CHIEF MINISTER-IN PRIME MINISTER, FINANCE MINISTER LEH AVIATION MINISTER A HMU

Vawiin (5.12.2019) khan New Delhi-a cham mek Chief Minister Pu Zoramthanga chuan Prime Minister Pu Narendra Modi chu a pisaah kawmin Mizoram mamawh hrang hrang a sawipui.


CM chuan Mizoramin All India Service Cadre hran kan neih tul a tih thu sawiin hei hian nasa takin State sorkar hnathawh tichakin a tihawlsam dawn tur thute a sawipui a. The Mizoram Maintenance of Household Register Bill, 2019, kumin March thlaa Assembly-in a pass tawh, tun thlenga Governor pawmpuina la hmuh loh chu tihfel thuai a nih theih nan Prime Minister chu hmalakpui turin a ngen bawk. Hei hian dan leh thupek kenkawh chungchang leh ramchhung venhimnaah nasa taka a puih a beisei thu a sawi bawk. Ministry of DoNER leh NEC atanga hmarchhak state-te sum hmuh chu a beitham hle tih Pu Zoramthanga chuan sawi bawkin, hei hi tihpun a tul thu Pu Narendra Modi hi a hrilh a. Zoram Medical College chu AlIMS zulzuia medical college cum hospital-a siam a tul thu a sawi bawk. Hospital changtlung zawk kan neih chuan Zoram mipuite mai bakah a chhehvel state thlengin nasa takin an chhawr dawn a ni a ti bawk.


Prime Minister chuan Chief Minister thu thlente hi uluk taka lo dawngsawngin a kaihhnawih Ministry-te nen an lo enho tur thu a hrilh a ni.

Vawiin vek khan Chief Minister hian Union Finance Minister Pi Nirmala Sitharaman chu a pisaah kawmin, JICA leh ram pawn lam Agency hnuai atanga Mizoram tana sum tam zawk hmuh theih dan tur a sawipui a. Mizorama kawngpui thenkhat chu JICA sum hmanga siam a rawt a. India hmarchhak bial tana Ministry of DoNER leh NEC-a sum tam zawk dah chungchang a sawipui bawk.

Vawiin vek khan Chief Minister chuan Ministry of Civil Aviation leh Urban Development changtu Union Minister Pu Hardeep Singh Puri chu a pisaah a kawm bawk a. Aizawl - Delhi direct-a thlawhna service-tir dan chungchang leh Aizawl khawpui bakah Mizoram khawpui dangte tihhmasawn dan tura rawtna hrang hrangte a sawipui a ni.

Written by:
Emily Lalrinpuii, MIS,
PIO to Chief Minister
Dated: 5th Dec.'19,
5:55 PM

Post a comment

Powered by Blogger.