ZEPHYR MAPUIA'N FB KAL TLANGA A FANU ELENA TÂNA A LEHKHATHAWN ROPUI TAK CHU

Ka fanu duhtak leh ka hmangaih em em, Elena

H RotluangaTunah mai chuan thil i chhiar thiamin ila hre thiam si lova, Kum 5 mi chauh ila ni si a, i tih tur leh tih loh tur han sawi viau pawh ni ila i la hrethiam si lova. hrilh tur che hi ka va ngah em! nakinah i hriat thiam hunah ka lo sawi theih nghilh palh takin hei ti hian ka ziak duah mai.

Pathian venna zarah ilo nula chho ve zel anih chuan nangma pualin Mobile te ila nei ve anga, Whatsapp/Fb/Insta te ila khawih ve ngei ang. tu nge i biak thin kan hre dawn der lo chu a nia! i thlalak post-ah te inring lo lai ti siin inring deuh lai thlalak te hi hmang lo la, miin an nuihzat ang che, awm mai mai thlalak ni si inchei deuhin la thin lo bawk ang che. alang dawn tih hre rengin i awm bawr leh i mal tawp langin thla la lo la, Emoji/milemin i hliah tlaikhaw hnu lui vel anga, i rilru leh i tih lan tum mipa fing tak chuan an hre tho dawn si a, i pasal bulah ila show vak zawk dawn nia, alawm tur zia mai chuh.

Nula sexy/mi it nih tum reng reng thlala thin hi mipa-in an ngaisang lo tih i hre lo ang tih ka hlau, kan hmuh theih mizoramah pawh hmeichhe chhuanawm lehkha thiam hlawhtling leh Officer kan tih hovin an ti ngai lo tih lo hre phawt la. i thawmhnaw khuh loh chin lang, duh em em tu che khan i pumin a duh dawn che tih hria la. Dr hmaa hrisel lohna engemaw vanga inhlim ngai a nih loh chuan Camera hma-ah hian inhlim vak vak lo la ka ti bawk. Modeling lam i tui ta tlat a nih chuan, hetiang lama lo hlawhtling tawh te leh a hre zau deuh te kan zawt anga, eizawnna a tlin chuan i duh leh i ti dawn nia. i khawi lo kalna leh i awm dan zawng zawng social media-ah pho lo hram ang che, an nuihzat ang che. fiamthu thawh ni lova,' an thil tih' miin an nuihzat nih hi thil hlauhawm tawp a ni tih hria ang che.

Lehkha ilo thiam sang vak lo a nih pawn, Saptawng thiam loh hi zak lo la, Kan hnam tawng Mizo tawng i thiam loh chuan zak hle rawh. Kan thiannu pakhat pawh maw..."Mizo tawng hi ka thiam lo" a ti a, Saptawng a thiam chuang bawk si lova a khawngaih thlak lutuk asin. Mizo hming a pu ve vung si a.

Chuan Pasal ila nei ve duh ngei angah ka fanu...i duh zawng duh pui ngei che kan tum phawt anga, Officer fapa a ni a tihah buai suh. apa thih hunah Officer thi ta fapa chiah i chang mai ang. amah kha Officer anih loh chuan awmzia awm lo, Inkhawm ngai miah lo chu nei lo la chu ka ti, Kohhran leh khawtlanga inhmang miah lo phei chu thu buluk deuh deuh an sawi duh, an fing lo duh riau! chutiang makpa atan ka it lo tih lo hre bawk la, in ti changkang ni lovin mi changkang neih tum hram la. thawmhnaw mak pui pui inbel leh mipangai sam ang ni lova sam sawi sak dan maksak pui pui te hi thawhchhuah nei lo an ni tlangpui tih hre ru ran rawh aw. engmah hna thawh i neih loh phei chuan, nangmah chawm tu ber turin thawh chhuah a neih loh phei chuan buaithlak lutuk ang.

Film /Youtube leh video thenkhata i hmuh thin ramchangkanga an in ngaihzawn anga in ngaihzawn ve phet tum lo la, Ramdang tlangval tv-a i hmuh ang kha mizo tlangval khatiang ang kha hmuh inring lo bawk ang che. i duh thu i sam vak vak anga, duhthusam khawvelah an awm lo tih lo hria la. Mizo tlangval ngei pasalah neih tum ang che. Tlangval trawp chu duh bik lo la, intifai hlerh hlerh leh rimtui leh lutuk chu nupui nei chi an ni lo tih hre hrang vat ang che. Zantin nitina rawn leng reng, hman leh lutuk chu lo duh lo phawt ang che, I pasal a nih hunah a leng reng mai ang. mi chanchin chhia leh tlin lohna hre thei/sawi treuh thei bialpa neih tum lo hram ang che. An inchhung a nuam ngai lo. lawina tlak a ni lo tih hria ang che.

I bialpa nen nasa takin in pahnihin chauh a in awmin thla la vak vak suh aw..in inneih loh palh takin pasal i hmuh loh pah thei tih hria la. Fb velah 'relatioship' tih dah velah lo buai lo bawk la. i bialpa hi i pasal tur a ni nghal dawn lo tih lo hria la. in inneih hunah ila dah zawk dawn nia. mi zawng zawng hmaah i bialpa a ni tih puan chhuah hi i mawhphurhna a ni lo tih hria la. i nih tur ang ni thei lova siam thei tu che kha i bialpa a ni thei tih lo hria ang che. Vawi khat bak i nula dawn lo tih hi hre reng bawk ang che.

Bialpa i nei anih pawn kohhrana, khawtlanga active leh lutuk pawh ka duh chuang lo, hnathawk hman lo khawpa active an ni palh ang. inchhung khurah an taima duh lo 'azawng zawng chu an ni lovang a', Sawrkar hna a nei lo tih lamah i pa hi ka buai lo, Mi taima lo hi i nei ang tih mawlh hi ka hlau a ni. Hnathawh hi Pathian kan biakna a ni tih hria Pasal i hmuh chuan ka va lawm dawn em! chung mi chu Pathian hre mi dik tak an ni tih kei chuan ka hmu si a.

Tin, in inngaihzawnna ala rei lo viau a, Thil pek Gift a pek vak vak che a, ka hmangaih che, nupui atan ka duh che, a tih nghal zut zut leh thikthu a ti chhe nghal em em a nih chuan ring suh. nupui atan a duh vang che a ni lo tih lo hre phawt la, mutpui vat che a duh vang a ni thei bawk aw...

Ka hlauh em em chu maw..ka lo upa chho ve anga, hrisel lohna/damlohna te ka la nei ve anga, ka bula awm a, min ngaihtuah min duat chuang si lo leh hmangaih tak tak si lo hian, i status-ah ka dam lo lai thlalak tar chhuak in ka pa tang fan fan/ka hmangaih che tih i tar ve chuai ang tih ka hlau ber. an uar lutuka kan hunlaiin..ka hlau tak tak a nia aww.


I Pa,
H. Rotluanga

Post a comment

Powered by Blogger.