SSA leh RMSA zirtirtute chu insawifiah tura tih an ni dawn - TIMES OF MIZORAM

Home Top Ad

Post Top Ad

SSA leh RMSA zirtirtute chu insawifiah tura tih an ni dawn

Lalchhandama ralteSSA leh RMSA zirtirtu, vawiin atanga sikul leh office kai duh lote chu sorkar hmalakna ring tawk lova ngaiin insawifiah tura tih an ni dawn tih School Education Minister Pu Lalchhandama Ralte-in a sawi.

SSA leh RMSA zirtirtute intelkhawmna pawl, Federation of Mizoram Samagra (SSA/RMSA) Employees (FEMSE) te’n tun hnaia an hna an chawlhsan chungchangah Minister hian nimin khan Aizawl Press Club-ah chanchinbumite kawmin, a zawna ni thum chhung ngawt FEMSE-te’n Zirna Inahte leh an office hna chawlhsana sorkar kar nana a ruala chawlh an la thut chuan a barakhaihin pawi a ti takzet tih a sawi a.



Sorkar-in a ngaih pawimawh em em zirlai naupangte hmakhaw ngai zo lova, naupang exam tikhaihlak zawnga hma laa sorkar thu an zawm duh lo chu pawmzam harsa a tih thu sawiin, Mizoram sorkar chuan hreh tak chungin sorkar thu zawm lo zirtirtute chungah ‘action’ a lak a lo tul ta a, phalna tel loa ni thum lai an chawlh chhung zawnga an hlawh chu pek an nih loh tur thu hriattir an ni tawh a; hei bakah hian vawiin leh naktuk atanga sikul leh office kai duh lo chu sorkar hmalakna ring tawk lovah ngaiin, he an hnathawh mekah hian tui tawk lo leh thawk chhunzawm duh lovah sorkarin a ngai dawn a, show cause notice pek an ni dawn a ni, Minister chuan a ti a. Sorkar thu zawm lote lo chhinchhiah a, a tul anga report pawh lo buatsaih turin sikul tin Headmaster, Local Council emaw Village Council emaw leh Village Education Committee (VEC) te sorkairn a ngen tih School Education Minister chuan a sawi bawk.

FEMSE te’n sorkar kar nana thutlukna an siam hi Chief Minister emaw amah emaw hnenah engmah inhriattirna a awm lo tih Minister chuan a sawi a. Sorkar thar, kum khat em pawh hun la hmang tha thum lo chuan hun hmasa lama an thu lo thlente ngai pawimawhin an tan ngaihtuahna a sengin hma a la chho mek a; hlawh pawh mumal taka an lak theih nan theihtawp chhuah a ni, a ti a. Central sorkarin an hlawh tur a rawn tih tlem avangin tunah hian state sawrkarin kum khatah Cheng Vbch 27 chuang a sen belh mek zawk a.



An thil phut - hlawh tihsan leh zirtirtu hna ruak zaa 70 an hauh chungchang chu tun dinhmunah sorkar tan tihfela han tihhlawhtlin nghal rum rum theih a nih loh avangin FEMSE te pawh an nawrh titawp a, dan pangngaia kal leh tura ngenin sorkar chuan a lo hriattir tawh a. SSA (Elementary)-te’n an service chungchanga Mizoram sorkar Guwahati High Court Aizawl Bench-a an khin mek avangin Court-in a rel fel hma chuan an chungchang thua hmalakna kal mek pawh sorkar tan thutlukna engmah siam theih a ni rih lo, a ti bawk.
Hetihlai hian SSA leh RMSA hnuaia zirtirtute chuan sorkar lakah lungawlohna lantirin mass casual leave hi an la la chhunzawm zel dawn tih an sawi a.

FEMSE hruaitute chuan Zirtawpni thleng lungawilohna an lantir dawn tih an sawi a. Sorkar an nawrnaah hian sorkarin inbiakna neihpuiah an sawm lo tih sawiin, an lungawilohna an lantirna kawngah an pawl member tu pawhin harsatna an tawk a nih chuan an member te thlavang hauhin na takin sorkar an nawr zel dawn, an ti. ~AIR Aizawl

No comments:

Post a Comment

Post Bottom Ad