Kum thum lai ka haw tawh loh hnuah ka nuin, " Mama, tun kum masi chu lo haw ve tawh rawh, kan ngai em mai che, " a tih avangin masi hmang turin Mizoram lamah ka haw ve dawn a. Mi inchengvawng leh inren ṭhin em em ka ni a. Pawisa a hek mai mai tiin Bangalore-a kum 6 dawn ka awm tawh hnuah vawikhat chauh ka la haw a ni. Vairam lama ka chhuk leh, ka haw leh pawhin ka lehkhazirpui ka ṭhiante thlawhnaa an kal ṭhin laiin, kei erawh hnuai lamah motor leh Rel-in ka kal ṭhin a ni. Kan harsain inhlawh chawpa zirmi ka ni a. Ka inhlawhna aṭanga ka sum hmuh hmanga to taka thlawhna chuan ai chuan, senso tlem theih ang ber turin Bus leh rel-in ka zin ṭhin a ni. Rel ticket ka lak reng reng pawhin a lum em em lai pawh nise, AC ticket ka la duh ngai lo va, a tlawm zawk sleeper ticket ka la ṭhin a ni.
Kan haw ni a lo thleng a. Ṭhiante'n Airport an pan laiin Train Station ka pan ve thung a. Chutiang hunah chuan kan rethei bik lutuk chu pawi ka tiin ka rilrute pawh a na ve lek lek ṭhin. Mahse mi inren thiam em em ka ni a, chhungkaw pangngai tak fapa lo ni ta pawh ni tehreng ila, Rel chuang theilo ka nih ngawt loh chuan Rel-a ka haw tho ka ring a ni. A chhan chu thawhchhuah la neilo, zirlai mai ka la nih dawn vang a ni. Tunah pawh kan dinhmun a ṭhat loh avangin inhlawh chawpin ka zir a, inren takin ka thawh hlawh chu ka hmang ṭhin a, thlawhna ticket man daih pawh ka la nei. Mahse ṭhiante ruala thlawhnaa haw chu châk ve viau mah ila, chu chu ka tan a rem ve lo a ni. A chhan chu ka lo kal lehna tur ka neih a ngai a. Ka kalsan leh huna an lo hman tur ka nu leh pa tan pawisa tlem azawng tal hnutchhiah ka duh dawn bawk si a ni.
Tichuan, Bangalore aṭanga ka lo chhuah aṭanga kar khat dawnah Aizawl ka thleng a. Kan chuanna bus a tluan loh em avangin chawhnua thleng tawh tur kha, zan dar 12 dawnah Aizawl kan lut chauh a ni. Bawngkawnah bus chu dintirin ka chhuk a. City bus emaw taxi a awm tawh dawn lo tih hriain ka bag rit vak lo chu akin kein ka kal nghal zel a.
Aizawlah hian chhungte emaw hmelhriat ṭha kan neih loh avangin hotel-ah ka thleng dawn a ni. A vawh em avanga khur hlawk hlawk chungin, ṭum danga ka lo inghah tawh ṭhinna hotel awmna Zarkawt lam chu ka pan zel a. Zarkawt lam kher ka panna chhan hi hmun danga hotel awm ka hriat loh vang leh, chhuah lehna tur Sumo counter hnaih a nih vang a ni bawk. Masi pualin Aizawl veng hrang hrang chu an lo chei a, mit a tlai hle. Thlasik niin zan a rei tawh bawk nen, motor a lo tlan leh zeuh ṭhin tih loh mi veivak an awm tawh lo.
Tichuan, darkar chanve dawn ka kal hnu chuan Zarkawt chu ka thleng a. Zarkawt traffict point thlen hma hret, kawngthlang, Motor Part vel zawrhna dawr hma, thim chinah mi pakhat hi ka hmu a. Ka hmuh rual chuan chu ka mi hmuh chuan ka lam a lo pan nghal a. Hmeichhia a ni. A lo kal pah chuan " Hei, ṭhianpa, min dawr la, " a lo ti a. Chutihlai chuan ka bul a lo thleng tawh a. Zu rim a nam viau lehnghal. Ka en a, amahah chuan dawr tur thil a zawrh ka hmu lo. Bag te tak té a ak a. Chu a bag te tak téah chuan ka nu leh pa secondhand kawrlum tur a leng dawn lo tih ka hria. Bangalore-a thawmhnaw a to hlawm em avangin ' ka nu leh pa tan secondhand kawrlum Aizawlah ka lei ang,' ka ti kha a ni a. Mahse zan dar 12 velah ka lei ang ka ti reng reng lo. A bag chu magic bag a nih loh chuan ka nu leh pa kawrlum tur a leng dawn lo tih ka hria a. Chawhmeh a zuar ti dawn ila, a bag-ah chuan samṭawk pum 4 leh iskut pumkhat bak a leng dawn lo tih ka hre bawk. A bag-ah chuan ka mamawh tur thil a leng dawn lo, ka tui tih em em Pickle a zuar a nih ngawt loh chuan. Tun ang zanrei tawh, khawvawt em emah hian Chawhmeh emaw pickle zuarin a chhuak lo tawp ang le. Amah lah chu Red carpet zawh tur ang hrimin a inchei em em mai lehnghal. Umm, ka hria e. A zawrh chu ka hria e. Ka sawi dawn lo ! " Maw, ṭhianpa, ka tlawm duaih ang che ! " a lo la ti a. Ka ding a. Amah en hu hu chung chuan " Eng maw ka dawr ang che ? " ka ti a. Ka hre lo der a ni. " I hriat reng kha aw, " a lo ti reuh a. Ka rilru te te chuan " A va'n zeilo tak ! KS ve si, " ka ti a. " Ka hre lo, ka kal dawn, " tiin ka kal nghal a. " Maw, ṭhianpa, khawngaih takin min dawr teh, " tiin ka hnungah chuan ka kal chu min zui ve nghal a. Ka ding a. " Ṭhiannu, khawngaih takin min zui lo teh, " ka ti a. Ka phâk ang tawkin Pathian ka ṭihin, ka awmnaah pawh fellowship velahte ka inhmang ve ṭhin a. Zuk leh hmuam ka ti lo va, Zu ka in ngai hek lo. Sual bawlhlawh lam hrim hrim ka ngahtuah duh ngai lo. FB inbox-a engemaw deuha hmeichhe biak ringawt pawh ka duhlo ṭhin a ni a, ka inhlawhna aṭanga ka sum hmuh hmanga KS laka inhman phei chu ngaihtuah pawh ka ngaihtuah ngam ngailo hrim hrim. Chutia dinga a lam hawia min zuilo tura ka tih tâkah chuan a ding ve mai bawk a. " Khawngaih takin, maw ! " a lo la ti a. A sawi zawng chuan a zak hle tih ka hria. Min en ṭha ngam lo. Hetia zak leh tur siin engati nge inzuar tura a chhuah ni ? Engtinmaha chhang lovin ka kal lehnghal mai a. Ka kal leh tâkah chuan min zui ve leh a. A lo kal pah chuan, " Maw, ṭhianpa, khawngaih takin ! " a lo la ti bawk a. Hetiang hian an customer te an ngen ṭhin em ni le ? Chutih lai chuan Step ka thleng tawh, ka ding a. " Engati nge ka duh loh chung chunga min ngen ? I zak lo'm ni ? Hetia in zuar lo hian hnate thawk ve ta che u. KS akara zuruih lehnghal. Min zui tawh suh ang che, " ka ti a. Ka ṭawng na bawk a, a zak ve hle a ni ang, en pawh mi en ngam lovin ka dinna aṭanga hlam khat velah dingin a kun tlat a. Chutih lai chuan ka chhak lawka hotel gate chhungah chuan ka luhsan nghal a.
Kawngka ka kik fe hnuah vai tleirawl pakhat hian a lo hawng a. Ka inziahfel hnu chuan ka room turah min hruai chho nghalin, ka indahfel hnuah inphih faiin ka mu nghal a. Ka mut pah chuan ka thil tawn chu ka ngaihtuah a. " Ka khawngaihna dil meuhvin dawr turin min ngen a ni a. Dawr lovin ka hau hrep hnuah ka kalsan kha a nia " tiin ka inthiamloh angreng a. Khati ang khan tuemawin a thil zawrh dawr turin min ngen ni se, dawr lova ka kalsan theih ka ring lo a ni. A laka ka ṭawngkamte lah kha a na viau lehnghal. KS mah nise Lalpan duh taka a siam, keimah ang mihring ve tho a ni a. Ka ṭawngkam avang chuan a rilru a nat ve viau pawh ka ring a ni. Ka nu ka chhun a, mi hi ka khawngaih hma em em ṭhin. Ka laka rilru ṭha lo pu pawh nise, khawngaihthlaka an awm ka hmuhin ka khawngaih leh vat ṭhin a ni. KS pawh chu ka khawngaih ta hle a. A la awm ang em le, tiin ka mutna bula tukverh parda chu keuin ka zu en a. A la awm. Step bulah chuan a lo la ding a. Ka thawmhnaw hain ka chhuk leh a. Ṭawngkam nâ taka ka hauh avangin ngaihdam dil ka duh a ni.
Step-ah chuan ka chhuk thla nghal vat a. A lo ṭhu kun tlat tawh a. Vawt a tih hmel em em lehnghal. Ka aw ka thian a. Ka aw a hriat rual chuan a lo hawi chho nghal a. A lo ṭap mek ni tur a ni, a mitah mittui a tling a. " Hei ṭhiannu, i lo la awm a ni maw ? Ih, nichina ka ṭawngkam avang khan min ngaidam rawh aw. Ka tihpalh a ni. Ka sawi loh tawp tur ka sawi a ni. Ka inthiam lo lutuk a, ngaihdam dil tur chein ka lo chhuk leh a ni, " ka ti a. Chutih lai chuan min en tawh lo. Engmah sawi lovin a inhnit ṭan a. Ṭah aw ṭeuh chungin, " A nih, min dawr dawn em ? " a lo ti a. A sawi zawng chuan vawt a tih avangin a aw a khur deuh lehnghal. Chhan mai dan tur pawh ka hre lo. Ka ngawih vang vang hnuah, " Ka room-ah chho phawt teh ang, " ka ti a. A mittui hru mawlh mawlh pah chuan a lo ding vat a. Kan pahnih chuan ka room-a chho tur chuan kan inzui chhho ta a.
Hmeichhia ka hruailuh tur chu hriattir ṭha a ka hriat avangin, ka piah deuhah ka ṭhiannu chu din tirin recieption counter kawngka chu ka kik leh a. A lo muhil leh hman tawh nge, a lo hawng mai lo. ' An hre dawn chuang lo' tia kal leh mai ka tum lai chuan a lo hawng a. " Ka ṭhiannu ka hruai lut dawn a nia, " ka ti a. Ka ṭhiannu lo en pah chuan, " Extra a ngai ang, " a lo ti vat a. " Engvang chuan maw ? A riak nghal dawn pawh a ni hleinem " ka ti a. " Extra pek loh chuan a theih loh, " a ti tlat a. " I va'n phakar ve maw le. Kha hei hi la rawh, " tiin ka kekawra cheng 50 awm chu ka pe a. " Riahtir suh aw " a lo tih pawh ka chhang ta lo.
Ka thlenna room kan thleng chho chu, " A vawt lutuk, ka mu nghal dawn, " tiin a bag ah chu dahin a thawmhnaw pawh hlip lovin ka khumah chuan a mu nghal a. Puan chuan a inlukhup nghal bawk. A awmdan chu a ngaihna ka hre loh hle. Ka dawr beisei khan min zui chho emaw ka tia, engvangin nge a mut nghal mai le ? " Hei, 'ngati nge ka mutna turah i mut rikngawt ? Tho teh, haw vat la a ṭha ang. Pawisa tlem ka pe dawn che nia, " ka ti a. Min chhang lo. " Ṭhiannu, ka sawi chu i hria em ? " ka ti leh a. " Khawngaih takin min muttir rih rawh. Ka nawm deuh hnuah ka haw dawn nia, " a lo ti a. " I damlo em ni ? " ka ti a. Mi chhang lo. ' A damlo a ni ang a ' tiin a puansin chu keuvin a pang ka zu dehsak a. A pâng chu a lo sa hle a. " E, i damlo a nih hi. Engatinge damlo chunga i chhuah reng reng ni ? Engtin nge kan tih ang aw ? Damdawi dawr inhawng a awm tawh awm si lo, " ka ti a. Engmah a sawi ve lo. Tihtur leh sawi tur ber pawh hre lovin a mutna khum bulah chuan ka ding reng a. " Ṭhiannu, hetia awm ngawt chu a fuh ka ring lo, Civil-ah kan va kal dawn em ni ang ? " ka ti a. " A ngai lo. Ka bag-ah khan na chhawkna a awm. Tui nen min lo pe lawk mai, " a lo ti a. Khum bul dawhkana a bag chu lain damdawi chu ka zawng nghal vat a. A bag-ah chuan damdawi leh pawisa cheng 50 chauh hi a lo awm a. Damdawi chu lain ka tui bottle nen chuan, " Kha le, tui leh damdawi chu " ka ti a. Chu veleh damdawi chu lain tui nen a hmawm nghal a. ' Ka lawm e aw. Ka khawsik a reh veleh ka haw dawn nia, " tiin puan chuan a inlukhup lehnghal a. Engtinmah ka chhang lo.
A vawtin ka zin hah nen ding reng thei ka ni bik lo. Mutna tur dang chumi room-ah chuan a awm tawh bawk si lo. Recieption-ah bawk ka chhuk leh a. " Ka ṭhiannu kha a dam lo. Puansir tur pakhat min pek belh teh, " ka ti a. " Riahtir loh tur ka tih kha. Ka puin a hria ang e, " a lo ti a. " A damlo alawm maw le. Ka mu ve duh tawh, puan chu min pe vat mai teh, " ka ti a. " Puan chu inzawn mai ula. A nih loh chuan extra a ngai ang, " a lo ti leh a. " Kan mu dun dawn hleinem. I ngaih ang kha a ni lo aw. Chuan engvangin nge extra chu ka pek leh ang che ? Cheng Sawmnga ka pek tawh che kha, puan chu min pe vat mai teh, " ka ti a. " Zing hma takah hawtir ang che, " tiin puan va la tur chuan a phei nghal a.
Blanket pakhat nen chuan ka chho lehnghal a. Chhuatah ka kamchha phahin light off-in ka air bag khamin ka mu nghal a. Ka awngphah pân lutuk, vawt lutuk bawk si chu ka muhil hlei thei lo. Ka blanket sin chuan ka inzial a, a zia phian.
Ka muhil lai chu rum riin min tiharh a. Ka khuma mu chu a lo rum mek a. ' A na viau a ni ang a, ' tiin tho vatin light on pahin, " Ṭhiannu, ṭhiannu, " tiin ka au va. A harh lo. A pang chu ka dehsak leh a. A khawsik a lo sang hle hi niin a lo rum chhuak hial a lo ni. A khawsik avanga vawt a tih em avang chuan ka puansin chu lain ka sin thuahtir vat a. Puan ka sintir lai chuan a lo harh a. Ka lam lo hawiin min hmu chu mak a tih hmel hle a. " I khawsik a sang hle a nih hi. Nachhawkna i ei leh dawn em ni ang ? " ka ti a. Mi chhang tawh dawn lo emaw ka tih hnuah, " Ka lawm e aw, " a lo ti a. " Lawmthu sawi a ngai lo, " ka lo ti vat a. " Nachhawkna chu ei rawh aw, " ka ti leh a. Mi chhang lo. Ṭah chhuak insum ang hian a awm a, a mittui a tla a. Chutia a awm ka hmuh chuan ka khawngaih ta em em a. KS mah nise hmeichhia a ni a, a hmelhriat loh mipa thlenna room-ah natnain a sawisa mek a ni a, an in emaw a nu leh pa, a chhungte a ngaih hle ka ring a ni. Sawi tur leh hnem dan tur vak pawh hre lovin ka ngawi reng a. Vawt ka tih ve em avangin khum hnuaia ka bag chu pawtchhuakin kawrlum ka ha vat a.
A bulah chuan ṭhuin, " Ṭhiannu, nachhawkna chu ei rawh aw, " ka ti a. " Aw, khawngaih takin, " a lo ti a. Damdawi a hmawm zawh chuan, " I puan hi la la mu ve leh tawh rawh. I chau awm si a, " min ti a. " Chau lo ve. I khawsik a sang nen, puan pakhat chauha i lum zawh ka ring lo va, ka lo sintir che a ni. Nachhawknain a chhawk hunah che ka mu ve leh mai ang, " ka ti a.
Tichuan, engmah sawi lovin a bulah chuan ka ṭhu ta reng a. Ka bula hmeichhe damlo chu enin, ' Eng nge a hming ni ang le ? A nu leh paten hetia a awm hi a hria ang em le ? Bialpate a nei ve ang em le ? " tiin chhanna awmlo zawhna chu keimah leh keimah ka inzawt a.
Dawhkana ka mobile-a sana chu ka en a, zing dar 3:45 a lo ri tawh. Ka mut chhuak lutuk chu ka ham ham ta mai. Ka mutchhuak tih a hria nge, " Ṭhianpa, ka bulah hian lo mu ve mai ta che, " a lo ti a. " Aih, ka mut a chhuak hleinem, " tiin ka chhang vat a. " Ka bula i lo mut chuan keipawh ka lum deuh dawn alawm, " a lo ti a. Hmeichhia bulah ka mu ngai si lo va, a bula mut ka hreh a ni. Mahse a khawsik avanga vawt a ti lutuk, a lum phahna tur a nih dawn si chuan hnial chi a ni lo tih ka hria. Hreh tak chungin, " Awle " tiin zawimuangin a bulah chuan ka mu ve ta a. Hreh viau mah ila, ka mut ve tâkah chuan a damlo avanga a pangtilum nen, a bula mut chu a lum nuam hle. Hmeichhe bula ka mut avang chuan zamin thawk pawh ka thaw ṭha ngam lova, ka che ngam hek lo. Single khumah chuan ka si palh ang tih hlau niawmin chunglam hawiin attention ngatin ka mu a. Ani pawh lehlam hawiin puan chuan a inlukhup a.
Engtin tin emaw ka lo muhil ve a ni ang, ka harh leh chuan ka bula hmeichhia chuan ka veilam ban khamin, ka âwmah a hmai phumin, a kut veilam chuan min lo kuah bawk a. A mutui tih hriat em emin a lo thaw sek sek a. A sama a shampoo rim leh a perfume rimte chu rimtui ka ti em em a. Ka ban chu a lo kham rei hle tawh ni tur a ni, a kham ut ut tawh a. Zawitein ka ban chu pawtchhuakin min kuahna a kut veilam pawh chu dahthlak sakin ka tho va.
Dar zat ka en a, zing dar 7 a lo ri dawn tawh. Bathroom-ah ka lut nghal a. Bathroom aṭanga ka chhuah leh hnu pawh chuan tui takin a lo la muhil a. Ka inhruk hul hnu chuan, ' Eng nge a an tawh ang le ' tiin a bulah chuan zawitein ka ṭhu a. Khawena a hmel ka hmuh chian chuan hmeichhe hmelṭha tak, kum 20 vel hmelpu a lo ni. A KS nihna ka hmuh len em avangin ka lo hmu khawlo laklawh a, a hmelṭhatna ka hmuhkân a lo ni. ' Engati nge hetianga hmelṭha ni si hi inzuar tura a chhuah mai mai le ? ' tiin inzuar mai mai tur chuan ka lo ui ve ringawt a ni.
Chutia amah en a thil ka lo ngaihtuah lai chuan a lo harh a. A bula ṭhu reng min hmu chu mak a tih hmel leh em em a. Nizan lam thil thleng theihnghilhin an ina mua harh leh angah a inngai pawh a ni mah na. " I zia deuh tawh em ? " ka lo ti vat a. " Nizan i bulah ka riak em ni ? Min mutpui em ni ? " hlauhthawn hmel takin a lo ti vat a. " I bulah ka mu ringawt alawm. Engmah ka ti lo. Nizan i dam lova, " ka ti a. Ka sawi lai chuan a lo tho nghal a. " Ka lu a na em mai, ka mu leh lawk dawn, " tiin a mu lehnghal a. " Engtin nge kan tih ang le ? I na chhawkna hi lu naa ei chi a ni em ? " ka ti a. " Ka bag ami kha maw ? " a lo ti a. " Aw, nizan i khua a sikin vawihnih ka eitir che a, " ka ti a. " Ka khua a sika ka ei ṭhin a ni a. Ka lu nat chuan ka ei ngai lo, " a lo ti a. " I damlo ṭhin em ni ? " ka ti a. " Um, ka khawsik hi a chhuak leh ṭhin a, " a lo ti a. " I inentir tawh em ? " ka ti leh a. Mi chhang tawh lo. A inlukhup leh daih a.
" Ṭhiannu, civil-ah kan kal dawn em ni ang ? Inentir i ngai a ni, " ka ti a. Mi chhang tawh dawn lo emaw ka tih hnuah, " A ngai lo, ka ṭha veleh mai ang, " a lo ti a. " I damlo ṭhin ang khan i sawi si a, inentir a ngai alawm. Tho la, ka kalpui dawn che nia, " ka ti leh a. Muangchangin a lo tho a. Ka towel pein bathroom lamah a lut a.
Bathroom aṭanga a lo chhuah pah chuan, " Ṭhianpa, ka chunga i ṭhatna avangin ka lawm lutuk aw. Inentir tur chuan kal lo mai ang. Ka haw vat a ngai a ni, " a lo ti a. " I inentir zawhah i haw tlang nghal mai dawn alawm, " ka ti a. " Ka fanu ka hruai vat a ngai, " a lo ti a. " Fa i nei tawh maw ? Khawiah nge a awm, khawia hruai tur nge ? " ka lo ti vat a. " Nizan ka ṭhiannute bulah ka kalsan a, " a lo ti a. Chutiang lam chu zawh zel chi nia ka hriat loh avangin, " Inentir chhung a rei nang. I inentir zawhah i kal dawn nia. Keipawh ka hawna tur ticket man pek ka ngai a, MC lamah ka kal tho a ngai. Ka lo kalpui nghal dawn che nia. Damloh chuan a zual tak tak hmain inentir vat a ṭha, " ka ti a.
A hnai tho bawk a, kein kan phei a. Pathian khawngaihna azarah ka hrisel ṭhain damdawiin hrim hrim hi ka lut ngai lo va, ka inentir ngai hek lo. Civil kan thlen chuan khawiah nge an inentir ṭhin tih pawh ka hre lo. Ka ṭhiannu pawh chuan a lo hre bik lo. Casulaty-ah chuan ka luhpui tawp a. " Ka pu, hei ka ṭhiannu hi a khua a sik ṭhin a. Nizan pawh a khawsik a sang leh hle a. Inentir vat ṭhain kan hria a. Engtikah nge, khawiah nge an inentir ṭhin tih pawh kan hre lo, 'tah hian kan lo lut tawp mai a ni, " tiin casualty-a pa pakhat lo ṭhu chu ka bia a.
Chupa chu doctor a lo ni a. Pa fel leh tlawmngai tak a lo ni. " A lo nih chu maw le. Khatah khan lo ṭhu lawk ula, ka thiltih lai hi ka'n zo phawt ang a, ka lo en dawn nia aw, " a lo ti a.
Damdawi a chawh anga a tawk mai turah ka lo ngai kha a ni a. Mahse ka ṭhiannu chu a lo typhoid a, admit tura tih a ni.
Pawnah chuan kan ding a. " A ngai lo. Damdawi ka ei ang a ka ṭha leh mai dawn alawm, " tiin admit nih chu a duh tlat lo va. " Doctor-in in admit tura a tih che chuan in admit ngei a ṭha. Lungngai suh, ka buaipui ang che, " ka ti a. A awmdan leh ṭawngkam vel aṭangin damdawiina awmna tur pawisa a nei lo va, chumi avang chuan admit nih chu a duhlo tih ka hria. Tin, KS hial a nih avang chuan chhungte a neilo emaw, lo nei pawh ni tehreng se an ngaihsak dawn lo tih ka ring bawk a ni. Chuti ang a nih avang chuan a chhungte chanchin pawh zawt lovin keiman ka buaipui tur thu ka sawi ta zawk a ni.
Chutih lai chuan nurse pakhat hian khumawl a awm thu leh kan luh nghal theih thu a lo sawi a. " Kha le, chho ang le, " ka ti a. A hrehin ka lakah a inthlahrung hle tih a hmelah a lang. " I phone kha ka lo hmang lawk thei ang em ? " a lo ti a. " Hmang thei e, kha hmang rawh, hmang rawh, " tiin ka phone chu ka pe vat a.
" U Kim, keimah Zualtei, bawihtei eng nge a tih ? Min lam em ? " a ti a. A ṭhiannu chuan thil a lo zawt ve nual ni tur a ni. " Nakinah kan sawi dawn nia. U Kim, damdawiinah chuan ka lut dawn. Khawngaih takin puan sin tur min lo pe mai thei ang em ? Bawihtei lo hruai bawk la. Aw, aw, female ward khum no 14-ah ka lo awm ang. Aw le, ka lawm lutuk e, " tiin phone chu a dah a. Phone min pek pah chuan, " Ka ṭhiannu ka bia a, a lo kal dawn. I chungah ka lawm lutuk aw. Min kalsan tawh mai rawh, ticket te i lak duh kha, " a lo ti a. " Ticket lak chu a hmanhmawh thlak hleinem. I awmna turah chuan chho phawt ang, " tiin a awmna tur lamah chuan kan chho a.
Female ward-ah chuan damlo engemaw zat an lo awm a. Chutia ka pian tirh ata a ṭumkhatnan damdawiin ka lut chuan hriselna hlutzia leh man tamzia min hriatchhuahtir a. Ringtute kan hunpui ber krismas dawn tawha damdawiina la awm tlat hrehawm tur zia pawh ka hrethiam a ni.
A khum turah chuan ka muttir a. Damdawiin puan chu ka sintir bawk a. " Eng nge i ei châk ? I ril te pawh a ṭam ve tawh ang. I damdawi tur lei pahin ei tur ka leisak ang che, " ka ti a. " A ngai lo. Engmah lei a ngai lo. Ka awmna tur thleng min hruai tawh a, min hawsan tawh rawh, " a lo ti a. " Hei, chutiang sawi tawh suh. I inthlahrung a ni mai thei a. Inthlahrun a ngai reng reng lo. Eng nge i ei châk, damdawi lei tur chuan ka chhuak dawn a nia, " ka ti a. " Engmah lei a ngai lo. Ka ṭhiannu a lo thleng ang a, ama'n a lei mai ang. Min hawsan duh lo a nih chuan tikhan ka bulah ṭhu rih mai rawh, " a lo ti a. Engmah sawi lovin a kuta doctor-in damdawi a chawh chu lain ka chhuak a.
Damdawi man chu ka rin aiin a lo to hlawm a. Ka hawna tur ticket man tur leh secondhand kawrlum bazar nan ka tih, ka pawisa pai lai a zo ṭep a ni. Momo ka lei bawk a.
Damdawi leh momo nen ka lo lut leh chu min en duh hle a. " A khum bul ka thlen chuan, " Engmah lei a ngai lo ka tih kha, " a lo ti a. " Nurse ka hrilh tawh a, drip hi a lo khai ang che. Momo ei ang aw. Damdawi i ei a ngai awm si a, pum ruaka ei a ṭha lovang, " tiin momo chu a khumah dahin kei chuan ka ei nghal a. " Ei ve rawh. Ka barh ngam lo che a nia. Mi an tam si, " ka ti a. Ka thusawi chuan a nuih a tiza ve deuh ni tur a ni. Za vak lovin a nui a. A nui hmel a hmuhnawm hle. Momo kan ei lai chuan nurse pakhat lo kalin drip chu a khai nghal a.
Zing dar 10 dawnah nu pakhat hi naupang pakhat hruaiin a lo lut a. Ka rin angin a ṭhiannu chu a ni. Naupang pawh chu a fanu a lo ni a. Chu naupang chu kum 2/3 vel a nih ka ring. Hmeichhe naupang hmelṭha tak a ni. A nu a hmuh rual chuan, "A nu" tiin a pan nghal vat a. A nu chuan, " Bawihte, lo kal rawh, ka bulah lo mu ve rawh, " tiin a bulah chuan a muttir nghal a. Chutih lai chuan a ṭhiannu chuan, " Chaw i la ei lovang ti raw ? Chaw ka rawn kensak che a. Ei nghal rawh aw, " a lo ti a. " Momo ka ei a, ka ril pawh a ṭam lo, " tiin a lo chhang a. " I puar lovang, ei leh rawh, " ka lo ti vat a.
A ṭhiannu chuan chaw chu a lo siam sak a. " Lo ei ve rawh, " mi lo ti a. " Aih, ei rawh u. Ka ril ṭam lo, " ka ti tlat a. A fanu nen chuan chaw chu an ei a. A ṭhiannu a lo thlen tâkah chuan ticket man te ka pek vat a ngai si a tiin, " Ṭhiannu, hei i ṭhiannu a lo thleng tawh bawk a, ka lo va chhuahsan tawh ang che u. Kalna tur dang ka nei bawk si a. I lo dam zel dawn nia. Kan la inhmu leh dawn nia, " tiin ka ding nghal a. " Aw, aw le. Ṭhianpa, ka lawm lutuk aw. Tluang takin i haw dawn nia, " min lo ti a.
Tichuan, chhuahna lam chu ka pan nghal a. Ka chhuah fel dawn, kawngka ka pel dawn chuan ka hawi let a. A ṭhiannu nen chuan min lo la en reng a. Engmah sawi lovin hawiletin ka kal ta zel a. Engvang teh kher nge ni, chu KS chu ka ngaina ṭan niin ka inhria a. Inpawhin inbe tam lo mah ila, a bula awm kha nuam ka ti a, a buaipui kha ka la kham lo va, ka hawsan mai tur chu ka ui a ni. Mahse KS ka ngaina dawn tlata ka inhriatna chuan min inthiamlohtir a. A chhan chu tlangval felah ka in ngai ve ṭhin a. Khawmite pawhin fel tia an sawi ṭhin ka ni ve. Chutiang a nih mek laiin KS berkher ka ngaina tlat mai chu dik dawn lova ka hriat vang a ni. Mahse lo ngaina pawh ni ila, ka hawsan tawh dawn tho a tiin inthiamlohna tur a awm lo ka ti leh a. Ṭanpui a mamawh em em laia ka ṭanpui theih vang erawhin ka lawm a ni. (A sei ve phian mai a, ṭhen dangin ni khat danah ka rawn dah leh zel ang. )
Youtube lamah audio-in ka dah bawk. A ngaithla duh tan.
Ziaktu: By - JH Davies Tlangthan
Post a Comment