Siaha khua Pu F. Lalrotluanga ina a târ sazuk ki emaw ka tih chu ka han bel chiang a, sazuk ki a ni si lo va. Ka thil hmuh ngai loh tawp a ni a, a mawi dan a dangdai khawp mai. Ka zawt ta chawt a. Ani chuan “Sangâi ki a nih hi. Sangâi hi Manipur ramah chiah a awm niin Mizoram State Museum-a thawk țhin kan u, Zoramthanga khan min hrilh a,” a ti a. A thusawi chuan ka beng a verh hle mai a, internet-ah ka han zawng nghal a. ‘Sangâi’ chu Meitei țawng a lo ni reng mai a, Manipur state animal a lo ni bawk. An scientific hming chu Rucervus eldii eldii a ni a, Loktak dil chhim lam Keibul Lamjao National Park phul leh buar zinga tla țhin ramsa an lo ni. Loktak dil chhim chhak lam, dil pawnlanga buar hi Phumdi an ti. Phumdi tlan ramsa an nih chu. Pathian thil rêl dan hi chu a mak a ni.
Kum 1950 khan sangâi hi an mang hman țêp a, kum 1975 khan 14 chiah an awm niin an hria a, sorkarin an awmna ram a han humhalh hnu hian an lo pung tial tial a, kum 2016-a Wildfire Wing, Forest department, State government, Manipur University leh Wildfire Institute of India țangkawpin survey an nei a, sangâi hi 260 lai an lo awm tawh tih an hmuchhuak a ni. Sangâi awmzia; Sa chu Mizo țawng nen a awmzia a inang reng a, ‘ngâi’ tih hi ‘nghak’ emaw, ‘ngaichang’ emaw tihna a ni a. Sangâi hian hlauh an nei a, an tlanchhiat hian thil ngaichang ni awm tak hian an ding a, a lehhawi leh ngei ngei țhin a. Chuvangin ‘sangâi’ an lo ti ta a ni.A puitling chu a kehmawr ațanga a zâng phei san zawng hi meter khat vel an ni a, an rih zawng hi kg zakhat vel an ni a, a pui hian no hi ni 220-240 vel an pai. Kum 10 vel an dam.
Tichuan, Pu F. Lalrotluanga nen chuan kan titi zui ta zel a. Fanai lal te, Chinzah lal te, Zathang lal te leh Mara lal te chanchin ka lak khawm mek thu ka hrilh a. Ani chuan, “A va lawmawm em! ka pu Dopawrha, Mizorama lal chak ber an tih chanchin lehkhabu siam ka tum mek a, ka puitlin theih thlawt lo va, ka u F. Lallura hian Darbilhi chanchin ka ziak e, a ti ve a, hmanlai chanchin kei angin a hre si lo va, min rawn zawt min rawn zawt mai a ni,” a ti a. Kei chuan, “A ni reng ang chu, ani chu Education lamah ringawt alawm a rilru leh a hun a sen zawh vek,” ka ti a. Pu Rova chu an in chung pindanah a han chho va, hmanlai chanchin a lo ziakna leh a chhinchhiahna lehkha pawimawh zawng zawng chu a rawn thatchhe arbawm khai a, kan han en dun a, min hrilhfiah nghal zel bawk a. Ka va han lâwm tak em!
Tichuan, Pu Rova chuan a pu Dopawrha chanchin, Pu K. Pakunga, Thingsai High School Headmaster (Rtd) in a lo ziak manuscript te, Lalhmingliana Torel ziak ‘Mizo Fanai Tribe History’ te, F. Rongenga ziak ‘Zofate Lo Khawsak Chhoh Dan’ te leh a document neih zawng zawng chu min hawhtir ta a, ka haw chu ‘Khaibawra’ ka ni ta hrim e. Darzo ka va zin lah chu Lalnu Darbilhi pasal thlana an phawrh a ruhro leh a ro țhenkhat thla ka va la thei bawk a. Hmanlai pasalțha sa pel hlawhtling ang maiin tlang ka tlir a ni hrim a, ka hlawhtling hle a ni. Pu F. Lallura ziak ‘Darbilhi’ nge ngaihnawm ang a, keima ziak ‘Darbilhi’? tih chu in ngaihruat thiam maiin ka ring. A ngaihnawm satliah ai hian thu dik hi a pawimawh ber.
Pu Rova chuan Lalnu Ropuiliani te nen an inlamhnaih dan min hrilh bawk a. Ka vêng hawk mai. “Engti tihin nge Lalsangzuali Sailo khan Lalnu Ropuiliani kha Ralvawngah an phum a tih theih? Ka nu kha thu hre rei thei tak a ni a, kan chhungkaw thurochhiahah chuan Denlungah an phum tih a ni vek,” a ti a. Kei chuan, “A! ngawi teh, Pi Lalsangzuali Sailo kha historian pawh a ni lo va, hla phuah thiam leh zai thiam a ni a, a ziak ve mai mai a nih kha. Lalnu Ropuiliana tlâwm ve lo anga a ziakte phei kha chu a dik thlawt lo. Tlâwm lo se, Chittagong jail bang a zut tawp lo vang! Ka lehkhabu ziak pakhat ‘JF-a leh Mafaa Zûn zâm leh Literary Criticism”-ah hian Pi Lalsangzuali Sailo mawng ka hlim dawn chiang khawp mai,” ka ti a. Fanai chanchin an ziak tam tam tak pawh hi a dik vek lo, Rorehlova atang chiah khan Fanai hian Lal ziding an nei chauh a ni, ka ti a. Pu Rova chuan,"Chu chiah chu ka nu min hrilh dân pawh a ni reng a ni," a ti a.
Kum 10 kal ta khan Pathian thlarau thianghlim hian ka sumdawnna zawng zawng min sawi țhiahsak vek a, min siam thar leh a, a duh zawng thudik tak ka ziah theih nan thu ziah tur material awmna hi min kawhhmuh chat chat ni berin ka hria a. Mary Winchester pa thattu Mizo pasalțha Chȇmchâwma fei kibar leh ngunhnâm, kum za aia tam an thurukna min kawhhmuh chat tawh a. Min chimbuaitu awm miah lo turin khawvel thil awhna sual lak atang hian ka rilru hi dai ka theu thianghlim vek bawk a, Pathian malsawmna ka dawng zel niin ka inhria a. Amah tirhkoh Paulan, “Lalpaah chuan lawm fo rawh u, ka ti leh pek țhin ang, lawm rawh u,” a tihna rilru ang kha ka lo pu ve thei ta a; a dik apiang te, a zahawm apiang te, a fel apiang te, a thianghlim a piang te, a thang mawi apiang te - țhatna reng a awm a, fakna reng a awm phawt chuan – chung chu ngaihtuah zawk rawh u,” a tih nun pawh hi ka nunpui ve thei ta niin ka hria a, ka lawm hle a ni.
Rah chhuah nun nei mi nih hi ka tum hle țhin a, “Hemi avangin ka Pa chu chawimawiin a awm țhin, tam taka in rah hian; chutichuan, ka zirtirte in ni ang,” Lal Isuan a ti. Ka zawmpui peng rah lo apiang a paih țhin a, a rah apiang a tithianghlim țhin, a rah tam lehzual nan.
Post a Comment