BIAK IN SAK NA'NA LIANZUALA NUAI 10 PEK HI

January 11, 2020 (Missionary Day) hian BCM Zohnuai, Lunglei chuan an kohhran member Lallianzuala Chhangte hnen ațangin an Biak In sak na'n Rs.10,00,000/- (Nuai Sawm) teh meuh an dawng a, titi a luah rang hle.

Norway club Viking FK pan tur anga India media ten an tarlan kan lo rin ve ngawt avanga thu diklo kan lo thehdarh tawh avangin amah ngei ka zu zawt a, inngaitlawm takin thudik a nih thu min lo hrilh.

Kum 22 mi hian vantlang hriat atana puanzar a duh lem lova, Matthaia 6:4 a thilpek chungchanga kan Lalpa Isua Krista min zirtir angin, a kut vei lamin a tih chu a kut ding lamin a hriat ve kher țul a ti lo.

Mahse, tlang chunga khaw awm ang maiin a thil tihțhat hi a langsar a, amah ni lovin midangin an puanzar sak a, miin he thil avang hian Pathian an chawimawi a, amah an chawimawi tel lo thei lo. A phu.

LZ-a chanchin sawi chuan a inkhelh thiam thu ai mahin a taimak leh thawhrimzia hian rilru a luah lian zawk fo.

Kan player tam zawkte chawlh an neih laia an chawlh dêr țhin laiin ani hi chuan season off laiin training a bei ngawrh zual sauh va. A dam țhat loh pawha awmhmun tala che chhunzawm țhin a ni.

Zan rei lam tawhah Lunglei rawn thleng pawh nise a tuk zingah SYS Football Academy training a zawm nghal a, academy naupang kum 17 hnuai lamte ang thovin tih ngai zawng zawng a ti vek. India international ni mah se a inla 'ropui' ve ngai lo.

SYS naupangte training zawh hnuah amahin a chhunzawm a, a chang phei chuan kawng engkima a rawn ber Pu R. Lalmuankima (SYS Coach) nen a hranpa ngatin training an chhunzawm leh țhin.

'Lianzuala a chawl ve ngai lo.'

A kum dik tak hmanga academy-ah pawh inziak hi aia upa zawk leh hruaitute zah kawngah a chhuanawm hle a, hei vang hian a player puite leh football hruaitute pawhin amah an zah let.

June 8, 1997 a Pu CVL Hriatpuia leh T.Lalroliani ten an hrin khan hetiang fapa ropui hi Zofate min hrinsak ang tih an inring bik lovang. Feet 5 leh inches 5 1⁄2 leka sang, veikhawr lehnghal hi tun dinhmunah chuan Mizo zingah India ram football a palian ber a ni rih.

A thawhrimna leh a tum ruhna piahah Pathian a țihna hi a hlawhtlinna bul a ni.

Pathian a hre renga Pathian pawhin a hre reng.

Inkhelin an zin chhuak tam a, zan riaka an chhuah dawn apiangin Bible a keng tel zel a, Thufingte 3:5-6 leh Sam 37:5 chu a inngahna a ni.

Kum 2016 khan DSK Shivajians-a a training pui Jerry Mawihmingthanga (Odhisa FC) nen Liverpool First team zingah Melwood, Liverpool-ah an lo training tawh nghe nghe.

Tuna a thilpek tam tham tak hi a neih chuang liam ațanga a pek a ni lo. Nikum 2019 khan mi hlawhtlingte huanga tel thei turin Chennaiyin FC ah a lut a, a hlawh pawh a tam tham. Mizo footballer zinga hlawh tam ber dawttu niin season khata Rs.120 lakhs hlawhtu Jeje Lalpekhlua chiah a phak lo.

LZ-a Bank Account-ah hian sum tam tak a awm rih lovang! A chhan chu Chennaiyin a zawm hma khan a hlawh tam lo. Delhi Dynamos (Odhisa FC ni ta) ah khan che țha viau mahse season khatah Rs.15-18 lakhs bak a hlawh lo.

Hei vang hian a rawn ber Pu Muankima chaw ei tura a sawm ve țum pawhin Sir Muana hian, "I hlawhtlin hma chu ka rawn ei dawn lo," a ti. Tunah chuan an insawm kal tawh ngei ang.

Tun season ațangin a dinhmun a țha chho ve ta a, season khatah Rs.90 lakhs vel hlawh mekin season khat chhunga a hlawh pumpui ațanga Sawma Pakhat a pek tur aiin tuna Biak In sak na'na a thehchhuah hi ala tam zawk cheu!

Season tharah a hlawh hi Nuai 10 in a pung dawn a, chhiah chawi hmain season khatah Rs.100,00,000/- a hlawh tawh ang.

Mi țhenkhat chuan vantlang laka an hmai phih na'n te, hmingțhat leh fak hlawh duh avang tein kut tling lova an lakluh sum tam tak kohhranah an chhung lut a, hnuchham pualin thilpek an pe a, pawl hrang hrang leh țanpui ngai țanpui na'n an hlan châwk.

Tuna LZ-a thilpek erawh hi chu a thawhrim rah, thlantui leh mittui tam tak senga a beih hram hram avanga Pathian hnen ațanga malsawmna a dawn, Malsawmtu hnena ui hauh lova a pêk lêt a ni a, a hlu bik hliah hliah.

A dawngtu tan paw'n khawi ațanga a neih nge, engtianga a lakluh nge ni ang, tih ngaihtuah buai a ngai ve tawh lo. Malsawmna tam zawk vur tura Chungnungbera hnena dilsak a awl ngei ang.

Kan footballer te hi mi dangte țanpui, thilpek pek leh Pathian țih kawngah an fakawm hle. Christian Hospital Serkawn Cabin pakhat chuan East Bengal fa chuam Didika Ralte hming a chawi. Lunglei Eletric Veng pa tuaitir hian a sakna tur a thehchhuah vang a ni.

Jeje-a'n Hospital Poor Fund atana a chhunluh te, khuarel chhiatna tawkte puala a neih a thehchhuah bakah vehbur a khawnsak te sawi hmaih a har.

Bengaluru FC forward Lunglei Bazarveng tlangval Edmund Lalrindika'n senior contract a ziah hnu lawka Missionary a chawmzui te hi an chhungkuain zêp sa teh mahse midangte entawn atan sawichhuah loh a har.

Kan footballer hlawhtlinna chang mekte inpekna leh an zar kan zawh mekna, mi hriata an sawi chhuah duh lohte hi riah chaw fai nena thawkchhuak meuha sawi tham a awm.

Anni hian kan aiawhin, hnam dang, sakhaw dang betute zingah Savun Hampuar hmangin Chanchin Țha an hril. Chuvangin kan țawngțainaah i hre reng țhin ang u.

Ka fapa hmingah pawh 'Lallianzuala Chhangte' tih sak mai ka nâp e.

-Lawmkima Hmar