PROGRAMME I TI TLEM ANG U - David Sailo

ToMZ
30 Jan 2020, Thursday, January 30, 2020 IST
Kan ram thanmawh bâwk pakhat chu Programme tam lutuk hi a ni.

KHAIMAH AW -


Chawlhni zing kan inkhawm a, bânah Thalai an Fellowship a, chawhnu inkhawm a awm a, Sunday tlaiah chawnghei/ngheilo tawngtai a awm a, zanah kan inkhawm leh a. Thawhtan zan ah Thalai an inkhawm tlangpui leh a, bânah hla/Drama an zir leh a, Thawhleh zanah Kohhran thenkhatah Nu ho/Pa ho an inkhawm leh a, Nilai zanah Inkhawm a awm leh a, Thursday zanah pa ho/Bial,Tualchhung zaipawl in hla an zir a, Friday zanah tawngtai Inkhawm nei pawl an awm leh a. Inrinni zanah kan inkhawm leh bawk a!!

Hei hi Kohhran chauh a la ni. Kohhran Programme awl lai chuhin YMA, MUP, MHIP, Zirlai pawl leh eng eng Association emaw ten Committee an ko awl lo bawk nen. Kohhran leh Kohhran hnuaia Committee pengte nen lam chuan Meeting nan Kohhran Programme awm loh lai kan chuh fur bawk si. Kan Society ah hian zan awl a awm lo tluk a ni a, Programme in a khat dul mai.

PROGRAMME TIH TLEM A TULNA -
Chhun lamah mahni hna te te thawk leh zirna In belin chhungkua kan in thendarh sung sung a, kan inhmuh khawm theih hun zan hun tha chu Kohhran leh pawnlam tulna avangin kan darh leh sung sung a, haw hun in khuangrual lo takin kan haw a, zing thawh a rual lo leh a, chhungkaw nun(Family Life) kan tlachham telh telh a, thiltha ti a peng darh theuh si, Chhungkua angin kan Combination a chhe hle thung thin.

Hei hian HIV kai tamna, Sex hluarna, Central Service tlakchhamnaah min hruai lut a, rual elna tak tak rilru a paih bova, thatchhiatna leh dawngdahna, inhmuam ûp Institution ah min hruai a, pawnlama tawngtai ring tak, chhung inkhawm a bei thawp thei tak te kan awm tak nuaih hi.

CHHUNGKAW BUAINA -
Pa ber chu Kohhran hnarkaitu a ni a, chhungkua chu rel fello rem rum mahse inkhawm thulh a duh lo. A inkhawm a, bânah an thu hnufual a, chutah chuan a hmuipuipu ber leh a thahnemngai ber a ni lawi a, a hna, Inkhawm leh Meeting in chhun leh zan a kar tluan a, Sr Adviser nihna a ngah bawk si. Nu ber lah chuti bawk, inkhawm, lâm, hmeichhe pawl velah nuam a ti tawk hle. Committee a ti ve sek. An fate chu 'Ka lawm nan mai ka lo bel che' ti tawk velin thutak pawh hauh lovin Kohhranah an ngampa a, hruaitu pawh an ni. Inkhawm, Committee, hlazir, Drama zir, sumtuak hnatlang chu an thawh ber a ni mai.

Pawnlam atanga en chuan felthuau, rawngbawltu chhungkua tih theih an ni. Mahse Programme ngah lutukna chuan chhungkua a ti chhia a, an chhungkaw boruak tak tak chhimpha tute chuan an awt ngai lo!!

POLITICS AH -
'Hawng Culture' kan bansan thei lova, a tenau ber thlengin an hawng reng a, an hawn kher loh pawha kalpui, luah mai theih hi hawn kher a ngai zel a, Seminar kan ti sek a, Sensitisation Programme kan siam a, chungah chuan Khuallian mai duh tawk lovin Khualzahawm a chhawm zel bawk si. Kan ram hruaitute chu Hna aiin Programme Fahrah tete ah kar an tluan a, an Office ah hmuh an har em em thin. Cabinet Meeting tih vel hi hna an thawh nasat lai ber a ni mah awm e. A bak hi chu zin, hawn, lungphum phum, bial mitthi ngaihven tih velin an phe buai a, TA an Bill nghek nghek mai zel a nih hi. Programme hi ti tlem ve se.

TLIPNA -
SE pakhat sawi min hrilh chhawn chu :
"Ka Staff pakhat Kohhran Thalaia inhmang em em mai hian Kohhran thilah chawlh a dil ngun hle a, a changin chawlh dilpui turin an Upa te a rawn hruai a, a chawl zing bawk a, vawikhat chu Mission Field tlawha karkhat thang turin an Pastor in chawlh a rawn dilpuia, ti hian ka tawngchhuak ta a 'In nau hi midangin a hna an kêp zing hle a, mahse in nau hian vawikhat pawh midang hna a kêp sak hi ka la hre ve lo' tiin. An chhuak ta hna hna a nih kha"
A ti....

David Sailo - 23rd Jan, 2020
Visitor's Voice

Click to Comment

No comments:

Mizo Nula Khal

+