KRISMAS LEH KUMTHAR LAWMNA NEIHLOH KHUAAH LA KAL ZEL - TIMES OF MIZORAM

Breaking

Home Top Ad

Post Top Ad

KRISMAS LEH KUMTHAR LAWMNA NEIHLOH KHUAAH LA KAL ZEL

NEIHLOH KHAWTLANG / KOHHRANAH PATHIAN THLARAU HNATHAWH VANGIN KRISMAS LEH KUMTHAR LAWMNA KAL ZELAH PATHIAN BIAK INKHAWM, ZAIKHAWM LEH RUAIṬHEH VAWIINI THLENGIN AN LA AWM

Kum thar lawmnaThenzawl Sub-Division huamchhunga awm Neihloh khuaah tunlai hian Pathian thlarau hnathawh nasa takin a lang mek a, he khuaa Kohhran Biak In nei awmchhun pahnih Presbyterian kohhran leh Isua Krista Kohhran te chuan Krismas leh Kumthar lawmna leh Pathian hnena lawmthu sawina kal zelah Inkhawm leh zaikhawma chhun leh zanah hun la hmangin, Nimin inrinni heng thleng khan heng kohhran 2 te hian Pathian hnena lawmthu sawina ruai an la ṭheh a, vawiinni khan Isua Krista Kohhran te hian thlarau miten an hmuh angin, hun rukna a liam a, hun sarihna a thlen avanga chawimawina hun hi a kharna atan hmang lehin, Pathian biak inkhawm pangngai neiin, an lengkhawm chhunzawm leh a, tlai lamah ruai an ṭheh leh niin Neihloha Presbyterian leh IKK Kohhran leh YMA hruaitute chuan Thenzawla Vantawng Editor Pu Liantluanga Renthlei an hrilh.

Neihloh khuaah hian In 65 vel an awma, Presbyterian Kohhran hi In 35 vel an ni a, Kohhran member 200 chuang an awma, Isua Krista Kohhran te hi In 20 vel niin, member 100 chuang an ni a, anni Kohhran 2 chiah hian an khuaah hian Biak In an nei a, Kohhran dang chu tlem te tniin, Biak In hranpa nei lovin, mimal In ah an inkhawm ṭhin a ni.

Neihloh Presbyterian Kohhran te hian engemaw rokhawlhna leh chhiatna thil avanga an ṭhulh zauh zauh tih loh chu Kumthar Ni aṭang khan nitin chhun lamah Pathian Biak Inkhawm pangngai neiin, lenkhawmna hun te an hmang a Pathian chawimawina ruai hi Inrinni kalta thleng khan an la ṭheh a. Isua Krista Kohhran te pawh hian, a karlakah engemaw rokhawlhna vangin, ruaiṭheh hi chawlh lawk han nei mahse, nimin Thawhṭanni thleng khan ruai ṭhehin, chhun leh zan lamah an la zaikhawm a ni.

Neihloh Presbyterian Kohhran leh Isua Krista Kohhran te hian zan, zaikhawm zawhah Bethel na hmun a hran ve ve a siamin, zantin tlaivar a Bethel ṭawngṭai an awm reng a, Isua Krista Kohhran Bethel na hmun hi tlangval 3 in an riahchilh char char a, Bethel hi Kohhranho ten an hlut hle a, ṭawngṭainaah hian ṭah thlarau an chang ngei ngei tih theihin, an ṭap nasa a, sual inhriat vanga ṭahna te, Pathian hnena lawm vanga ṭahna te a ni ber niin Neihloh aṭanga thudawnna chuan a sawi.

No comments:

Post a Comment

Post Bottom Ad