Tunlaia khawvel tiralkhel a, Zoram
mipuite pawh ti chi-ai-tu ‘Covid-19’ leh
kum 222 zeta upa tawh ‘Malthusian Theory
of Population’ chungchang hi i han thlir
dawn teh ang, sumpai a nghawng tur tlem
nen.
Malthusian theory of population
Malthus-a hi mi thiam tak, Cambridge
University zirchhuak niin, history leh economics subject-a professor ni ve ve hial a ni.
Malthus-a chuan kum 1798 khan ‘An
essay on the Principles of Population as it
affects the future improvement of society’ tih a tichhuak a; chuta a sawi lianber
chu ei tur pun chakna aiin mihring pun chak
dan hi a nasa em em a, chuvangin mihring
pung chak lutuk tikiam tur hian kawng
hnihin thil thleng a lo awm thin a ti.
A kawngkhatna (positive check) chu
mihring thian tam theihna tur (hripui, indo,
khawkheng, tam, lirnghing, adt.) niin, a
dang pakhat (preventive check) chu
naupiang a tlem theihna tur a ni tiin a sawi.
Mathus-a theory chuan ‘eitur pun
chhoh dan chu pun dan rate inang zel,
entirna'n (etn), 1, 2, 3, 4, 5… (arithmetic
progression) a nih laiin mihring punna chu
a let thawk thawk, etn, 1, 2, 4, 8, 16…
(geometric progression) a ni thung’ a ti.
Hetia eitur punna aia mihring punna a
san em avang hian ei tur leh a eitu tur
mihring chu an inbuktawk ta lo thin a,
inbuktawk tur hian mihringte thihna turin
hrileng te, khawkheng te, indo te, tam te,
lirnghing leh adt. a lo awm ang tiin.
Tanpuitu rau
He a ngaihdan hi mi tam takin pawmpui
loin, sawisel mah se tun thlenga mihring pun
chhoh dan zirna huanga zir hmasak ber leh a
dik lo tia sawi dawt theih si loh a ni reng.
Mihring pung ta lutuk tikiam turin tunge hri
chu lo lentir ta ang a, tunge tui tilian ang a,
tunge lir chu lo sawinghing ta ang?
Father of economics tia koh Adam Smitha pawhin sumdawnnaah chuan sumdawngtu
chuan a mimal hamthatna tur ngar ngarin hma
la se, chu chu khawtlangin a thatpui ber ang
a ti a. Miin ‘mimal tinten mahni hmasial tak theuha sum hailuh dan an dap chuan
khawtlangin a tuar zawk ang’ tia an han hnial
chuan ani chuan, ‘Hmuh theih loh kut (invisible hand)-in a khalhngil ang’ a ti mai.
He'ng mipahnihte thurin hian sawisel hlawh
viau mah se a dik lo hulhual tihsak chi an ni lo.
A chhan chu Adam Smith-a thurin anga kal
market economy kan tih sawrkarte chu
khawvela a hausa sa an ni a, Malthus-a sawi
ang ngeiin mihring tam tikiam turin eng rau
emaw ni hi khawvelah a thawk tlat si a ni.
Malthus-a thurin puitu thil thleng
Mathus-a sawi ang deuh hian khawvela
chhiatna rapthlak tak tak a thleng fo a, mi
nuai tel thihna a thleng fo mai. A bikin hrileng
chungchang hetiang hian en teh ang.
(Table en la)
A hnuaia table-a hripui thenkhatte hi
chuan a nghawng ramte hi kum engemawzat
a chiah reng a, chuvangin mi nuai tam tak an
thih phah. Tin, a thente hi chu a zat fak zuk
hriat phak loh, historian ho chhut dante a ni
hlawm.
Hripui lo chhuahna hmun chu China hi a
ni duh hle mai. Khawvel ram changkang lutuk ni si a, hetianga hri lo chhuahna a ni tlat mai thin hian Malthus-a ngaihdan hi a pui tha hle.
Kum 100 danah
Tin, heng bakah hian hun bi nei ang deuha
chhiar theihin hetiang hian hri a leng bawk a
- Kum 1720 khan mi nuai 1 vel suattu hri
hlauhawm tak ‘Great plague of Marseille’
an tih chu a leng a; kum 100 a liam a, kum
1820 a lo inherchhuak a, cholera nasa takin
Asia ram a tuam a, mi nuai 1 vel bawr an thi
leh.
Kum 100 bawk a liam a, kum 1920 a lo
nihin ‘Spanish flu’ an tih hri chu leng lehin mi
vaibelchhe 10 vel zet nunna a la bawk. He
Spanish flu hi khawvela hrileng zinga mi
nunna suat hnemtu ber a la ni nghe nghe.
Ti chuan, kum 100 bawk a lo liam a, kum
2020 a lo nih chuan Covid-19 hian khawvel
chu min rum khum dur dur a, khawvel hi a
khur chu a nih hi le. Kum 222 daih liam tawh
atanga Malthus-a thurin lo vawrhchhuah hi
khawvelin a tawng chho mek a tih theih mai
awm e.
I sum ren rawh
He Covid-19 avang hian khawvel sum
dehchhuah a tlahniam hle dawn tih a chiang
a; khawvel sum dehchhuah a tlakhniam
chuan India ram a nghawng dawn bawk.
India atanga Mizoram pawh sum
dawnga nung kan niha vangin kumin leh
nakum hi chu Mizoram sawrkar pawh sum
lamah a harsa hial dawn niin a lang.
Mizoram sawrkar atanga sum chhuak a
tlem chuan chhungkaw tin min nghawng
dawn. Hlawh bak hi sum chhuak tur a tam lo
mai thei. Chuvangin, kan sum neih ang angte
daihzai taka hmang turin ngaihtuahna siam a
fuh ang.
- Prof. JV. Nunchunga
- Prof. JV. Nunchunga
Post a Comment