TBC-a'n COVID-19 hla a tichhuak - LYRICS

MINCHHANG HRÂM RAWH (COVID-19)

Hripui hlauhawm leng vangin maw,

Khuavel a damlo mêk e;

A ngui ruai e, khua tin, thlér tin,

Thlaphangin aw, kan rûm e.

Eng chen nge maw ni zêl dâwn, Lalpa?

Kian zai reltir tawh la, a tâwk lo'm ni?

I mite tawngtaina hi i chhâng dawn tawh em le, Lalpa?

I mite'n i lam kan lo hawi, min chhâng hrâm rawh.

I mite'n bân pharin kan au a che.

Hripui vanga him nan tiin,

Chhûng tin kan inkharkhip e;

I biakbûk in thianghlim meuh pawh,

Luah lum ngamin kan awm lo.

Min rûn mektu hripui vangin,

Hruaitute thlunglu a hai;

Damna rûna thawktu leh vênhim hna

Thawktute pawh an chau ta.

Lalpa, kan lam lo hawi la,

Kan dîlna ngaithla ang che;

I mite hi kan damlo ve,

Kan dam nan—Nang chauh i tâwk.

TBC Zaithanpuia chuan tunlai hrileng coronavirus avanga natna COVID-19 chu hlain a phuah a Min Chhang Hrâm Rawh tih a ni a, he hla hi March ni 27 zana a phuah niin, a lyrics video pawh YouTube-ah a dah tawh a, music video pangngai zawkin, a thiante pathum Henry Varte, Andrew leh Freddy te nen siam an tum bawk. 

TBC-a chuan, "Hlaphuahthiam tak pawh hi ka ni hran lo, mahse, rilru a a luh lai chuan a thluk nen a chhuak ve leh mai thin a. Ka phuah tih pawh hi inthlahrunawm ka ti thin a, ka dawn te pawh ti ila a dik zawk ang," tiin, he hla pawh hi a rilruah a rawn lang zut zut mai niin a sawi. 

He hla lo chhuah dan sawiin, TBC-a chuan, "Kan tunlai boruak chu kan hre vek a, inah kan inkhung a, khawtlang pawh a reh, khawvel pawh a dam lo. Kan taksa chu dam mah se rilru a dam lo. Keimahin ka awm bawk nen, khua te a har duh a, rilru te a nguai a. 

Tunlaia Fredrick Lalrindika ten home crusade an neih hi ka lo chhim ve ziah a, March ni 27 zan khan, sermon ka en a, inah hnehna ka puang ve a, khami ka ti zo kha, room-ah ka lut a, he hla hi a rawn lang ve mai. Phuah tum lawk sa hrim hrim pawh ka ni lo, a vaiin ka ziak zo nghal vek a, a thluk nen ka nei nghal," a ti. 

He hla hi a music video pangngai deuh a siam nghal pawh a chakawm a ti a, mahse, kan tunlai boruak nen a tih tak tak theih loh a, mahse, tunhma lama kan lo hmelhriat tawh, an thianho pali- TBC-a, Henry Varte, Freddy leh Andrew te nen he hla hi mahni awm hmunah theuh record-in, chu chu Blue Wave studio lamin an lo rem khawm ang a, a video nen tihchhuah an tum niin TBC-a chuan a sawi a, gospel singer dang te pawhin an pui dawn niin a sawi bawk. 

- The Aizawl Post