State Election Commission-in Sinlung Hills Council thar siam tura inthlan hun tur vawiin khan a puang
Sinlung Hills Council Interim Period chu thla 4 pawhsei a nih hnuah thla thar ni 11 khian a tawp dawn tak avangin State Election Commission chuan Sinlung Hills Council thar siam tur hian thla thar, November ni 5-ah vote thlak a nih tur thu a puang a. He inthlana chuh tumte chuan tun thla ni 10 aia tlai loah hming pek luh tur a ni a, hming pek luhte hi tun thla ni 11-ah endikin ni 14 thleng inhnukdawk duh te tan hun hawn a ni ang a, ni 14 hian candidate-te hming tar chhuakin an symbol tur pawh pek fel a ni ang a, November ni 5-ah mipuiin vote thlakin Ballot box-te’n Constituency Hqrs. an thlen veleh vote hi chhiar nghal a ni ang a, eng emaw vanga vote thlak that ngai a awm a nih chuan November ni 7-ah vote thlak that a ni ang a, hemi ni vek hian vote chhiar a ni ang a, November ni 8-ah chuan inthlan hi zawh fel vek tawh tur a ni ang.
Sinlung Hills Council inthlan turah hian Constituency 12 – Khawlian, Phuaibuang, Suangpuilawn, Vanbawng, Ratu, New Vervek, Sakawrdai South, Sakawrdai North, Zohmun, |inghmun, Saipum leh Saiphai Constituency te a awm a. Hetianga inthlan hun tur puan a nih takah hian inthlanna tur huam chhungah hian Model Code of Conduct hman nghal a ni.
SINLUNG HILLS COUNCIL ELECTION CHHUNGIN MODEL CODE OF CONDUCT
Kan hma lawka Sinlung Hills Council Inthlan vawikhatna lo awm turah felfai taka Inthlan kalpui a nih theih nan State Election Commission, Mizoram chuan India Danpui hnuaia Article 243ZA hnuaia Sub-Rule(1) of the Mizoram( Election to Sinlung Hills Council) Rules 2019 tlawh chhanin Inthlan puan atanga Inthlan Result puan thlenga hman tur Model Code of Code a ti chhuak a. He MCC hian - Political Parties, Candidates leh Sawrkar hnathawk sang, First General Election to Sinlung Hills Council, 2019 a inhnamhnawih zawng zawngte a phuar a. Tin, Sinlung Hills Council huam chhunga State Government, Central Government, Public Sector Enterprise of State or Central Government leh India Danpui tlawh chhana din hlawh neia hnathawhna hmuna hnathawkte zawng zawng pawh a phuar tel nghal bawk a ni.
A chunga tarlan, Sawrkar hnathawk te, MCC in a phuar te chuan a hnuaia mite hi an zawm vek tur a ni ang.
1. Inthlan chhungin tan lam neih a ti lang tur a ni lova; Political Party campaign thilah reng reng a in hnamhnawih tur a ni lo.
2.Canditate thlawp zawngin emaw a awm tur a ni lova, eng ti kawng zawng mahin a pui tur a ni lo bawk.
3. Thusawiin emaw thiltih in emaw campaign lam thil huaihawtna emaw campaign kaihhnawih meetingah inhnamhnawihna a nei tur a ni lo.
4. Election thilah Minister emaw Potician hnungzuiin a tel tur a ni lo.
5. Law & Order emaw Security thila duty nei tihloh sawrkar hnathawk dang te chu Canditate puala meeting-ah an tel tur a ni lo.
6. Police Officials, Law & Order thila duty te chu Candidate puala tel ve anga ngaih an ni lovang.
7. Official thila political party hrang hrang ten an dawrin sawrkar hnathawk chu hleih bik neiin hna a thawk tur a ni lo. Politics thila party thenkhatte emaw candidate ten lungawilohna an thehlut a nih chuan Police in tan lam nei lovin hma an la ang.
8. MCC bawhchhia apiang te chu Central Civil Services(Classification, Control and Appeal) Rules, 1995 hmanga an chungthu rel sak an ni ang.
Sinlung Hills Council inthlan vawikhatna atana Returning Officer leh Asst. Returning Officer a ruatte tan District Election Officer, Aizawl kaihhruaina hnuaiah DC Office, Aizawl Conference Hall ah training neih a ni.
Sinlung Hills Council, 2019 inthlanna turah hian Aizawl District-ah Constituency 10 (Sawm) awmin khaw 31 (Constituent Village) ah inthlanna neih tur a ni a.
Training-ah hian Returning Officer (RO) leh Asst. Returning Officer (ARO) te mawhphurhna hrang hrang bakah nomination file chungchang chipchiar taka inhrilhhriat a ni. SHC Election atana mawhphurhna chelhtute chu inthlanna muanawm leh felfai tak neih a nih theih nan theihtawp chhuah theuh turin District Election Officer in a hriattir a ni. Source - AIR/DIPR
Post a Comment