Upa Sanglianthanga hian theihtawp chhuaha Lalpa rawng a bawl hnu chuan harsatna a tawk ve leh ta tlat mai a. Khatia hla ropui tak 'Aw Kraws' tih leh hla tha tak tak dang a phuah tawh hnu khan kum riat bawr vel teh meuh mai chu Lalpa lam hawizai rel thei lovin a awm ve leh a ni.
"Lalpa hriatna kawngah leh nun lamah harsatna namenlo ka tawk a. 'Engtia han tal chhuah leh tur nge ni ang maw?' tiin ka inngaihtuah buai thin khawp mai. Lalpa fakna hlate theih ang tawka lo phuah ve tawh thin leh, A fak hlate ka lo sak ve thin tawh vangte pawh a ni ang e, duhsaktu Zoram hmun hrang hrang atangin kan Inah min rawn tawngtai sakin an lo kal ve reng mai a. Mahse, Lalpa lam chu ka hawi mai thei si lo. Chutihlai chuan El-Bethel Speaker Pu K Lalhmingliana(L) chu a larin Lalpan a hmang em em mai a. A rawngbawlna atang chuan mi tam takin Piantharna duhawm tak an chang thin a ni. Chutianga beidawng tak maia ka nun ka hman mek lai chuan Pu K Lalhmingliana(L) chuan Sateek daiah Chhandamna Camping a rawn nei a. A naute chu Camping-a lut ve tur chuan min rawn sawm tir thin a. Mahse, ka lo hnarfithlathak zel a ni. Mahse, a rawn tirh nawn leh thin avang chuan a tawp a tawpah chuan hreh tak chung chuan ka va lut ve ta nge nge a. Camping luh zan chuan Campers tam tak zingah Speaker chuan, "Pu Sanglianthanga zanin hian kan zingah a lo tel ve ta a, ka lawm hle mai. Amah hi la hmu lo mah ila, Burma ram atangin a hla phuahte leh a hla sakte ka lo ngaithla tawh thina, amah hi ka hmu ve duha, khawngaihin lo ding chhuak se" mipui zinga min han ti zui phei leh phei chu ka zak kher mai".
"Mahse, Sermon ropui tak 'Tlang Pahnih/Pathian Mizia' tih atang chuan Lalpan min lo siam thar leh ta a ni. Lalpa chu fakin awm rawh se!. Tlang pahnih a awma, Fapa Tlang leh Bawi Tlang a ni. Fapa Tlangah ka lo awm a ni tih chu ka inhrechhuak ta a ni. A Sermon atang chuan Fa nihnaah ka chianga, chhiahhlawh (Bawi) nihna kawngah ka lo harh ngai lo a ni tiin ka inhmuchhuak ta a ni. Lalpa chu fakin awm rawh se!. Lalpa lo inpuanna ze hrang hrang Abrahama Pathian, Isaka Pathian leh Jakoba Pathian a nihnate chu Thlarau Thianghlim zarah ka lo hre ve in, he hla 'Jakoba Pathian' tih hla hi chutia Piantharna duhawm tak ka chan nawn leh hnu chuan zan khat chu ka chenna in Tlangnuam, Aizawlah kum 1991 khan Lalpan min lo pe ta a ni. Hemi zan hian kan nupain he hla hi kan buaipui tlaivar zak nghe nghe a ni" tiin Upa Sanglianthanga hian a sawi.
He hla Chang 2-na a, "Ka Isaka ngei kha, halral a ngai leh si" tih a dah chhan a sawi hian ka rilru a hneh hle mai. Heti hian a sawi a, "Abrahama kha rinna chak tak mai a ni a. A nupui Sari nen khan fa an nei thei mai lo va. Mahse, Lalpan Abrahama chu kum 100 dawn a nih hnu ah fapa duhawm tak Isaka a pe ta anih kha. Isaka lo pian hnu chuan Lalpan Abrahama hnenah chuan a pek Isaka ngei chu halral thilhlana hlan turin a ti leh ta tlat mai".
Tin, heti hi a ni a, chûng thil hnuah chuan Pathianin Abrahama chu a fiah a, a hnênah, "Abraham," a ti a; tin, ani chuan, "Heta hi ka awm," a ti a.Tin, ani chuan "I fapa, i fapa neih chhun, i hmangaih tak, Isaaka ngei kha hruai la, Moria ramah chuan kal la, chutah chuan ka hrilh tûr che tlâng pakhatah chuan hâlral thilhlanah hlân rawh," a ti a.
- Genesis 22:1-2
Tin, Isaaka chuan a pa Abrahama chu a bia a, "Ka pa," a ti a: tin, ani chuan, "Ka fapa," heta hi ka awm," a ti a. Tin, ani chuan, "En teh, mei leh thing chu a awm a; nimahsela hâlral thilhlan tûr berâm no chu khawiah nge a awm?" a ti a.Tin, Abrahama chuan, "Ka fapa, Pathianin ama tâna hâlral thilhlan tûr berâm no chu a ngaihtuah chawp mai ang chu," a ti a: chutichuan an pahnih chuan an kal dûn ta zêl a.
- Genesis 22:7-8
"Lalpa khan Abrahama awm mai mai lai kha a rinna fiah a duh ngawr ngawr ni in ka hre lo. A awh em em mai a nupui duhtak Sari lak atang ngeia fapa Isaka a han nei ta kha Abrahama chu a lawm hle mai a. Lalpa khan Amah a petu aiin a peka, kha Isaka ngei kha Abrahama khan a ngaipawimawh tan zawka a hriat avangin, Abrahama rinna leh inpekna chu fiah a duhtaah ka ngai. Tichuan, Lalpa
chuan Abrahama chu a fapa Isaka ngei chu halral thilhlana hlan turin a ti leh ta a ni.Mahse, Abrahama zawng, rinna chak tak anih avangin a fapa neih chhun Isaka ngei pawh kha Lalpa tan chuan a lo la hlanlet phal reng mai a nih kha. Keini pawh hian min petu Lalpa aiin a malsawmna min pek kan Isaka; kan In leh ram, rosum, kan Motor, kan sorkar hna, kan nupui pasal, kan ngaihzawngte thleng hian, thil dang malsawmna kan dawn zawng zawngte pawh hi min petu Lalpa aiin kan lo chhuang lutuk ang a, Lalpan min hlanlet rawh tiin min laksak leh vek mai hi a va hlauhawm em!. Chuvangin, ni tinin Lalpa aia kan ngaihpawimawh kan Isaka hote hi i halral zel ang u. Kei pawh hian hla chang 2-na a, 'Ka Isaka ngei kha halral a ngai leh si' ka han tihte hi, kha Lalpa hnen atanga ka dawn malsawmna zawng zawng te, hla phuah thei tura malsawmna min pek zawng zawng te, kha ka lo pianthar tawhna ngeite kha an ni. Khang zawng zawngte kha halralin Lalpaah Piantharna duhawm tak ka lo chang nawn leh ta a. Tichuan, Pathianah inhalral nawn leh vekin "Jakoba Pathian" tih hi ka lo phuah chho leh ta a ni. Lalpa chu fakin awm rawh se!.
"Abraham Pathian ah chuan,
Lalpa hnen a ka dawn;
Malsawmna zawng zawng te,
Ka Isaka ngei kha;
Halral a ngai leh si,
Pathian intumchawpna;
Jehova Jire ka chan nan".
Tin, Jakoba khan a chakna leh theihnaain Pathian a buan a. A Chak hle mai a, mahse Pathian chuan Jakoba malpui ruhchuktuah chu a tih pelhsawlh sak ta a. Jacoba chu a tlawm ta. A thlaphang chuan Pathian chu chelhbet tlat mai a. A aia thil ti thei leh chak a ni tih Jakoba chuan a hriatchian tak em avang chuan Pathian chu chelhbet tlatin, mal min sawm hma chu ka thlah lo ang che a ti ta ruai mai a nih kha. Pathian chuan khatia tharum ngah em em Jakoba a buana, a hneh loh lai khan Jakoba kha 'chak zawk i ni' (You are the winner) a ti lo. Khatia Jakoba a tlawm hnap tak hnu, engmah a tih theih tawh lohva a malpui ruh a pelhsawlh hnu, Pathianah chauh lo chuan innghahna a neih tawh loh hnu khan Lalpa chuan Jakoba chu 'chak zawk i ni' (You are the winner) a lo ti chauh zawk a ni.
Tin, zânah chuan a tho va, a nupuite pahnih leh, a bâwihnute pahnih leh, a fa sâwm leh pakhatte chu a hruai a, Jabbok lui kaiah chua a kai ta a.Tichuan anni chu a hruai a, lui chu a kaitîr a, a neih zawng zawng pawh a kaitîr bawk a.Tin, Jakoba chu amah chauhvin a awm ta a; tin, mi pakhatin ani chu khawfîng chah thlengin a buan a buan a.Tin, a hneh lo tih a inhriatin a malpui ruh chuktuahah chuan a khawihsak a, tichuan a buan lai chuan Jakoba malpui ruh chuktuah chu a lo pelhsawlh ta a.Tin, ani chuan, "Mi thlah rawh, khawfing pawh a chah dâwn tawh hi," a ti a. Tin, ani chuan, "Mal mi sâwm loh chuan ka thlah lo vang che," a ti a.Tin, ani chuan a hnênah, "I hming engnge ni?" a ti a. Tin, ani chuan, "Jakoba," a ti a.Tin, ani chuan i hming chu Jakoba an ti tawh lo vang a, Israela an ti zâwk tawh ang; Pathian leh mihring i bei a, i hneh tawh si a," a ti a.Tin, Jakoba chuan ani chu a zâwt a, "Khawngaih takin i hming mi hrilh rawh," a ti a. Tin, ani chuan, "Eng vângin nge ni ka hming mi zawh ni? a ti a. Tin, chutah chuan mal a sâwmsak ta a.
- Genesis 32:22-29
Khawvel infiamna chi hrang hrangte kan thlir thina, a tlusawp zawk atang hi chak zawkah an puang ngai lo. Khawvel hian tlawm zawk hi chak zawkah a puang ngailo a ni. Mahse, Lalpa chuan Lalpa hriatna nei si lova mahni chaknaa innghat thin te, an hausakna rinchhantute hi chak zawk a ti ve ngai lo. Mahni chakna leh theihnate aia Lalpa dah hmasa a, Lalpa hma a tlawm vek thin leh inpumpek thin tute ngei hi a ni Lalpa chuan chak zawk a tih leh nun tam neitute a lo tih chu ni.
"Jakoba Pathian ah chuan,
Ka chakna zawng zawngte;
Tihchhiatsaka awm in,
Lalpa chakna chauh chu;
Ka lo hman thiam ve nan,
Ka ke min tibai ta;
Nun tam ka neih theih nan".
Jakoba anga mahni chakna a innghat lovin, Lalpa chakna a innghah tlat zawk hi keini ringtute hian i tum thin ang u.
"Abrahama Pathian,
Aw Isaka Pathian;
Jakoba Pathian nih pawh,
Lalpan a hnial si lo;
Kei bumhmang leh mi sual,
Hel hmang thin tan pawh hian;
Jakoba Pathian ngei kha,
Ka Pathian a ni si".
Abrahama Pathian, Isaka Pathian, Jakoba Pathian ngei kha chhiartu zawng zawngte Pathian lo ni zel rawh se, Amen.
Tin, "Kei hi i pa Pathian, Abrahama Pathian, Isaaka Pathian, Jakoba Pathian chu ka nih hi," a ti leh a. Tin, Mosia chuan a hmai a khuh ta a; Pathian a en ngam si lo va.
- Exodus 3:6
Ziaktu: Lalrinfela Fanai
Post a Comment