A hun laia hlauh nachang hre si lo, tawngthu chhe lo ah mi 2/1 han thi se, Over khawpa hlauh kan intih hmuh leh si ang. Covid-19 in khawvelah a ram a zauh mek.
DELHI AH -
Puipunna liantham huaihawt an khap a, Pawl 5 chin hnuailam 31st March thleng chawlh an pe a, Exam hrang hrang pawh a hun sawn tlai a ni ta fur mai. Delhi mai ni lo, khawvela Sport Event lian tak tak pawh an thulh rup rup tawh a nih hi.
KAN INBUATSAIHNA -
Sorkar chu theih tawp chuan a inbuatsaih ve chuan a lang a, mahse sawi ho tih vel a la tam mah mah a ni. Rik a hun tawh a, mipui pawh min khuahkhirh a hun viau tawh a ni. "Thi an la awm lo" tih hun lai tak hi inthlahdah aia kan inbuatsaihna min ti tangtu ni zawk se. Kan Inter-state Border ah nitin an la vei tlang suau suau a, International Border thlengin kan nei si!!
TIHDAM AIIN INVÊN -
Hei hi kan thupui a nih fo dawn chuan tihdam tur awmlo khawpa inven a tul hle a ni. Khawvel ram changkang zawkte an mangang phili mek a, kan chhak lawk Indonesia, Thailand etc ah Confirmed an awm reng tawh mai si. Keini aia China leh khawchhak hlat zawk Delhi pawhin mipui khuahkhirhna lamah tan an la tawh hle.
KOHHRAN LEH NGO -
Sikul naupang hial State dangah an chawlh tir a, Programme pawimawh an thulh sup sup a, mi 30 chuang lai mai India ah Confirmed a nih laiin keini ramah chuan Chapchar Kut ah kan la lâm mup mup a, Kohhran Inkhawmpui leh Rorel kan la ti reng bawk a, lo thleng ta se Over hle turte bawk kan ni.
Invenna lam hi thupui hlapuiah kan neih dawn chuan tun atangin Kohhran leh NGO pawh hian Programme liantham huaihawt tawh rih lo se la a tha ngawt ang. Kan chet vel dan en hi chuan a rawn thlen huna phûl leh hlut tur ringawt kan ang riau mai.
HAWH U -
Vuitu tur in hmu zo lo, Khawhar in kal pawh kan thinhrik phahna, pawn chhuak ngam lova kan la tawm imna thil a ni thei tih hria ila, a lo thlen palha Over viau ai chuan invenna lamah hian Ralkhel dar vua ila, i Over hmasa zawk ang u.
David Sailo
6th March, 2020
Post a Comment