DR ZR THIAMSANGA'N NGUR MODEL VILLAGE NI TURA PUANNA LEH LAWMNA HUN A HMANPUI
Champhai North Assembly Constituency huamchhunga Model Village atana thlan Ngur khaw puan leh lawmna hun chu vawiin khan Ngur Community Hall-ah neih a ni. He hun hi Dr. ZR Thiamsanga, bialtu MLA leh Vice Chairman, Health & Family Welfare Board chuan khuallian niin a hmanpui a. Pi Ethel Rothangpuii, Project Director, DRDA Champhai chu khualzahawm niin, Pu Mark Lalthanliana, Addl DC Champhai chu uaptu a ni.
Dr. ZR Thiamsanga chuan Ngur khaw mipuite inlungrualna leh thawhhona fakin Model Village ni awm tak ni a a hriat thu leh khawtlang inlungrualna leh phurna chuan amah ngei pawh chona nasa tak a pek thu a sawi a. Ropui taka a lawmna hun buatsaih ani chu hmuh nuam a tih thu leh an phurna chuan malsawmna a hrinchhuah ngei a beisei thu a sawi a. Ngur khaw thar din tum anih thu sawiin, hemi kawngah hian mipuite kovah mawhphurhna tam tak a tla a, hmasawnna ruhrel siam tum ani dawn a, kan tih thin thalote kha kan bansan angai bawk a, khaw dangte entawn rawn nih kan tum tawh zawk dawn ani tiin, sawrkar lam atanga tihtur awmte pawh a tul ang zela bawhzui ani ang, a ti bawk.
Ngur khaw mipuite chu Mizoram mai bakah India rama khaw entawntlak ber nih tum tur leh ziak leh chhiar thiam, hriselna kawnga entawntlak, fai leh mawi, mimal leh khawtlang nun mawi siam tum turin a chah a. Ngur khawtana hmalakna hmasa turin Sub-Center tih changtlun a, BSc Nursing vil tir tum ani tiin, February thla atangin MLA fund hmangin Health Worker pawh dah tum a ni, a ti a. Forest department kaltlangin cheng nuai 10 hmanga khaw cheimawi leh ram ngaw humhalh hna kalpui tum a nih thu pawh sawiin, Ngur khaw bula Far hmunte humhalha kangmei chhuak tur veng tha turin a chah a. Solar energy hmanga tui pump chhuahna, tui dahthatna leh pekchhuahna tur pawh ngaihtuah anih dawn thu a sawi a. Zirna tihhmasawnna hmasa atan Ngur Middle School Building sak that tum anih thu leh khaw chhung chei hna pawh plan mumal tak hmanga siam tum anih thu a sawi bawk.
Khuallian chuan Sawrkar hmalakna tarlangin, khawpui chhung leh khaw inkar kawng chhiate siam that zel niin, Zirtirtu indaihlohna phuhru turin Zirtirtu thar lak a ni a, MZU Southern Campus Lunglei ah hawn tum a ni, a ti a. Hriselna lama hmalakna pawh sawiin, Mizorama Sub Center-te tihchangtlung tum anih thu leh thawktu indaihlohnate pawh a tul anga bawhzui zel ani, a ti a. Mizoram State Health Care Scheme hmangin chhung tinin kum tin damloh inenkawlna senso nuai 2 thleng an bill theih thu leh hemi hnuaiah hian mitinte inziaklut vek turin a sawm nghal a. Sawrkarin Champhai District mipuite hriselna ngaipawimawhin Champhai District Hospital-ah Dialysis khawl leh High Dependency Unit (HDU) khawl a bunfel a tangkai taka hman anih thu leh Champhaia Nursing School a taka kalpui anih theihna tura hmalak zel ani, a ti bawk. Ngur khaw mipuite chu theihtawp chhuaha Model Village an nihna hre reng tura chahin an kalzelna turah duhsakna a hlan a ni.
Thusawitu dang Pi Ethel Rothangpuii chuan Ngur khua Model Village a thlan ani chu khaw tana ni chhinchhiah tlak tak anih thu sawiin, khawtlang tanrualna angaih dawn avangin lungrual taka khaw hmasawn leh entawntlak nih tum turin a chah a. Model Village tobul leh hemi hnuaia hnathawh ngai hrang hrangte tarlangin, model Village ah a hranpain tanpuina leh hamthatna bik engmah a awm dawn lova, hmasawnna ruhrel leh hnathawh felfai taka kalpui anih theih turin hmalak ani dawn ani, a ti a. Model Village chu thingtlang khuate intodelha lungrual taka an awm theihna tura October Ni 11, 2014 a sawrkar laipui siam anih thu leh Village Development Plan mumal tak siama bawhzui tur anih thu a sawi a. Model Village tana tihtur awm hrang hrangte tarlangin Ngur khaw mipuite chu thil tha leh hmasawnna awm theihna tura thahnem ngai taka thawk turin a chah a ni.
He hun hi Pu LH Sawngpauva, Chairman, Model Village Organising Committee chuan a kaihruai a. Pu H.Tawnga, Vice Chairman, Model Village Organising Committee chuan kalkhawmte lawmna thu a sawi a. Pu RL Thangmawia, Secretary-in report a pe a. Khuallian in Model Village puanna a nei a. Pu Ngurliantluanga Sailo, Vice President, Ngur VC in lawmthu sawiin hun a khar a ni.
Dr. ZR Thiamsanga hi Dr. Lalhmuchhuaka, Medical Superintendent, Civil Hospital Aizawl; Dr. Vanlalsawma, Joint Director, Health Services; Pu Lalduhthlana, DFO; Dr. R.Lalawmpuia, CMO; Dr. Lallawmkima, DIPRO; Pu Lalengliana Chhangte, DSP Hqtrs; Dr Zoramdinthara, Member, H&FW Board ten an tawiawm a ni.
Champhai North bialtu MLA hian tukin khan Champhai Vengthlang Rahsi Venga Health Clinic a hawng a, District Hospital Champhai a tlawh bawk a ni.
Post a Comment