India nula tennis khel thiam Sania Mirza chu nau neih vanga kum hnih zet a chawlh hnuah a rawn kir leh dawn a, nakkum January thlaa neih tur Hobart International-ah inlan a tum.
Kum 33 mi Mirza hi inelna a hmachhawn hnuhnung ber chu October 2017 thlaa khelh China Open daih tawh kha a ni. Nimin khan Hobart International-a a inlan tur thu hi a ti chiang a, doubles huangah Nadiia Kichenok nen an ṭangdun ang.
Doubles world number 1 hlui Mirza chuan, "Hobart-ah ka inkhel ang a, chumi hnuah harsatna dang a awm a nih loh chuan Australian Open ka khel leh bawk ang.
"Thla leh mai hian Mumbai-ah inelna a awm dawn a, mahse he huna ka inlan leh inlan loh chu 50-50 a ni mek, engmah sawi chian theih a la ni lo," tiin a sawi.
Grand Slam doubles vawi ruk champion tawh Mirza chuan sawi zawmin, "Fa neih hnu chuan taksa inthlak danglam a tam a, rilru pawh nasa takin a danglam bawk. Thla sarih liam ta vel khan fa ka nei chauh a ni a, mahse tunah chuan ṭha takin inbuatsaihna ka nei leh thei tawh," a ti. -Vanglaini
Post a Comment