THUHMA
PASALTHA LIANZIKA CHANCHIN

Pasaltha Lianzika thawnthu hi, mi pakhat chanchin behchhana ka ziah a ni a, khaw hming leh mihring hming erawh hi chu, kan khua leh a chhehvela ram hming ka hmang thung a ni. Mizote zinga damrei ber nihna hauhtu Pu Lianzika, Mualpheng pa hi kum 111 lai a dam a, sawidan thenkhatah phei chuan kum 115 a ni e anti bawk a. A thlanlungah erawh chuan kum 111 hi a tu leh faten an ziah dan a ni thung. Amah hi Lal sadawt niin, a hriselna hi a tha rei hle a, a mitin khua ahmuh tawh loh hnua a chaw ei lai hi naupang ho hian hmuhnawm ti takin kan en thin a, chawhmeh chi hrang hrang an chhawp teuh pawhin, an hunna lai vawikhat an hrilh tawh chuan hrilh nawn angai tawh lo, a ban dik chat chat thin a ni. Tichuan, he thawnthu hi amah hriatreng nan leh a hming daih loh nan tiin, pasaltha pakhat chanchin hmangin a hming hi ka dah ta a. Mizorama Lal ban anih thlenga Mualpheng Lal hnunung ber ni ta Sailo Lal Hrangkunga hming tepawh ka tarlang bawk a. Amaherawhchu, anmahni chanchin tak tak leh an erawh chu ka tarlang vek lem lo thung. An hming daih loh nan a ni e.

Thawnthu hrim hrim hi ka ziak ngai lova, Amaherawhchu, midangte tana nun thap ngam, hlauh neilo leh thih pawh hlau lo ang hiala kan ngaihte hi, lungngaia kun ve thin leh mittui pawh nei ve tho an ni a, chu an chaklohna lai chu chhel tak leh dawhthei takin an tuarchhuak thin zawk a ni tih hi ngawih bopui atan chuan a pamhmai katih avangin, insit tak chungin ka ziakfung ka lek ve chawt a ni ber e.



THEN 1 NA

Ni chuan vanlaizawlah hliahtu leh khuhtu awm lovin ro a rel mek a, hawina lam apiang chu a thiang kuk mai a. Rallehlam muala Laiking bel rawh khu deuh chem chem tih mai loh chu thil danglam tehchiam hmuh tur a awm lo, Chunglama Muvanlai thlawk kual delh delh pawh chu a riltam vang nge a lunglen vang tih hriat har tak hian a hram lauh lauh reng bawk a.

Chutihlai chuan Thlan tlang mualdung sahmul then, kawng mumal pawh awm lovah chuan mi zahthum chuang zet tur hi in phur bawr luk chungin an inzui duah duah a. Mahni tawkah an bawr hle hlawm a, Patling ho chuan bawmrang phur chungin fei leh silai an hum deuh fur a, nuho erawh chu Dawrawn phur chunga naupang kai mek te, thenkhat em phur chunga nausen hmathlaka hnute lo hnektir mawlh mawlh te nen, a pui a nawiin chulai tlangdungah chuan an inzui ngiah ngiah a. Mahni tawkah an bawrin an rit tlang hle a, Mahse, khawthar kai tur an ni bawk a, an phur hmel hlawm hle thung a ni. Hetih hunlai hian khawthar kai hi an awlsam viau mai a, an awmna khua kha ral lakah a him tawk lo emaw, an tui tlan kha an duhthu asam tawk loh vang ringawt pawhin hmunhma nuam leh tui hniang hnar deuhna hmun, thlawhhma neihna tura hmun remchang deuh an hmuh chuan a khaw pum hian an pem tawp zel mai a ni. Hei hi khawthar kai anti a.
He khua pawh hi an Lal Hrangkunga, Sailo Lal kaihhruainaa inbawk hrang hlim hlawt an ni a, an duhthusam hmunhma an hmuh mai loh avangin hmun remchang laia in bawk vel mai mai an ni bawk a, khaw hming mumal tak pawh anla inphuah hleithei lo a ni. Tuna an khawthar kai tumna lai erawh hi chu awm rengna tlak niin an hria a, khaw thenawm hnaivai lutuk an neih dawn loh bakah, a tlang asang thain, ral lakah pawh him turah an ngai a, tuihna tha tak awm bakah, kham chhengchhe lutuk awm lo leh, mualrem parh tha tak anih avangin an thlah kal zel thleng pawha inzar pharh nan duhthusam niin an hria a ni chek ang chu. Ni khatah an ban hman dawn lo tih inhre chung pawha an pan vang vang duh tlat mai hi, chhan tha tak zawng a awm a ni chek ang.

Mahni tawka inphur bawr luk mai leh naupang nawi nen annih avangin an kal sawt hleithei lova. Chulai tlangdung chu an han her liam a, tlak lamah in awi chho zelin, tlangsang lam pan chuan an her chho ta hret hret a. An khaw Pasaltha Thangkhuma leh a thiante pathum chuan hma an hruaiin, iptepui puar luaha ak chungin chempui an lek far mai a, anni ho hi tuna an khawthar kai tumna han hmuchhuaktu pawh hi anni nghe nghe a, Sairam chhuaka an riahna hmun vel chu tui hna a that mai bakah, a hmun a rem avangin khawthar kai nan an it viau mai a. An ramvah hawa an Lal Hrangkunga bula an han sawi chu, an Lalpa pawh chu alo phur hle a, khawnbawl upa teho nen inrawn khawm nghalin, a rang lama khawthar kai chu an rel ta chuk chuk kha a ni a. A khaw hmun tur lai tak hi phul anih avangin, thing ding atam loh avangin khawthar sat tura a hrana thawhchhuah ngailo turah an ngai a, chuvangin nunau nen an thawkchhuak nghal rup pawh a ni reng a. Kawng awm lo, ngaw kara kal annih avangin an hnunglama nunau rawn kalte tana kal awlsam turin pik bawn deuh leh kai remlo lai deuh chu an sat kaw zung zung a. An lian tlangin an zam a tha bawk a. Nunau ho nena an inkar pawh hlam sawm zetin a daidang a. An hnunga nunau rawn inzui duah duah zingah chuan mipa naupang fel tawh tak Lianzika pawh a tel ve a, a biang te chu atai hlar tawh mai a, mahse phunnawi lo leh thuawih takin a nu hnamhrui hmawr uai vuan chung chuan a kal ve hnak hnak zel a. An khua an chhuahsan tirh atanga a hmuh tawh, sava sen nalh deuh mai chuan a zui zel niin a hria a. A khat tawkin a hmu leh thin a. Mahse, naupang rilru tluangtlam tih takah, ngaihthat lohna emaw pawh nei chuang lovin a ngaihven em em hran lova, an khawthar tur chu thlen thuai thuai a, a thiante nena inkawi hnawk vel mai mai chu a chak ber a ni mai a.

Nakinah chuan tlangchhip an chuang chhuak ta a. Ngaw hnuai thelh hun mai leh zawl rai dup mai alo ni a. A bul maiah chuan kawrte tui fim tha tak a awm bawk nen, an chau tlang deuh tawh bawk a, chulaiah chuan zan riah an rel a, an in nghak khawm ta a. Changel buk lo zar tawk an awm a, a thenin tlai chawhmeh tur an zawng bawk a. Naupang thenkhat riltam lo tap tawk awm bawk nen, an chiarin an chiar nuk nuk mai a ni.

Khawthim hmaa zanriah chaw peih hman ngei tumin an phak tawk theuhah an phe vat vat hlawm a. Ni tla tur pawh suk chen vel awrh a nita tihah chuan zanriah chu an peih ta a. Naupang chiar nuaih nuaih karah chuan an Lalpa Hrangkunga chu a rawn ding chhuak a, "Khai le, ka khua leh tui te u, in chauvin, in rilpawh atam tawh hlawm viauin ka ring a, kan awm zel dan tur tlem ka'n sawi anga, Zanriahte eiin kan hahchawl dawn nia." a han ti a. Mipui ri nuk nuk pawh chu an reh nghal duak a, an ngawi ta thap a.
Lalpa bawk chuan, "Helai hmunah hian zan kan riak dawn a ni a. Nunau leh naupang, hmeichhia leh tar chak lo zawng kha bukah hian an riak ang a. Paho leh tlangval hote erawh chu buk sir kual velah hian a remchan dan ang angin kan riak ang. Chu chu sa leh ral laka kan him tlan nan a ni e. Tichuan naktuk zing hma takah kan chhuak leh ang a, kan khawthar kaina tur pawh chawhma kal bak a ni tawh lova, engpawhnise, tlangval ho khan zanriah kha han buatsaih ula, puar takin ei phawt mai teh ang u" a han tih zawh chuan an ri zui leh ta mam mam a. Chaw an eikham fel chuan an mutbu te phawrhin mutna tur an siam sang sang a, upaho chuan an riahna tur hmun vel chu an thian a, Tuibur leh sawhthing seh sawm chu buk sir velah chuan an han phuh that that a, hei hi Rul leh thosi laka an invenna a ni a. Rannung tur nei chi hrim hrim hian Tuibur leh sawhthing hi an duh lo hle a. Chu chu hriain, an muthilh hlana anmahni ti na thei tur lakah an in veng ve thin a ni.

An chau tlang bawk a, kar lovah an mu reh ta duak a, a then phei chu an hnar bawrh bawrh a, An khaw Pasaltha Thangkhuma leh a thiante erawhchu, meipui bulah chuan an la thu far hlawm a, a ruk tak chuan an mut chu chhuak ve viau mahse, engemaw rikrum thila mipui nunau ven chu an mawh niin an hria a, an la meng rih a ni. Thangkhuma chuan, "Hetia kan pali a tlaivar ngawt ai chuan in mut chhawk teh ang u, naktuk lam kan kalna tur ala thui si a, kan chau lutuk ange, Hnuna, Laia nen khan va mu hmasa ula, Chala nen hian kan meng rih ange, zanlaiah min rawn thlak dawn nia" a han ti a. Laia chuan, " Zankhat tlaivar mai mai te chu han chauhpui thu va awm suh.. ti hian meng ho dial dial ang u, kan mut a chhuah viau tak leh, meipui bulah hian kan tluzal mai dawn nia" alo ti ve a.

Anni thianho hi an khaw kulhpui leh kawng engkima an hmachhuan an ni a. Nunau ho pawh hian an thlamuanpui viau bawk a ni. An tuarchhelin an huaisen tlang a, engpawh ti se, phur tak leh tha tho takin an hmaa tla chu hlen mai zel a. An Lal pawh hian an hming hi alam deuh reng a. Sa kap thei tak annih mai bakah hian, khawchhung inrelbawlna lamah pawh an tangkai viau hlawm a. Valupa lam anni tawh bawk nen, an khaw mipuite pawh hian an zahin an thu leh hla pawh hi an ngaichang viau thin reng a. Tuna an khawthar kaina tur pawh hi, anmahni chiah hi ahmunhma han hmu chu an ni mai a. A ram leilung leh tuihna awmdan atangin, khaw lian tak pawh awm theihna tur nia an hriat thu an Lal hnena an hrilh khan, an Lalpa pawhin i he lovin alo remti ve mai bawk a, a ring tawk hle hlawm a ni.

Chutah Laia chuan, "Ni e, a tul tak leh kan muthlu lawp lawp ang a a ni mai.. Mahse, Hnuna hi chu nghenchhan rem deuh laiah khan awm se a tha ang...a muthlu hi alum bo daih chuan kan buai dawn emai, lum khut khut hi a hrat riau mai a" ahan ti fiamthu pah a. Hnuna pawh chu alo nui ve suk a, pa tawng tlem tih takah a thiante titi kara lo khik suk hi a duhtawk viau thin a. Hei vang hian an awmkhawm tawh hi chuan fiamthua sawisak pawh a hlawh deuh bik a, amah hi tawngtlem viau e tilo chuan, phawk ru angreng tak, fiam dawl zet mai alo ni bawk nen, a tello hi chuan a kalh a kimlo hian an hre tlat thin reng a ni...

Tum khat pawh, Thangkhuma savawm kah hliam an beih tumin, Savawm chu pukah a lut a, a huk dum dum reng a. A inhrosa nasa mai si a. Hnuna chuan, "Keini'n silai kan keng a, kan tam zawk bawk si, Savawm saw chuan a tin leh a ha bak hmanrua a nei lova, a hliam tawh bawk nen, chuvangin kan silai hi dah ila, chempui nen iva luhchhuak teh ang u" ati mauh mai a. An zinga tawng tlem ber leh thiante thu hla ngaichang ber thinin chutia a han rawt mauh mai chu, tih hlawhtlin ngei tha anti tlang a. An silai leh iptepui dahin, chemtum nen chuan Savawm awmna lam chu an pan phei ta a. Puk kotlang an va thlen chuan Hnuna chuan, "A rawtchhuaktu nih manah hma kan hruai ange" tih leh puka luh chu a rual ta a. Savawm pawh chu a kawtawpa tang tih takah, huk dum dum chung chuan alo inring ve nasa mai a, a naka Thangkhuma kahna atanga thisen lo chhuak chu aliak zauh zauh bawk a. Chutia Puk kawngkaa Hnuna rawn dak a hmuh chuan rang takin a rawn thochhuak a, huk tuarh tuarh chung chuan a rawn bawh phei ta mai a.

Savawm tawmna puk hi a len vakloh avangin mi pali tan chuan a ruala bawh theih pawh a ni lova, Hnuna thiante pawh chu Puk kotlangah chuan anlo inring ve ran a. Chutia Savawmin a rawn bawh thut chu Hnuna chuan achempui chuan alo sat nghek mai a. Mahse, savawm hliam thinrim chuan a kut chuan a rawn hai a, a banpuam veilamah chuan na zet hian a beng fuh ta a. puk pawn lamah chuan a lir chhuak hlawl mai a, a thiante pawh chuan chutia chemtum nena Hnuna rawn lum chhuak lai chu, lo thlir mai loh chu tih theih nei hek lo. Chala phei chu a nuih aza tlat mai a. "Thianpa Hnun, rin aiin a tha a tha elaw" tih paha nui vur vur chungin Hnuna chu kaithawh a han tum a. Chutia Hnuna rawn tluchhuak bawhzui tuma Savawm rawn dakchhuak chu Thangkhuma leh Laia chuan an bawh phei ve ta nghal a, an sat ri sawk sawk mai a, Savawm hliam pawh chuan, chuti taka chempui nena hlauhna tel miah lova amah beitute chu a beilet ngam ta lova, insaseng tumin puk kil lam a chuh ta, anni chuan  bawhzui zelin, an sathlum ta nge nge a.

Hnuna chuan a dar chu hit deuh mup hian a hria a, hmunhnih velah chuan Savawm hamna chu thuk vaklo hian a kak a, a thichhuak tur chu Chala chuan hup sakin, Tlangsam hnah chu a'n nuaisawm nawk nawk a, a bel sak ta a. Chala chuan, "Thianpa i tha maw, ka rin aiin ilo lum duh phian mai.. lo dang lo phei che ila chuan, khulai kawr khu chu ilum thleng thei dawn anih kha le" nui chung hian a'nti leh hram a. Thangkhuma tepawh chu anlo nui ve hawk hawk a. Hnuna chuan, "Ngawi mai mai teh, nang phei chu ni la, ral lehlam mual saw i lum kai hialin ka ring, a kutthlak kha ana emai.. kei kalo ni hlauh zawk a" nui vur vur chung chuan alo ti ve a. Heta hnuna puk atanga a rawn tlu chhuak hi, Chala hian fiamthu nan tak hmangin a sawi uar lui a, "Inchhung dung chen zet hi a rawn lum phei a" ati kher thin a. A tawng tlem zawk ta na na na chuan chhan ngaihna hre hek lo le, an han sawi nikhua pawh hian a ni awm vel ve mai mai thin a ni.


Chutia meilum ai paha hlim taka an titi lai chuan khua pawh alo eng tan ta a, leilung a lang tan tihah chuan an han zi mar ar ar a, Nunau ho tukthuan ei tur leh chawfun tur siam chuan an che leh ta sang sang a. Midang anlo thawh meuh chuan tukthuan anlo peih diam tawhin, la mutui fal deuh thenkhat pawh chu hma taka chhuah an duh avangin an han kaitho nawk nawk a, thawhphan pawh sawi lovin an puanthuah leh bungrua te chu phurh mai theih turin an siam nghal mam mam a, Tukthuan hma taka eiin an tum ram lampan chuan an inzui leh ta diah diah a.

Chhun chawfak hun velah chuan an khaw thar kaina tur chu a lang ta a, an rallehlam maia mualdung inkham chhip lama, ngaw kara phul zau tha zet mai chu an han inkawhhmuh nak nak a, a ram a rem tha bawk a. A tlang a sang tha a, tuihna a that tho bawk avangin Ral lakah pawh him hle turah an ngai a ni. Chulai hmunah chuan innghah khawm pahin an han ding det a, an dinna hmun chu nakin hnua Pasaltha ramchhuak hlawhtling ten tlang an tlira, hlado an chham vau vauna hmun tur a ni tih lam reng an ngaihtuah phak lova, an thlante a daih deuh hnu chuan an khaw thar tur lamah chuan phur takin an in awi chho leh ta hlawm a.

Khawthar an kai hian an Lal in tur hi hmun laili leh ualau lai, mual thalai takah an sa phawt a, chutah Lal in hnaivai ah chuan Lal khawnbawl te chenna tur an sa leh a, Hei hi "Lal Mualkil" tih tawngkam lo chhuahna pawh hi anih hmel. Tichuan, tlangval ho riah khawmna tur Zawlbuk chu Lal in hnaih deuh ah, kawt zawlzau tha tak awm thei turin an sa leh a, Zawlbuk kawtzawl leh Lal in kawtzawl hi khawtlang chetvelna, inkoh khawmna hmun, Kût ni vangthla an hman tum pawha mipui punkhawmna tur anih avangin, hmun remlai an thlang hram hram thin a ni. Tichuan, mipui nawlpui chu a remchan dan ang angin an inrem fel veleh mai a, Pasaltha leh tlawmngai deuh te chuan khaw hmawr lam an chuh hram hram thin. Sa leh ral lakah pawh khaw hmawr lam hi chu a ralmuang lo lai anih avangin Pasaltha huaisen deuh leh tlawmngai zual deuh tehi khawhmawr lamah an awm thin a ni. Hetih hunlaia an insak kalphung hrim hrim hi, tunlai anga compound neih zau vak hi an ti ve ngai lova, insi deuh khupin an sa a, chu chu ral laka an himna tur atana an invenna chi khat a ni bawk.

Tichuan, an khaw thar tur chu an han vat darh ta a, Nuho leh nula ho chuan a khaw pumin an hman daih zan turin, inchung tur Di anlo sat ve bawk a, Naupang chumchiap tih loh chu mahni phak tawkah an buai mam mam a, upaho lamin a phuar nghehna tur hnang leh chiar hrui anlo hlai vethung a, châk lakna tur a hnaivai bawk a, hun reilote chhungin chenna tur in chu an sa zo thawkhat a, a kumleh lam atana an thlawhhma turte an ngaihtuah nghalin, Khawnbawl upa pakhat chuan, “kan khaw hmun hi a rem em mai a, Van pawh zau takin alang thei a, chuvangin, "Vanzau Khua" kan ni mai e, atih fiamthu chu tha anti hlawm a ni chek ang chu. hmingdang phuah tum talo chuan Vanzau khua an inti ta a ni. Lianzika te chhungkua pawh veng mawnglam deuh ah an awm ve a, apa hi hna hram thawk thei lova a bawhsawp tak avangin, a nu hi a phak ang tawk tawkin a zui ve dat dat thin a, amah hi naupang tirh nuam tak mai, aia upate thu hnial ngailo anih avangin a rualpuite zingah pawh hian mi hriat leh lawm a hlawh bik a, thlawhhma an han tul zual deuh lai te hian tlangval thenkhat chuan, apa hnathawh theih loh hi hriain, "Vawiin chu Lianzika ka rawn lawm teh ang" tiin an lo chu rawn thlawhpui fo thin a, naupang mai e tilo chuan, mi ngainat leh duhsakna hi a dawng tam viau reng a ni.

Hun leh kumte alo vei zel a, Vanzau khua chu khaw nuam leh inlungrual tak an ni zui zel a, khawthar an kai hlim khan in sawmsarih bawr vel lek an ni a, tunah chuan in za anlo chuang ve ta reng mai. A tir lama khawthar kai tum ve lem lo, an chhuahsan tak khua atang tepawh khan engemawzatin an rawn umzui leh hlawm a. Tin, an fate indang thar anlo awm ve zel bawk nen, "Vanzau inza nufa" an inti ve ta hial a ni.

Ngawpui hual vela khawsa tih takah, ral lakah chuan an him fu mai a. Mahse, sahrang leh thilmak tak tak sawi leh hriattur hi an nei ve zut reng a, Sakei pawh an nghal fu mai bawk a. An ranvulh te sehin, mihring pawh sakei laka hliam tuar pahnih khat chu an awm tawh a, nunna chan phah erawh an la awmlo thung. Pasaltha Thangkhuma leh a thiante bakah hian, sa kap ve zeuh zeuh thin pawh an awm nual a, in za nufa lek ni mahse, an awmna hmun ten a zir bawk a, sa kap thei leh huaisen, khawtlang tana thlamuanpui tlak hi an nei ve nual a ni. Lianzika pawh naupang harhvang leh rualkawm thiam tih takah, thian pawh a ngah a. Sava veh leh an khaw bul luidunga chakai khawrhte a ching ve tan ta. Midang aia ze mak dangdai taka sawi tur nilo mahse, mipa naupang rual zingah chuan thil chinchang hria leh tirh nuam tak mai a nihna chuan a rualpuite ngaihsan a hlawhtir viau a, naupang thenkhat dawihzep deuh pawh hian Lianzika bulah chuan thlamuang takin chakai khawrh te hian an kal ve ngam tlat thin a ni. Anni ho ang rual hi chu engemaw thawm ri hlek a mengphawk a, midang tihthaih leh tihthlabar chin hunlai a ni a. "Chu le" tih mai maiah te hian an tlanchhe dul dul a, dawihzep zual deuh thenkhat lahin thilmak deuh deuh anlo hmusual a, an ri chel chul zel mai a. Mahse, hetiang velah hian Lianzika hi a phawklek ve ngailo tlat a, Thing tang tliak ri mai maia athiante an tlanchhiat dur dur lai pawhin, "Engmah anih loh chu, thingtang ro thliin achhem tliak mai mai alawm, kava en chiang ange" tiin thawm awmna lamah tehian a kal mai zel a. A thiante'n, "Hlauh i nei ve miah lo ami? antih pawhin, "Nei ve tho e, mahse, intlanchhiatna hi a hlauhawm loh thei em alawm" ati mai thin a, a tu ate pawh mai hian an ngaina emaw tih mai tur hi a ni. A rualpui tumah asual ngai lova, naupang ta na na na chu, engemaw thu inhmuh fuh loh deuh tum an neih a, thinrim taka an han tih khai khai pawh hian, zangkhai leh dam zet hian achhanglet a, thudang tehi a sawipui daih zel a. A bulah chuan an thinrim rei thei miah lo a ni. Nikhua a rei hret hret a, a rualpui tepawh hian an u en ta tlat a. Amah a chakin a zuan azang bawk a, Luidung an zawh nikhua pawhin ko kai harsa laia a thiante kaichhuaktu ber anih thin avang hian a rualpui tehi chuan an cho loh en a, a bula an awm hian an thla amuang zawk tlat a ni.

Vawikhat pawh an khaw mawng luia chakai an khawrh tumin, Lianzika hovin an khaw naupang pasarih lai mai an inzui thla dam dam a. Hlim taka an rik nawk nawk lai chuan an hmalam lungpui chungah chuan Sakei lian zet mai hi alo bawk vung mai a. A kal hmasa fal deuh ho chu Sakei an hmuh veleh chuan an rawn tlanlet a, an ri ta chel chul mai a, a naupang zual deuh phei chu an tap nghal ringawt mai bawk a. Chutia an rik chul takah chuan Sakei pawh chuan naupang ho lam chu a rawn hawi vung a, mutchhuak ham niawm tak hian a ngho lang vurh hian a ang bui bui a, a rawn en ta kur  mai si a, thenkhat phei chu an khur zawih zawih tawh mai a. Lianzika erawh chuan tlanchhe lovin Sakei chu a en ran a, naupang dang ho chu a hnunglamah chuan an awm thap a, a dawih zual tap mek ho pawh chu Sakei hlauh vang zawk chuan an tap ri tha ngam leh tawh lawi lova, insum tih hriat tak chuan an inhnit faih faih a, a rual u zawk deuhte chuan anlo thlem ve tliar tliar bawk a. "Hawh u, chak deuhin tlanchhia ang u" an han ti a, a lung fing deuh tawh thenkhat chuan," Min umpha vat tho ang, chu ai chuan ti hian awmkhawm tlat ila, min seh ngam lovang" te anti sa sa hlawm a.


Chutah Lianzika chuan, "Tumah tlanchhe suh u, min tihnat pawh atum loh saw, nilum a ai ve aniang, kava hnawt sawn ange" tih pahin lungtum a chhar a, Sakei awmna lamah chuan a kal phei ta a. A thiante chuan, "Kal suh, alo seh ngei ngei ang che" ti a an auh pawh chu hre lo ni awm takin a kal zel a, Sakei pawh chuan chutia lungtum hum chunga alampana naupang lo phei chu tham lo hmelpu deuh hian alo melh kur a, lo hmachhawn tum niawm tak hian Lianzika lam hawi zawng tak chuan a rawn thuchhuak ta a. Chutihlai chuan luikam thingkung atang chuan Sava phakhat hian Sakei chu lo hau ve niawm tak hian alo hram ve zat zat a, a chang leh rak nawk nawk ang deuh tehian a han hram a. Chutihlai chuan Sakei thutna atanga hlamhnih velah chuan Lianzika chu a ding a, aw pangngai tak hian, "Pu a, kalsawn teh, kan kalna tur takah nilum ilo aia, anih loh chuan lung hian i mitah tak khan ka vawm ang" dam thlap hian ahan ti a. Sava pawh chu alo la hram ve zat zat reng a, chutah Sakei chu chhing duar duarin, Lianzika thusawi chu hrethiam ni awm takin kawrkam lung khawkrawk lampan chuan a chho ta zul zul a, a liam dawn chuan a ding det a, a rawn hawilet leh a. Lianzika chuan Sakei en reng chung chuan alungtum kenlai chu paihin, a kut alo bengfai thak thak chu a rawnthlir doh doh a, pik karah chuan a pilbo zui ta a.
Chu veleh rang takin a thiante an rawn tlanphei a, Lianzika chu ngaisang tih hriat tak hian an kuah chung chung hlawm a, pakhat chuan, "Sakei khan a seh che i hlau lo tak tak ami? Mak ti taka en chung hian a han ti a. Lianzika chuan, "Min seh tum nise chuan kan hmuh turin a awm lovang, Sakei chuan a saseh tur chu achang a, a inhmuh hmasak tir ngailo," alo ti niap niap a. Amah aia lian deuh pakhat chuan awihloh hmel deuh hlek hian, "Engtinnge chutiangte i hriat bik a?" a han ti he haw a. Lianzika chuan, "Kapa te thianho kan ina an titi lai hian kalo ngaithla ve thin alawm.. An ramvah dan chanchin an sawi tehi kalo nghaithla ta, a ngaihnawm thei lutuk" ati leh mai a. An zinga naupang deuh pakhat chuan mittui la parawl deuh kuang chuang hian, "Kei chu kapa hian Sakei chanchin min hrilh ve ngai lo reng reng" alo ti ve bawk a. A bula mi chuan, "I pa te chu a ramvak ve ngailo tlat alawm, Lianzika pa te chu sa pawh akah theih em kha, tunah chuan a tar ve deuh tawh a, a ramvak peih tawh lo mai mai alawm" alo ti ve bawk a.

"Hawh u, haw daih ang u, Sakei kha alo kal leh ngei ngei ang" anlo ti ve mek tawk an awm a. Lianzika chuan, "A kalbo tawh kha, alo let tawh lovang, tlem chhukthla leh deuh ila, chakai chu kan khawrh chho dawn nia" alo ti leh a. Naupang pakhat chuan, "Ti hian chhuk pah hian khawrh thla zel ila, kan man tam hunah kan haw mai dawn alawm" alo ti ve lang lang a. Lianzika chuan, " Lui hnar lam atanga kan khawrh chuan tui kan ti nu vek ang a, thlang lampangah chuan tui thuk leh thuk loh pawh kan hre thei tawh dawn lova, chakai awm duhna pawh kan hmu thei lovang, lui mawng lam atanga kan khawrh chuan tuifim kha kan hmalamah zel a awm dawn a" a han ti leh khauh a. A bul ami chuan," i vannei bik e, ipa hian thil a hrilh hnem bik che kati.. kapa hi Pasaltha ni ve se chuan min hrilh ve tho ka ring.." alo ti bai bai a. Tichuan le, Chakai an han khawrh tan a, an zawh tawk lung an han phawk chu, Aifiar lian deuh alo awm chang te hian, "Lianzik.. lo tlan rawh hei alian lutuk, ka man ngamlo ania" anti chul zel mai a. An chakai khawrh hi an tui bawk aniang, Sakei lam pawhin an rilru a luah tawh lo, hlim taka nui khek rawi rawi chungin luidung chu an zawh chho ta zel a, chakai awm ngeia an rinna, an phawh zuam loh deuh an hmuh te chuan an han in au khawm a, "khat hnih thum" an han ti rual that that a, an phawk veleh mai zel bawk a, an ai ip ken pawh apuar lah tawhin, an zinga la nau deuh te chu aiip chu an khai tir a, anlo petek pui ve dat dat bawk nen. Lui an zuk pawhna kai an thlenchhoh meuh chuan an man tam fu tawh a ni, in lama insem turin a rual u chak zawk deuh te chuan ai ip chu an han pu a, an khaw lam pan chuan hlim takin an ri chho ta nak nak a.

Hemi tuma Lianzika'n Sakei a hnawt hi an sawi darh chak viau mai a, Naupang thu hla tih takah an sawi uar deuh nge ni. Vanzau in za nufa lekah chuan a thangchhuak rang kher mai, nu leh pa thenkhat phei chuan an awih lo lek lek a, Mahse, Lianzika mizia an han ngaihtuah chuan thil ni thei niin an hre lawi si. "A pa a chhun dawn anih chu, a pa hi Pasaltha huaisen a ni a, Fapa huaisen a nei anih pawhin a inhmeh viau a ni" ti a, tunhma chanchina lo pakai tawkte an awm a, Lianzika erawh chuan an inchhungah chuan engmah a sawi ve lem lova. a tuk tlailam Behliang mun hun hun velah chuan, Lianzika pa chu an kailawnah chuan tiang hawlin arawn bai haw bauh bauh a, sumhmun a rawn luh pah chuan, "Dengthuam, khawnge Taia hi? thil engemaw zawh duh ka nei asin mawle? a rawn ti lut a. An nu chuan thlanglam chhuara zanriah hmeh tur thlaihnah lo thliar nauh nauh pah chuan " Khawnge alo tei chhuah leh tak ni, inchhungah hian an tawm hman meuh love, khawthim dawnah alo haw veleh mai ang, eng thu nge maw zawh i tum reng reng le? a pawimawh viau chuan kava au dawn em ni? alo ti a. Pu Chalhranga chuan, "Aaaa, pawimawh hran love, nimin an chakai khawrh khan Sapui anlo hmu emaw ni? amah lah khan engmah a sawi si lo, tlangkam atangin kava hria a, ka zawt chiang chak mai mai mawle" ati chuar chuar a. An nu Dengthuami chuan chu thu ahan hriat chuan a thil tih lai dah meuhin, "Sapui a!! kan khua hi sa a tam si a, naupang dai vah tir mai mai hi a him lo asin, ilo phalsak leh ngawt thin a, i kalpui peih loh chuan kaltir tawh reng reng suh" ati zui ta bawrh bawrh a. Ani lah chuan, "A haww... Sapui hmuh te chu thil hlauhawm ni nghal lo chuan, ka zawh duh zawk tak pawh, engtinnge a hnawh sawn dan tawngkam vel ka hre chak mai mai ania" tih pahin a nui hak hak a.

Lianzika nu chuan ala duhtawk thei lo, "Naupang anla nih hi, hlauhawm leh hlauhawm loh pawh anla thliar thiam lova, ilo fuihpawrh ange.. hmanrua engmah an keng bawk silo, lo hau hrep ang che. Naupang hlangin daivah tir tawh reng reng suh" ati zui leh hram a. An pa lah chuan, "I tawng tawh laklawh hi chuan arpui tui zo hlim ang mai hi i nia, i kak chhunzawm char char zel mai, khawinge, zufang te kha min han thlit teh, ka titipui che ata langin, ka dang aro zo ta e.." tih pah chuan, banglai chhunglama a silai tun that chu ava la chhuak a. Kawmchar lam hawi chuan a han tin vang vang a, a la thla a, tapchhak lama an nu thingpui thli mek bulah chuan a silai nen chuan a inhawl phei leh boh boh a.

An nu chuan, "Awi aww... I fapa in sakei a hmuh chu zuk kah i tum deuh nge ni a, Silai te irawn lekchhuah tak mai" nui hawk hawk chung hian alo ti a. Pu Chala chuan thutak zet hian, "Bawiha nu, lung hi zawng aleng a ni, kum lamin min chaldelh vang pawh ni lova hetia ramvak thei lova han tawmsen reng mai chu'h, tun tum kan khawthar kaina ram lah hi sa atam si a, rilru hi chuan ramngaw thelh hun maiah sa hnu thar deuh tehi achhui zut zut reng a, a taka che chhuak tur lahin taksa lamin a tlin silo, han inhliam hlauh lo ila chuan kum li kum nga tehi chu kala ramvak peih ang mawle," tih pah chuan an kawmchar kawngka atanga lang, Mualbung ngawdur chhahpui lam chu a thlir vung vung a.

Chutihlai tak chuan an khaw piah mual tlangchhip vel atang chuan sanghal hlado chham raih raih ri an hriat chuan an titi lai tawp meuhin an beng an han chhi uluk deuh a, hlado chham tawp rual chuan silai a puak dur a, an kawmchhak lamah chuan Pasaltha ramchhuak hlawhtling chhawk tur tlan ri tak tak thawm an hre zui bawk a, Chutah Pu Chala chuan, "Thangkhuma rawl ni tlata ka hriat chu le" ahan ti bauh a. An nu chuan, "Anih chu, tunlai chu Thangkhuma hian sa akap deuh reng mai, a vannei ngawt a ni. A rilru tehi a zau a, a thilphal bawk si, vannei tlak hi a ni ve hrim hrim mai. Keini chhungkua tehi, inlaichinna pawh kan neilo chung hian, i ramvah theih tak loh hi a hriat vang nge ni? Sa akah apiang hian min rawn mun ve ziah mai a, a lawmawm viau rualin, a zah tepawh a zahthlak zaw mah e.." a han ti zui zat a. Pu Chala chuan, "Ni e tiraw, ka ramvah theih lai te kha chuan sa hi kan nghei ngailo kha a ni a, ngawi tak rawh, Taitea hi la naupang deuh mahse, ka sulhnu hi a rawn chhui zel tih ka hria a, rei a ni tawh lovang, he ka silai pawh hi a khawhar rei tawh lo tawp ang,. Thangkhuma te anga Pasaltha hi ala ni ve anga, Khawtlang tana tangkai bawk si, sa kap thei bawk si hi chu an tam lo teh a nia. Thenkhat ramvah hrat ve ringawt hi chu thildangah an chhawr tlak lawi lova, Pasaltha zawmthaw deuh nih tehi thil zahthlak tak a ni... Khaah.. ka silai hi va dah tha leh teh... Taia'n min enkawl chhawk theih hma chuan uluk leh duat tak hian kalo chul ve mai mai tal a niang chu" tih pah chuan a silai chu a han thlek leh vung vung a.


Chutihlai chuan Lianzika khawlai leng pawh paw thual hian arawn tei lut ve nawlh nawlh a. Silai nena apa tapchhaka lo thu ahmuh chuan ding nghal chawtin, "Kapa, ramvah i tum a mi" tih pah chuan apa bulah chuan a rawn thu nghal chat a. Pu Chala chuan, "Eeekhai Taite, tum awkawng lo mai, hetia boruak daia Silai dah reng hi a tha ngai lova, kalo chul hnum e katia, nitin hian ka hrufai thin a, i tlangval huna i hman turin kalo dah tha char char anih hi" ahan ti a. Lianzika chuan apa Silai sei ruang mai chu a han inteh a, "Kapa silai hi ka chen hunah chuan ka ramvah naah ka keng ve thei tawh ang tiraw" tih pah chuan a han thlek vat vat a. Apa chuan, "Tehreng mai, he silai hmang hian sa tam tak ila kap ngei ang, tak ana, nimina in lui kalna ah Sapui inhmu niin an sawi a, Lianzika'n a hnawt sawn e antia..tak tak em ni? a han ti a. Lianzika chuan apa silai la en vat vat chung chuan, "Kan kalna tur takah alo bawk a, Sakei damtha pangngai chuan min tina mai mai ngailo itih kha ka hre reng a, a bulah kava kal a, kalsawn turin ka tia..a fel lutuk, a kalsawn daih, alo let tawh miah lo" ati niah niah a. Pu Chala chuan a fapa chu chhuang taka en vung vung pah chuan, "A dik a ni, Sakei hi hmelma ena en ngawt tur a ni ngailo, Ramsa ho zingah chuan rilru verther pu miah lo leh Pasaltha rilru pu awmchhun a ni hial ang.. a ril atam chuan sa seh tur a zawng a, a eikhawp tur kha a seh a, chumi a ei zawh hma chuan sa dang seh tur remchang pawh hmu mahse a seh ngailo.. a hliam leh tar chaklo annih ngawt loh chuan mihring hi an seh mai mai lova. Savawm erawh hi chu a â deuh a, mihring beih mai tehi a ching a,,, Mahse, hlauhna nei miah lova kan hmachhawn chuan ramsa hi chuan mihring hi min ngamlo tih hriat reng tur",,, a han ti leh chuar chuar a. Lianzika chuan apa thusawi chu ngaithla tih hriat tak hian alu alo bu ve nghat nghat a. Chutah rawn dak chhuakin, "Kapa, silai hi engtinnge alo puah ngawt theih dan", tih paha apa silai khawih zauh pah chuan, "Tunah khan a puak thei em?"ahan tih zawm leh zat a. Apa chuan nui vur vur chungin, "i dilchhut thiam hle mai, silai hi amu thun loh chuan a puak thei ngawt lova, hei pawh hi amu ka thun loh avangin a puak thei lo tihna anih chu" alo ti a. Lianzika chuan, "Anih leh, puak thei tur chuan engtinnge tih tur, khawi laiah nge amu i thun thin? a han ti leh hel hawl a. 

      Pu Chala chuan a fapa lua tuai vut vut pah chuan, "Uluk deuhin lo ngaithla la, ka'n hrilh ang che, a dawt hmawr atang hian silai zen kan thun a, chu chu kan hawlh muk a, chumi zawhah amu kan thun leh a, thir ka chhut mum thin ang kha... Chumi chu puanchhia in kan hnawh leh a. Tichuan heti laia a uilei hi kan kuai thla a, hei hi a ui lei anti a, tichuan kan kah tur chu kan han tinzawn a, a hmehnaah hian kan han hmet per ta a, a uilei hian heti laia lungchang deuh hi ava chhut khan a tek chhawk a, chumi tek chuan silai zen kha aman kai a, chutia silai zen alh chuan silai dawt hmawr lamah khan amu hi na takin a nawrchhuak ta a ni, chu thirmum chak taka thlawkchhuak chuan kan kah tum tak kha ava deng fuh ta thin a ni.." a han ti a. Lianzika chu hrethiam awm takin alo nui var var a. Chutia apa silai ngaisang awm taka a en vang vang lai chuan an kawmchhak atang chuan a thianpa Hlira chuan a rawn au a, "Lianzik, Pa Thangkhuma Sanghal kah lu va en ang hmiang, a ngho asei lutuk anti" a rawn ti lang lang a. Lianzika chu rang takin a tho a, "Kapa, Sanghal lu chu kava en ve dawn ania aw" tih pah chuan apa chhanna pawh nghak chuang lovin a tlanchhuak nghal a, Anu chuan rawn au zuiin, "Leng rei tawh suh aw, chaw ei ahun dawn tawh hi, chaw ei hunah mi inah len reng loh tur" a han ti zui a. Anu thusawi pawh chu hre phak awm pawhin an lang tawh lo, chak takin Thangkhuma te in lampan chuan an tlan phei ta nal nal a.

~Ziaktu: Tlanhlua Khiangte

Post a Comment

Powered by Blogger.