KhawsikpuiHmanni deuh leh tun hnai mai pawh khan Vanghmun PHC-ah typhoid vei kan insulpel nuk hlawm a, inkaichhawn a awlsam bakah damchian a har angreng a, damlo awmpuitu na ta zawkte, damkawr chhuaha chhuak mahsela lut nawn tate pawh kan awm nual kha. 

He natna chungchanga zawhna awm thei tlem azawng I lo bih chiang dawn teh ang.

Typhoid chu engnge? Natna hrik chikhat, a hming ‘Salmonellla typhiana’ an tih, bacteria huang chhunga mi hi he natna thlentu ber chu a ni a. He natna hrik hi mihringte chauhvina kan natpui theih niin, kan thisen leh zun leh ek kaltlangin he natna hi a lo inthehdarhin kan inkaichhawng thin a lo ni. 

Typhoid hi khawvel pumah pawh a hluar angrang hle a, inkaichhawn a awl avang hian he natna hi vei an awm tawh chuan a bul hnaia mite pawhin an kai zung zung tawh mai thin a ni.

A lan chhuah dan : Typhoid natna lo lanchhuah dan chu hetiang hi a ni: Taksa a chau a, awm nuam lo leh peih sam lohnain bul a tan a, mi a chau/hah hma em em a, a changa taksa vawt deuh vurin awm dante a inthlak a inthlak a, lu leh hnungzang te lo na-in pang a kham deuh thum a, tin, kawkhawh emaw daikal thei lo (ek khal) angte in a lang thin. A thenah chuan zing lama khawsik reh siin tlai lamah pang a lo lum leh thin. 

Tin, vun bawl te, lei ro hul ang te-in a langchhuak thin bawk.


Natna inkaichhawn dan : Inthiarna felfai leh thianghlim awm lohna hmunah typhoid hi a hluar hma a. 

Typhoid inkaichhawnna tlangpui chu: Ei leh in thianghlim lo, a bikin chhinphui loh emaw ei tur hluiah te; tuisik thianghlim lo atangte, kan kut fai lo atangte a ni ber. 

Tin, taksa chak lo te hian an kai hma bik a, sa leh bawnghnute ei ngun lai hian kan kai awlsam bik bawk a ni.

Inenkawlna : Mut hahchawlh tawp hi tihtur hmasa ber chu a ni. 

Tin, ei leh in fimkhur hle a ngai a. 

Typhiod huat zawng kan ei vaih chuan a zualkaiin a punlun vak thei a ni. 

Mawm, thak, bawlhlo tak, sangha sa leh bawnghnute ah te insum tlat tur a ni a. Thlai tharlam leh thei hrisel ei tam hi a thain, ser tui sawr te, tui thianghlim in tam te hi a tha hle bawk.

Damdawi atan chuan doctor ngei rawn a, kan nat dan enchiang ngei-a damdawi min chawh hi a tha ber a ni. 

Daktawr rawn theihna hmuna awm lo leh daktawr rawn remchang lo te tan, typhoid inenkawlna damdawi tlem lo tarlang ila (heng hi mahni thu-a ei lo turin kan inchah a ni)

1. Cifran - 500mg 

2. Paraxin(Chloramphenicol)

3. Ofloxacin - 400 mg

3. Ciprofloxacin - 500mg nikhata vawi hnih

4. Azithromycin - 500 mg nitin chawei hma-in

5. Ceftriaxone 1gm -a nikhata vawihnih inchui

6. Cotrimoxazole - 960mg

7. Cefixime - 200mg 
Tin, Paracetamol 500 mg darkar 7 danah emaw ei tel tur a ni.

Tin, Zonu damdawi thenkhat han tarlang bawk ila :

1. Lawngpar panga vel, tui litre 2(pava 8) velah chhuang so ila, a chanve vel-a a tui a kang âwmah-ah suan ila, a la lum pip pep laiin in tur a ni. Hetiang tui ni khata vawi hnih in-hi a tha ve khawp.

2. Purun var leh sawhthing rawt dip tuilumah chawk ila, ni khata vawi hnih in tur a ni

3. Balhla - Balhla hmin emaw a phawk deuh pawh tihkawi/diakin
khawizu thirfiante hnih nen chawhpawlh ila, nikhata vawihnih
ei tur a ni. 

Tin, balhla kawr/pil chhung lam hi an fak viau mai.

4. Cocunut tui in tam tur

5. Serthlum hian awm nuam lo a tihzia awm bakah taksa a tichak a, a tha khawp bawk.

Inven dan : Ei leh in thianghlim hi a pawimawh hmasa ber a. 

Tin, thil kan ei dawnin fai taka kut sil zel tur a ni. 

Jampuiah hian tuikhur tui kan ring deuh tlangpui a, a tam zawk chuan tui kan that lem lo. Kan tui in tur hi chhuanso-a a hunna hmun pawh felfai leh thianghlim ni ngei sela. Ruah tui leh lui tui in mai mai te hi a him lo. 

Typhiod natna kan vela a lar tawh chuan ei leh in lo fimkhur nghal hle ila, sa, bawnghnute, saum te thlengin ei fimkhur tur a ni. Dawr-a thil fun that lohte ei miah loh bawk tur a ni.

Heng bakah hian typhoid chungchangah zawhna tam tak a awm thei ang. Kan khua a sika kan awm a nawm loh deuhva typhoid kai ni-a kan inrinhleh deuh chuan a rang thei ang ber-a damdawi in lama thisen endik tur a ni. 

Kan inenkawl hma leh kan dam hma mai dawn a ni. Tin, typhoid hi benvawn a neih awlsam tak mai anih avang hiana uluk taka in enkawlin damdawi ei that hle a tul a ni. Chiang taka kan dam var hma chuan natna palzam mai mai tur a ni lo. 

“Tihdam aiin inven a tha zawk” tih hria-in mitinte fimkhur tlang ila, thianghlimna i ngai pawimawh theuh vang u.

By : Aron Sailo

Post a Comment

Powered by Blogger.