1. Chaw: Ei tur chhe har, packed leh canned chi zawng zawng CHAW a ni thut. A chhe har. Khêk rawh. Hmawmsawm angin ei ral tawh suh. Inkharkhip hun tawp lamah chaw aiah i ei a ngai maithei. Eitur i neih zinga a chhe hma apiang ei hmasa la, buhfai kher ei tum lo la, i puar theihna apiang ei turin inbuatsaih rawh. Ṭám rilru pu suh.
2. Tui: Taksa fai leh ei tur thianghlim ngai pawimawh la. A bakah chuan tui ren la, khâwl la, a theih chinah hmang nawn ang che.
3. Ni sa: Invenna man tláwm, kan neih tlan vek chu ni sa a ni. Sahbon i tlakchham chuan ni sa-ah nilengin pho mai rawh.
4. Inrinhlelhna: Khuh, khawsik leh natna dang i neihin emaw, i bul vela mite i rinhlelhin emaw, sawi darh lo la, social media-ah puang suh. I hriat veleh Hri Dó Pawl (Task Force) hnenah phone-in hrilh la, an tih tur an rawn ti mai ang.
5. Nihna (Identity): Rinhlelh i neih emaw, vei i hriat emawin, social media-a, an thlalak nena i thehdarh hian inringhlel leh vei dangten hmingchhiat leh ngei an hlau ang a, an inpuang ngam lo vang. An inpuan ngam loh chuan a darh nasa ang. Hri Dó Pawl hrilh la an rawn chingfel mai ang.
6. Thehdarh suh: Finfiah loh thu thehdarhtu leh ṭul lova tihṭhaihtute hi hrem theih an ni. Chuvangin thu ṭangkai lo thehdarh suh.
7. Insawizawi: Hri dò lêt chakna tur eitur ṭha i nei lo a nih pawhin insawizawiin taksa i tichak thei. In chhung chêpa insawizawi harsatna chhuanlam lovin a tih theih dan zawng zawk ang che.
8. Pawisa: Pawisa note hi hrik inkaidarhna a ni palh thei. I dawnin fimkhur la, i khawih zawhah kut sil ang che. Pawngpaw hlauh chu a ṭul lo. Khawih lova envelope-ah ni 3 (darkar 72) i dah tawh chuan hrik an thi vek tawh ang. Ti thei tan chuan digital transaction a him ber.
9. Mamawh inhlan tawn dan: Ei tur leh mamawh inhlantawn fimkhur a ngai. Entir nan: Kan vengin kan thlai kan hralh loh chuan damdawi leina pawisa kan nei lo a. In vengin damdawi in nei a, thlai in nei lo thung a. Inzawrh tawn nghal ngawt lovin, phone hmangin, veng aiawha Hri Dó Pawl in indawr fel phawt ang a, kan veng driverin thlai a rawn phur ang. In lo lâk rualin kan veng damdawi tur chu in rawn thawn ve thung ang. Driver chu motor aṭanga chhuak lovin a thlan haw leh nghal ang. Driver pawh tlawmngai tura ngen ngawt loh tur. An himna zawnpui tur.
10. Sorkar leh Pawl: Tun hi political party fak leh sawisel hun a ni lo va, hnam leh kohhran leh pawla inthliar hun a ni hek lo. Hri dova ṭanrual hun a ni. Kan aiawha hri rál dotu doctorte leh an thawhpui te, Hri Dó Pawl te, thupek duangtu leh kengkawhtu police te leh, vantlang mamawh tihsaktute leh media mite fak leh fuih hun a ni. An tih tur an tih theih nan kan tih tur i ti ve ang u.
11. Inenfiah rawh: I damchhungin tun anga Pathian pàwlna hun fianrial ṭha hi i nei leh tawh kher lo vang. I cell-phone i bih nilèn chuan, i hriselnain a tuar a, i thaw a pik a, i nun a hrehawm ang. In chhunga sekrek khawih la, chhungkaw hlutna belhchhah la, lehkhabu chhiar tam ang che.
I ngaihtuahna: I duh lo chung, i duh dan kalhin an khung lui che anga i inngaih chuan mi vanduai i ni. Mi an thih laia i dam hi lawm la. I thih ve lohna turin, nangma duhthlanna ngeia inkhung mek anga i inngaih chuan i thawvengin i zalen ang.
-Vanneihtluanga
Post a Comment