Contact Form

Name

Email *

Message *

Iklan

R. Lalremruata (Parema L.) Hla PHU LOH HMANGAIHNA

ToMZ
9 Dec 2019, Monday, December 09, 2019 IST
"Batna lehkha thupeka ziak, kan chunga awm, min dodal țhina chu a thai bo tawh si a: chu ngei chu kraws-a khengbetin a la kiang ta a," Kol. 2 : 14. 

"Phu lo hmangaihna" tih hla hi Mizoram leh ram pawn Zo hnahthlak awm tawhnaah chuan sak hlawh pawl tak a ni a, hre lo kan tam vak awm lo e. He hla hi Pathianin mal a sawm a, hla sak nuam pawl tak a ni. 

Phuahtu pian leh murna : He hla phuahtu R. Lalremruata (L) (Parema tia hriat lar zawk) hi April ni 6, 1969, Easter Sunday zing lamah Haflong, Assamah a piang a. A pa R. Thansanga niin a nu hi Lalrintluangi a ni a, pianpui unau pathum a nei bawk. May ni 18, 1993 khan Rozikpuii nen Khatla Kohhranah an innei a ni. 

A leiah cancer hmuhchhuah a ni : Zirna lamah B. Tech. (Mechanical) a zir zawh hnuin a sumdawng a. Delhi Mizo Inkhawm buatsaih Spring Fest - 2013 hmanga rawngbawl turin Upa C. Ngurthantluanga nen sawm an ni a. Thlawhtheihna ticket pawh Parema hian a kawl thlap tawh lai chuan  a lei (tongue) cancer hmuhchhuah a ni a. He natna hi a thihpui ta a ni. Upa C. Ngurthantluanga chuan, "Parema nun hi cancer hian a tinghing miah loin ka hria," a ti hial a ni. A rinna a chakin a entawntlak hle mai. 

Hla phuahah talent a dawng :  Pathian hian a rawng bawl turin mi felte chauh thlang lo va mi sual berte pawh a thlanzia hi a hmu fiah hle. Hla lama Pathianin talent a pek hi rawngbawlnaa a talent dawn hlu ber niin a ngai. Kum 2007 ațangin hla a dawng țan a, a hla phuah hi zaipawl hrang hrang leh mi mal zaithiam tak takten an sa a; Zoram bakah Mizo țawng hmang khawvel hmun hrang hrang a mite sak lar leh duh an ni hlawm. 


Hla phuah ni : "Phu loh hmangaihna" tih hla hi Parema'n March ni 25, 2007 zan dar 10 : 00 vela a phuah a ni a, a hla dawn (phuah) pangana a ni. 

Parema hlateHla lo pian dan : He hla hi Chhinga Veng Presbyterian Kohhranah "The Kneeling Ministry-in Crusade an nei a. Inkhawm ban chuan dawhkan kila a țhu chu  Sapțawngin, "Jesus, take me to the Cross so I can find my way back home" tih hi a thinlungah chuan a ri tlut tlut mai a. Isua kraws phatsan țhintu mi sual nung tlak lo, a rawngbawlnaah pawh pen chhuak țha peih lo a nih leh kraws kal tlanga chhandam a nih thu te chu a ngaihtuah a, a hlutzia leh ropuizia Pathianin a tharin a rawn hriat nawntir leh a; Lalpa  kraws pu lai, an kilh lai te leh amah avanga hlinglukhum a khum lai te kha he hla a dawn lai hian a mitthlaah langin, Passion of Christ film te a lang a. Mi sual ber khenbehna kraws chu a chan tur a nih laiin kraws chu Lal Isuan a put sakte leh lallukhum a khum ve theih nan a aia hlinglukhum a khum tak te, sual vanga kilhna thirkhena an khenbeh  te, kraws-a a sual fai nana a thisen luang chhuak te chuan a tharin a hneh em em a, hetih lai hi chuan Pathian hmangaihnaah hian a tui ral zo a ni deuh ber mai. 

Hla satu tur a dil :  Dan rual lohin a biangah  mittui a luang zawih zawih mai a. "Ka awm dan hi sawi pawh ka sawifiah thiam lo a ni ber mai e," a ti. Pathian hnenah a țawngțai a, "Lalpa he hla hi i ropuina tur a nih chuan a satu tur pawh min pe la, a nih loh chuan min thuhruk sak ang che," tiin. 

Hla sak lar saktu tur an lo kal :  A hla satu tur a dil tukah chuan  Remruata leh Malsawmtluanga (Mama) te chu an inah an lo kal a, an zir ho ta a; an zirho lai pawhin Pathian Thlarauvin a pawl nasa hle a ni. Remruata leh Malsawmtluanga hian sa chhuak hmasatu zawk nih an han inchuh deuh rap rap a, naupang zawk tiin Remruata chuan a kian ta a ni. Malsawmtluangan he hla mipui hriata a han sa chhuak hi, a aw a țha bawk nen, thinlung leh tihtak zeta sa a ni bawka; Zoram khawvelah țhalai mai ni lovin nu leh pa ten Pathian hnena inhlan tharna atan an hla sak duh ber zingah  a tel nghal thuai a; a satu pawh hian a lar phah hle a ni. "Sual vangin hliam tuar mah ila, phu loh hmangaihna avanga damna min petu Lalpa chu chawimawiin awm rawh se," a ti a ni. Mizoram Synod Choir leh Felina Lalremruati  te hi he hla sa lartu dangte an ni.  


Hla thluk siamtu : He hla mawi taka a thluk siamtu chu Lalremruata (Remruata) a ni. 

    Hla thu
Ka Lalpan tuihal dangcharin, 
Ka kraws puin hlinglukhum nen;
Kalvari tlang panin a kal. 

Ka Lal Kraws-a khengbettu kha, 
Kilhna thirkhen mai ni lovin;
Keimah min hmangaih vang a ni. 

Thunawn
Phu loh hmangaihna chu, 
Kraws kaltlangin ka lo chang ta si;
Kei pawh nunna Kraws min hruai thleng ta,
Ka haw kawng ka bo tawh lo vang. 

Hmangaihna chu Kraws kaltlangin, 
A lo luang lut ka thinlungah; 
A thisenah ka lo fai ta.

Lallukhum ka lo neih theih nan, Nangin hlinglukhum i khum si;  I hmangaihna a va hlu em" 

Bchhangte klsb vthr
Source : Hla Lar 110 Vol. I
By V.L. Luaha Renthlei
Visitor's Voice

Click to Comment

No comments:

Mizo Nula Khal

+