" 'Tlai ngai lo Pathian' vangin hnehna chu kan la chan ngei ka ring,"
-Ronald Sapa Tlau, MP(RS)
Aizawl,15.01.2020: Rajya Sabha member Pu Ronald Sapa Tlau chuan January ni 13, 2020 (Thawhṭanni) khan Synod Office ah lengin CAB chungchanga an hmalakna ah lawmthu a sawi.
Parliament a CAB putluh a nih lai khan mi tlemte chauhin kan ram leh sakhua humhalh tumin Delhi tlangah hma kan lak lai pawhin Kohhran mipuite kan lam ah in ṭang tlat tih ka hriat avangin ka zam lova, huaisenna ka neih phah a, sorkar laipui thuneitu te pawhin kan hmalakna an hriatthiam phah a kan lawm hle a ni a ti. Pu Sapa chuan kan beisei ang diak diakin thil kal lo mahse Zoram mipuite inlungrual taka kan ram, kan hnam leh kan sakhua tan a thawk ho zel turin ka ngen bawk che u a ni a ti.
Pu Ronald Sapa Tlau chuan Indopui Pahnihna-a German-in France an hneh hnuah France hruaitu, Charles de Gaulle chuan, "He battle ah hian tlawm rih mah ila, indona la kal zel turah chuan kan tlawm lo ang," a tih ang khan, CAB thilah khan Parliament ah hneh lo mah ila Parliament pawn lama inbeih zawmna kal zel turah erawh hi chuan Zoram mipuite thlawpna leh ṭawngṭaipuina a zarah leh 'tlai ngai lo Pathian' vangin hnehna chu kan la chan ngei a rin thu a sawi.
MP Pu Sapa hi Rev Lianhmingthanga Sailo Senior Executive Secretary, Mizoram Synod hnenah a lawmthu hi lehkha a ziak mai ni lovin amah ngei Synod Office ah kalin lawmthu a sawi a ni. Pu Sapa hi MPCC Vice President Pu H. Liansailova leh party hruaituten an ṭawiawm a ni. - Zet Dee A Chhangte
Post a Comment