber a. Kan fimkhur a tha a. Kan fate chin hriat a tha hle. An kum mil tawka fimkhurna thu leh inven dan pawh hrilh a tha.
2. Naupang ruk bo mai nilo, naupangin khuakhem an tawk nasa. Kan fimkhur a, nu leh pa te pawh kan tan deuh deuh angai.
VAI ILP LEH A SPONSOR TU: Sponsor-tu neiloin ILP a neih ngawt theih loh. Sponsortu tam takin kan vai sponsor te kan ngaihsak zui lo bawk. ILP chungchang hi kan fimkhur e mem a tul. Hun dangah chipchiar zawka sawiah khek ila a tha zawk awm e.

KHUAL THUTHANG LEH THUDIK: Khual thuthang hi chu a darh tial tial a. Thudik a tlem tial tial duh. Kan thuhriatte awih nghal ngawt ching lo ila. Tharum thawh ngawt mai phei chu in sum ila. Engemaw rinhlelh thil kan nei a nih pawhin, Police hrilh thuai a tha ber.

Tin, Thudik zawngtu ni ila a tha awm e.

- F. Vanlalrochana, SDPO, Lunglei

No comments:

Post a Comment

Post Bottom Ad