Khampat Bungpui Lungphun chu thla tam pawh a din hmain Sagaing Region sawrkar thupeka ṭhiah a ni leh ta mai hian ngaihtuah a ti tam hle mai.
Kan hriat ṭheuh angin Khampat Bungpui Lungphun hi Sagaing Region Sawrkar remtihnain November 22, 2019 a, Sagion Region Chin Affair Minister 'Lal Thawm Thang' ngeiin a hawn a ni a. Kalaymyo Pyituh Hluttaw 'MP Siami' pawh a tel a nih kha. Mahse, Sagaing Region thupek bawkin Febuary 13, 2020-ah Khampat Bungpui Lungphun chu ṭhiah a ni leh ta a ni.
Khampat Bungpui Lungphun ṭhiah a nih chhan chu, Khampat No.5-a awm Kawlhovin lehkha ziaka Township Administrator hnena hekna lehkha an thehluh vang a ni. Chu lehkha chu a chunga lawn chhovin Sagaing Region sawrkar Office a thleng ta a ni. Lehkhaah chuan Chin mite hi Tibet-myanmar thlah niin AD-8 vel khan Tibet-myanmar thlah dangte nen China ram hmar-thlang, Tibet aṭanga hmar-chhaka awm Chinlung aṭangin Myanmar-ah an lo lut a. Ei bar zawn awlsam zawkna hmun zawngin Runkhawm (Chindwin) luipui chu zawh zelin luipui aṭanga tlak lam tlang dungah chuan an inzar pharh ta a ni.
Chin zinga Lusei-te chuan khawthlang lam ram, tlang dung an kai hma, AD -1200 bawr vel khan helai hmunah hian Bungpui an lo phun thu Historian-ho lehkha ziak aṭangin kan hmu thei a, chumi hriat rengna atan chuan lung hi phun a ni, tiin, Chin (Lusei), Sap leh Kawl ṭawng, ṭawng chi thum hmangin Lungphunah hian lehkha ziah a ni.
Kum 2020 January 28-a buatsaih Sagaing Region sawrkar meeting (2/2020) thutlukna (3) angin Chief Minister tel lohna a ni a, an Lungphun thu ziak pawh a dik loh avangin Lungphun chu dah sawn turin thutlukna siam a ni, tih thu chu Febuary 10 khan chhuah a ni.
Heti hian ka ngaihtuah a:
*Ding lai sawrkar hi hnam tlem zawk humhalhna kawngah a chak tawk loh vang a ni thei ang em?
*Sagaing Region sawrkar hian a thuneihna dik takin a hmang ngam lo a ni thei ang em?
*Bungpui Lungphun hawngtu Chin Affair Minister 'Lal Thawm Thang' zah loh vang a ni ang em?
*A hawn nia tel ve, Kalaymyo Pyituh Hluttaw palai 'MP Siami' zah loh vang a ni ang em?
I ngaihdan han thawh ve teh le.
Febuary 17, 2020
Thawhṭanni
Maroa Tahan
Post a Comment