ZOTAWNG THUNAWI 47 - TIMES OF MIZORAM

Home Top Ad

Post Top Ad

ZOTAWNG THUNAWI 47

Kristiante hian kan Bible-ah hian kan biak lai "pathian" hi "Pathian" tiin kan ziak ngei ngei a, chu chu keini aia Bible nei hmasa zawkte tih dan kan entawn a ni a. "Lalpa" tih te pawh hawrawppui te reuh tê têin "LALPA" te kan ti thin. Mi thiamte sawi fiah dan chuan, "Pathian dang chu 'pathian' kan ti a, kan 'pathian' chu 'Pathian' tiin kan ziak bik a ni," an ti mai a. Kan ngaih pawimawh bik vang a nih theih rualin, 'pathian' tih vek aiah, a khawi sakhaw 'pathian' nge hriat zung zung a awlsamna atana tih a ni thei bawk. 

Ni e, Kristiante hian khitiang khian kan ti vek a, a ha kan ti khawp mai a. Mizo phei chuan kan sawi uar a, a ropui bik vang ang deuha chhuah thiam riau te kan awm. Chutih lai mek chuan Mosolman han en i la, an pathian an sawi/ziah chuan 'god' ti loin 'God' an ti ve thlap (Sap tawnga an Koran bung leh châng ilo an tar lanaah), Jehova/ Yahweh tih chang kan neih ang te, Lord/ Lalpa tih chang kan neih ang te khan 'Allah' an ti a; 'pathian' an tih chuan hawrawppui an hmang ve thlap a. Pathian pakhat sawina a nih avang hian proper noun anga ngaiin hawrawpui kan hmang tlâng vek a ni mai awm e. ‘Allah’ tih pawh hi Arab Kristian chuan an hmang ve tho a, Muslim pathian sawina tawngkam bîk phei chu a ni hran lo. 


Heng hi chu pathian sawina vek a la ni a, noun hlir a la nih avangin thu dang ni ta se, pathian ai awh atana kan hman pronoun, "a, amah, ani," tih zawng zawng thlenga hawrawppuia bul tan tur emaw ti mai kan awm thin a. Kan mi hmasate pawhin an lo chîng viau mai bawk a, hei hi intihhmuh vak chi niin a lang lo. JF Laldailoa phei chuan Ethel L. Zâri hnenah, "Pathian chungchang thu sawina pronoun reng reng Capital hawrawp ka’n hman ziah hi Sap-ho Printing Press tih dan a nia, lo ngaithiam ang che," a ti a. Hei hi a hmuh phak china a hriat dan a ni ang. 

JFa tawngkam hi han en nawn leh i la, “Capital” tih leh “Printing Press” tih kan hmu a, tun hmaa kan mi thiamte khan Sap tawng hi proper noun ni lo mah se hawrawppuia ziah tan chawt an chîng hle.JFa hi en zui lawk i la: “…kan Office…” (Office, dik lo); “Tih emah chuan Pastorte pawhin fa inchhangbung tâwk an hai hlei nem,” (Pastor, dik lo; mihring hming nena hman kawp chuan ‘P’ hi hawrawppui tur a ni a, a narana sawi chuan hawrawptê tur; inkohna anga hman hian hawrawppui tur a ni leh bawk); “Tuk zana Radio-a ‘vawiin zing’ tih leh ‘vawiin tlai’ an tih thin pawh hi ‘tukin zing’ leh ‘zanin tlai’ tih zawk tur a ni ang,” (Radio, common noun, hawrawpui R a dik lo). 

Amah chauh hi a ni lo a, han pêng thui deuh law law lawk teh ang khai. J. Malsawma chuan “Zo-Zia”-ah ‘ethics’ tih turah ‘Ethics’ a ti vek mai a, ‘moral’ tih turah pawh ‘Moral’ tih a hmang. Siamkima Khawlhring pawhin hawrawptê hmanna turah ‘America rama University zawng zawng,”(University, dik lo); “Campus chhunga Restaurant bangah,” (Restaurant, dik lo); “…tleirawl lam leh Officea thawkte” (Office, dik lo). Zairema te pawh an ni tho, “…an Football khel pawh hi dan pangngaia fault hamna tur hi a tam lutuk.” Hêng hi an hmanna kan hmuh chhun a ni lo a, han keu phawka lo lang tuarh zînga tlêm te chauh a ni. Zikpuii Pa te leh mi dang dang pawh an bâng chuang lo, common noun-ah hian hawrawppuia ziah an mai an chîng tlat. Tun hmaa an tih dan ni hmiang.


Pathian sawina lamah lo lêt leh tawh i la. Sap Bible-ah hian pathian sawina pronoun-a hawrawppui hmanna awm ve sep sep a, a tam lo a. Sap Bible version kan hriat lâr thenkhat: KJV, NIV, NLT, GNT, RSV, ESV, ASV, CEB, CJB, DARBY, GNV, ISV, JUB, NLV, adt., (duah duah mai a)heng bâkah version tam takah hian hawrawppui an hmang ngai lo a; version tlemtêah hawrawppui hmanna chu a awm tho mai. Amaherawhchu, Mizo Bible-ah hian khawiah mah Pathian sawina pronounah hawrawppui kan hmang lo a, chu chu ziah dan dik a nih bâkah, "Sap tih dan" tan chhan dawn pawh ni ila, pronoun-a hawrawppui hman hi mi tlem tê tih dan a ni reng reng. Mizo Bible-ah chuan hawrawppui hmanna pakhat mah a awm lo a, chu chu kan hman dan tur a ni. 

Hranghluite kan dem thei lo a. RL Kamlala te pawhin Pathian sawinaah chuan hawrawppui hman mai an chîng a. An hunlai kha a rei ta a, ziah dan mumal taka han sawi theih a la ni lo bawk nen, tunah erawh chuan tunlai mi kan ni tawh a, hmanlaia an ziah dan kha hluihlawn kan ngah tâk hi."Biak in" te pawh tawngkam laklawha a awm chuan "biak in" tih a ni a; chu chu MLC Mizo tawng Ziah Dan-ah pawh a chuang a, ziah lam uluk mi chuan an hmu vek tawh ang a. Hei pawh hi kan mi hmasa, kan han sawi tâk te bâkah kan la sawi lan loh R. Vanlawma te pawhin hawrawppuia ziah mai an lo chîng vek a lo nia. Mahse tunah chuan thil hlui a ni tawh a, hluihlâwn a hun ta.

Tunlai khawvelah chuan, “Kan style chuan ‘Biak In’tia ziah hi a dik,” tih te, “Kei chu hetia ziah hi a tha ka ti zawk a,” tih te hi ziah dan dik lama mi thahnemngaite thuhla ni loin, Rotekawla Sepa (Sepui tih khan lungphun te a awm ang lawi a) ang deuha ro hran nei tlat mite thukhawchâng a ni a, "Ro hran in rêl, kawng hran in dap" tih ang deuh kha a ni ber. A dân dik tluangtlam zâwm loa style neih phêt tum hi vanhnuai hringmi dan a ni tak na a, ziah dan dik kan duh a nih chuan?—proper noun a nih loh chuan?—hawrawppui hman loh a dik.

~Rempuia R. Lutmang

No comments:

Post a Comment

Post Bottom Ad