Sawrkar Health Care Scheme hi keini John Williams Hospital - (Synod Ta) hian kan zawm ve theih rih loh chungchangah kan kohhran mi ṭhenkhatin kohhran hospital dangten an zawm theih laia kan zawm ve thei lo hi an hre thiam lo va, mi rethei khawngaih lo ni tein min puh lek lek a, chung ho ka chhanna chu a hnuaia mi hi a ni e:
Tuna kan dinhmunah chuan Non-government Hospital Association of Mizoram (NGHAM) hnuaiah hian kohhran leh private hospital tam ber ( a tirah chuan zawng zawng) inthurualin sawrkar kan dawr a. Health Care rate hi Sawrkar Gazette-ah meuh chhuah a nih hma daih aṭangin kan indawr tawh a. An thu chhuah point 2-naah "Private (empanelled)hospital zawng zawngten sawrkar rate ang chiah vekin damlo an enkawl tur a ni" tia an dah tawp mai hi ṭawngkam dang deuh hlekin, "sawrkar rate ang chiah zelin sawrkarin damlo awm man reimbursement a pe ang," tia thlak turin kan nawr a, chuti lo chuan sawrkar rate aia sang sum sen hun a awm lo thei lo. ( Damlo dinhmun a zirin) Heng sen belhna te hi damloten pek an hreh lo va, pe ve mai se tih lah sawrkarin a awih si lo va.
Tun hmaa RSBY tih laia sawrkarin hospital ṭhenkhat pawisa a batsak, tun thlenga a la pek theih loh pawh nuai tam fe a la ni. Mahni damdawiin tana hlohna kawng awm thei leh, kan hospital rate sawrkarin a duh dan dana min fix sak hi a hlauhawm kan ti. Mi rethei khawngaih lo tih hi ngaihtuah chiang lo tawngkam mawlmang mai a ni.
Entirnan, Hotel neituin mi rethei khawngaih intiin a sum hloh zawng hlirin chaw a thlawnin eitir reng ta se, a tla chhe thuai anga, amah zawk kha mi rethei a ni thuai ang!
Health Care system reng reng hi ngun taka ngaihtuah hmasa lo va join ve ngawt chi a ni lo. A kaihhnawih a tam thei fu a ni.
Mi rethei khawngaih lo zawk chu sawrkar hi a ni pawh a tih theih. Tunah Health Care ah hian Private hospital te va CONTROL kher tum lovin, a kal pangngai hian kal mai se ṭha tur a nia.
Hei hi chiang ila: Keini ho hian sawrkar rate aia sang kan phut miah lo. Amaherawhchu, a aia tam damlo khan a lo mamawh palh chang a awmin, a enkawltu hospital in a peksak zel tur a ni hi a fair lo va, pawm a har kan ti a ni e.
Private leh kohhran hospital thenkhat Health Care tuna zawmtute hian Association anga hma kan lak ho laiin min phatsan a ni mai. Sawrkar mi lianten mimal taka an nawrna an hnial ngam lo pawh a ni mai thei.
Engpawhnise, kan mutan hi a ho hle a, siam rem a harsa lo turah kan ngai a, nakinah chuan kan vaiin Health Care hi awmze neiin kan la zawm vek a rinawm.
Tin, Health Care hmang tangkaitu turte hi mi rethei an ni vek lo tih hi belh leh hram ang.
- Dr Ramdinthara Sailo
John Williams Hospital, Lunglei.
Post a Comment