SENATE OF SERAMPORE IN PU LAL THANHAWLA DOCTOR OF DIVINITY DEGREE A HLAN
Vawiin, November 30, 2019 hian Hyderabad khawpuia Serampore College (University) Convocation-ah Pu Lal Thanhawla chu Senate of Serampore in Kohhran leh khawtlang tana a thawhhlawk em avangin Doctor of Divinity ( Doctorate Degree) a hlan. Convocation hi chawhnu dar 3:45 atanga tlai dar 6:15 thleng neih a ni.
Serampore College (University) hi India rama Pathian thu zirna hlun ber, Theological College hrang hrangte pawhin affiliation an tihna a ni a,Mizorama Kohhran hrang hrangte nena inzawm nghet tak a ni mek.
Serampore College (University) in lehkhaa an tarlan danin Pu Lal Thanhawla hi India ram, Hindu kulmuk tamna ramah hian ram hruaitu lawkte zingah Kristian leader chhuanawm tak anga hriat a ni a. India ram Kristian tlemte awmte tan hian a chuanawmin, a thlamuanpuiawm hle thin a ni. India ram hmun hrang hrangah Kohhran leh Institution hrang hrangten an hun pawimawhah an sawm fo a., Pu Lal Thanhawla hian a theihna a piangah a telpui thin bawk. Hetianga Chief Minister meuhin a telpui thin avang hian sakhaw dang kara Kristian tlemte awm te’n ngaihpawimawh an hlawh phah thin hle a ni. Mizo Kristian te chawimawitu langsar tak a ni bawk. Tin, India ram hmun hrang hranga Kristian-ten tihduhdahna an tawh changin Pu Lal Thanhawla hi Kristiante thlavang hauhin na takin a tawngchhuak thin a, chu chuan awmzia a neiin, tihduhdah tuar mek te’n an thlamuanpui thin hle a ni.
Hengte avang hian Pu Lal Thanhawla, India ram politician hlawhtling berte zing a mi, term 5 zet Chief Minister ni thei hi India ram mipui vaibelchhe 130 chuang zinga Kristian sakhaw zuitu 2.3% chauh awm ve te tan hruaitu chhuanawm tak leh thlamuanpuiawm tak a ni.
-Vanlalnghaka Tlau
Post a Comment