MIZORAMAH HIV NASA ZAWKA TUNA DO NGHAL A TUL - MSACS Project Director Dr. Lalthlengliani
2nd December, 2019 (MSR): Kum 2018-2019 chhungin Mizoramah mihring 44649 thisen exam a ni a, HIV positive 2557 hmuhchhuah a ni. MSACS Project Director Dr. Lalthlengliani chuan nasa lehzualin HIV/AIDS an do dawn tih a sawi a, tuna do nghal a ngaih thu a sawi.
Pathianni chhuak chanchinbu Zalen palaiin a kawmnaah Mizoram State AIDS Control Society (MSACS) Project Director Dr. Lalthlengliani chuan Mizoram chu India ramah HIV/AIDS hluarna ber a nih thu a sawi a. "HIV laka mipui te an him nan leh, kai thar an awm lohna turin nasa taka tan tan lak thu a sawi a. Ram hruaitu Political Leaders, Kohhran leh Tlawmngai pawl (civil socities) te thawhpuiah sawmin "nasa lehzualin hmalak kan tum a ni" a ti.
Dr. Thlengi chuan, HIV vei tura ngaih, High Risk Group ni thin chu mi nawlpui (general population)-ah a lut tawh tih sawiin, "HIV laka invenna tha ber chu fimkhur a ni a, mimal tin kan fimkhur a, kan nun kan uluk hi kan himna a ni" a ti bawk.
MSACS Project Director chuan Mizorama HIV inkaina tam ber chu sex a nih thu sawiin, Kohhran leh khawtlanga inhmang tak tak pawh a ruka midang kawp an awm thin a, chung mite atang chuan an kawppui ten kaiin pawisawilo an faten an kai phah ve leh thin niin a sawi bawk.
Mizoram State AIDS Control Society chhinchhiah danin, Mizoramah HIV positive 17897 hmuhchhuah an ni tawh a, an zinga 11828 hi mipa an ni a, hmeichhia 6069 an awm bawk. HIV positive zingah thalai, hnathawk thei rual an tam ber a, kum 25-34 inkar HIV positive 7585 awmin hei hi a vei zawng zawng atanga chhutin 42.38% a tling a ni. ~Vanneihthanga Vanchhawng
Post a Comment