Football head leh Thluak natna a inzawm tih finfiahna a pung zel
Naupang inkhelhnaa football head a khap chungchângah Scotland-in kumin hian USA hnung a zui ve a, Mithiamten Ramdang Football Association te'n khap ve se an duh.
KUM 2002-a England leh West Bromwich Striker hlui Jeff Astle-a’n thluak natna a thihpui khân inkhelhnaa ball head leh thluak natna a inzawm leh zawm loh chungchâng ngaihven a hlawh tîr hle a. Khatih hunlâi khân an inzawmna chiang taka sawi theih tam lo mah se, kum 2015 khân United States-ah naupang inkhelhnaah ballhead khap a ni a.
Kum 2016, 2017 leh 2019-a zirchianna liantham tak takin ball head leh thluak natna inzawmna nia ngaihtheih an hmuchhuah lehzêl hnuin Scottish Football Association (SFA) chuan naupang inkhelhnaah ball head khap a tum ve ta a.
SFA hmalakna hian football khawvêlah ball head leh thluak natna inzawm leh inzawm loh chungchânga inhnialna a tichhuak thar leh nasa hle.
England aiawha khêl thin Astle-a khân kum 18 chhûng hlawh neia football a khelhhnuin thluak natna chi khat, Alzheimer’s a vei tan a. Kum 10 zet a vei hnuah kum 2002 khân a natna kaihhnawih, Chronic
Traumatic Encephalopathy (CTE) chu kum 59 mi niin a thihpui.
A ruang an zirchiannaah mithiamte’n a thihchhan chu a football a head thin vânga thluak natna piang niin an ngaih thu an sawi a.
Infiamna khawvêl a nghawng nasa nghal hle na in, khawi football enkawltu pawl lian mahin ball head an khap nghal chûk chûk lo thung.
Ama’rawhchu, football ram tia hriat hlawh lutuk lo. US-ah chuan infiammite leh football enkawltute hmalakna ni lovin, football khel thîn zirlaite nu leh pate intêlkhawmin court kawngka an kik avângin football head khap a ni ta.
Kum 2010 khân US-ah hian zirlai naupang football khêl thîn mi singnga zetin concussion (lu sawh vânga lu na leh chiangkuan lohna neuh neuh) an nei a. Nu leh pate intiamrual chuan football khelh dân tih danglam ngiatin Court an pan ta a. Hemi hnu hian US Soccer chuan kum 10 hnuailam football khelhnaah ball head a khap ta rup mai a ni.
Mathei lovin ram khat football enkawltu pawl lianin hetianga ball head a khap avâng hian ball head leh thluak natna inzawm leh zawm loh zirchianna a piang ta nuk a.
Kum 2016 khân Sweden-a zirchianna pakhat chuan mi nuaikhat chuang hriselna a bihchiang a, concussion tum khat nei tawhte chuan mi nawlpui aiin thluak natna an vei awlsam zawk a. High School leh College an paltlang mawh zawk bawk tih a hmu a.
Kum 2017 khân London-a zirchianna pakhat chuan football khêl thîn, thluak natna vei tawh mi paruk postmortem-na a endik leh a, pali chuan Astle-a thihpui Chronic traumatic encephalopathy (CTE)an vei tih a hmuchhuak bawk a. Tin, nikum khân UK-a zirchianna pakhat chuan football khêla eizawngte’n mi nawlpui aiin thluak natna a let thum leh achanve laiin an thihpui nasa zâwk tih a hmu leh bawk.
Tûnah hian Scotland-a zirchianna pakhat chuan football leh rugby khel thîn mi100 ve ve leh midang za chuang kum sawmbi eng emaw zat chhûng zuiin an thluak hriselna endik a tum mêk bawk. Hetianga mithiamte’n football head leh thluak natna inzawmna an zirbing mêk lai hian Astle-a fanu chuan SFA-in naupang inkhelhnaa ballhead a khap chu a fak hle a, ramdang FA te’n SFA hnung zui ve se a duh thu a puang a.
Tin, Astle-a natna thihpui CTE hmuchhuaktu, thluak Doctor Bennet Omalu pawhin ball head khap a âwn hle a, "Chak taka thil thlâwk lu a lo tauh hi thil awmze nei lo a ni. Puitling inkhelhnaah pawh ballhead hi kan khuahkhirh a ngâi. A hlauhawm!” a ti tawl. - The Frontier Despatch
Post a Comment