Contact Form

Name

Email *

Message *

Iklan

PETER USTINOV - Lal NERO Lema Changtu

ToMZ
19 Feb 2020, Wednesday, February 19, 2020 IST
Nero lema changtu kha a hming tak chu Peter Alexander Freiherr von Ustinov a ni a. Sir Peter Alexander Ustinov ti pawhin an sawi tho bawk a ni. Ni 16 April 1921 khan a lo piang a. Stage leh Film lama lemchan thiam tak leh mahni part zo taka chang chhuak theitu a ni.

Peter hi English actor, voice actor, writer, dramatist, filmmaker, theatre leh opera director a ni a, stage designer, screenwriter, comedian, humourist, newspaper leh magazine columnist a ni bawk a. Tin, radio broadcaster leh television presenter a ni tel bawk. Keini Mizote'n kan hriatna ber chu Quo Vadis Film-a Lal Nero lem a chan kha a ni.

Peter Ustinov hian Award a dawng hnem tawh hle a. Academy Award te, Emmy Award te leh lawmman hrang hrang a dawng tam hle.

Kum 2003 khan, Durham University chuan, Ustinov ngaihsanzia tihlan nan, an Graduate Society hming chu Ustinov College tiin an thlak. Ustinov hi 1992 atanga a thih thlengin University Chancellor a ni.

Peter Alexander Freiherr von Ustinov hi England khawpui ber London-ah a piang a. A pa Jona Freiherr von Ustinov chu Russian, Polish Jewish, German leh Ethiopian thlah kal zel a ni thung. A nu Nadezhda Leontievna Benois chu Nadia tia hriat lar a ni a, ani chu painter leh ballet designer niin, French, German, Italian leh Russian thlah kal zel a ni.

Ustinov hi Westminster School-ah a zir thin a. Teenager a nih lai atangin Actor lam a zir a, chutih lai chuan, lemchan thawnthute a ziak tawh thin. Ustinov hian vawi thum lai nupui a nei a. A hmasa ber chu Isolde Denham (1920–1987) a ni a. kum 1950 khan an inthen a. Fa pakhat an nei a, hmeichhia niin a hming chu Tamara Ustinov a ni. A nupui pahnihna chu Suzanne Cloutier a ni a. Kum 1971 khan an inthen leh bawk. Fa pathum an nei a, fanu pahnih Pavla Ustinov leh Andrea Ustinov an nei a, fapa pakhat Igor Ustinov (de) an nei bawk. A nupui pathumna chu Helene du Lau d'Allemans a ni a, ani hi kum 2004-a a thih ni thlenga a nupui a ni.

Ustinov chuan Zunthlum a nei a, a lung a chak lo chho zel a. Ni 28 March 2004 khan, Lung na avangin kum 82 mi niin, Bursins, Vaud, Switzerland-ah a thi. A thihna hmun hi an in bul maia Clinic-ah a ni.

- Thartea Damystic Boss
Visitor's Voice

Click to Comment

No comments:

Mizo Nula Khal

+