COVID-19 CHUNGCHANGA MIPUI VANTLANG HNENA THURAWN

Covid-19 hrileng mek a darh zau loh nan leh khuahkhirh a nih theih nan Mizoramah nasa taka tan lak a ni a, sorkar chuan a ruahmanna siam tawh sa pawh a ti danglam nasa hle a, punkhawm leh zin chhuah tam loh a rawt a, Mi tupawh khawsik, hritlang, khuh leh hrawkna tel, thawkna lama harsatna neite chu school, college, bazar, Biak In leh puipunna hmuna kal lova mahni in emaw, damdawiin lamah emaw inenkawl tura ngen leh hriattir an ni a.

COVID-19 chungchanga hriatfiah duh leh harsatna neite chuan COVID-19 Helpline no. 102 leh 0389-2323336 / 2318336 ah englai pawhin biakpawh theih a ni.
Mizoram Sawrkarin Zirna in hrang hrangte March ni 31 thleng khar thu a chhuah a, he school khar hun chhung hian naupang leh thalaite puipunna lam chi ah kal lo a, in lama awm chu hri darh zel tur ven nan a pawimawh em em a ni tih mimal, chhungkua leh kohhranho ten hriat a tul tih sorkar thuchhuah chuan a sawi a ni.

State Election Commission chuan VC leh LC inthlana hman tur Summarry Revision of Electoral Rolls kalpui mek chu naktuk atangin thu leh awm hma chuan tihtawp lailawk a nih thu nimin khan thuchhuah siamin a sawi a.


Mizoram Youth Commission (MYC)-in programme hrang hrang a kalpui leh ruahmanna hrang hrang a siam – Coaching Class-te leh programme dang, mipui punkhawm tam theihna tura hmalak mekna te bakah meeting te pawh tunlai hrileng mek Covid-19 vangin thu leh awm hma chu tihtawp lailawk rih a ni.

Hetihlai hian MYC-in UPSC Prelims 2020 hmachhawn tlaka a ngaih, sum leh paia a tanpui tur te zawnna result tihchhuahah mipa paruk an tling a. Anni hi Elite IAS Academy, New Delhi-ah coaching class an zawm dawn a. Amaerawhchu, COVID-19 hrileng vangin New Delhi-ah kal a remchan rih loh avangin Elite IAS Academy chuan ‘online coaching’ a ruahmansak dawn a, zirlaibute pawh an rawn thawn ang a. COVID-19 hrileng a ziaawm hnua sawrkarin kal a remtih veleh New Delhi-ah hian coaching class kal turin tirh an ni ang.

State Bank of India chuan moble phone atangin bank dawr ngaite a tam thei ang bera tih ni se tiin ngenna a siiam a, Mobile Banking te, YONO te, YONO Lite te, YONO cash te leh Internet Banking te hmanga mahni in atanga Banking Transactions ti tam zawk turin mipuite an ngen a, Hei hian he natna inkaidarh chungchanga inven lawkna ah nasa taka a puih an beisei tih an sawi. Heng Digital Products hman chungchanga harsatna neite tan SBI chuan helpline a siam a, inthlahrung lova inhriattir turin mipuite an ngen a ni.

ATM hman chungchangah pawh mipuite fimkhur turin kan in chah duh a. ATM hman hma leh hman hnu ah kut silfai hram ni se, tul takah lo chuan ATM pawh hman loh hrih mai nise an duh tih an sawi.

Hetihlai hian, Mizoram chhungah COVID19 vei an awm hriat a la ni lova, sorkar chuan theihtawp chhuahin a darh loh nan hma la in, Mizorama lo lut tur te uluk takin a endik a, tun thlengin mi 146 chu mahni inkhung hrang tura tih an ni tawh a ni.

GoAir chuan an thlawhtheihna Lengpui Airport a tum tur zawng zawng chu March ni 19 atanga April ni 15thleng a titawp rih a. Hetih rual hian Delhi to Aizawl additional flight March ni 29, 2020 atanga thlawh tir tura ruahman pawh thuleh awm hma chuan a thulh rih bawk a ni. - AIR

Post a Comment

Powered by Blogger.