Mizo LawyerE khai, bial a zim duh sawt mang tak e, sawi tawh angin 2019, nikum Dec ni 31 khan sawrkar hna kum 36 leh sikula zirtirtua ka awm, sawrkar sikul a nih loh vanga sawrkar hnathawk anga ngaih hleih theih lohte nen chuan, kum 40 zet ka thawh hnuin ka lo chawl, pension ve ta kha a ni a, bial a zim tulh tulh hi a ni mai, ka chawlh ve hun tur Dec ni 31 kha ka thleng zo ang em aw, tiin ka ngaihtuah fo a, Pathian zarah ka thleng ve tain ka pel ta hial a ni a, ka lawm ve em em a ni.

Ni dang kum danga kawla ni chhuak chhiara awfi s kalin kan chhuak ve ziah thin a, mahse tunah chuan han chhuahsan tur leh chhuahna tur a awm ta lo va, bakah natna benvawn avangin chhuah a har ta vei nen. A hun takah ka chawlin ka pension ta a ni berin ka hria, ni tin pisa turin chhuak leh dawn ta ila, a huphurhawm khawp ang. Patling ve riang ruang thin, mahni tawka inthazo leh fi t inti, kg 50 leh 49.50 ni ṭhin thawklehkhatah kg 6 ngawta nikuma ka tlahniam kha kg 44 pelh a har ta viau erawh ka tlawmngai deuh thin.



Tichuan ina tawm chawt mai chu ka ni tin hna a ni ta ber lo thei lo va, chhuak dawn ta pawh ni ila khaw nge ka kal anga ka len ang, tih pawh chu ngaihtuah tham a tling awm e. Pathian leh sawrkar zara kum 30 zet motor lo hmanga kawl ve kha ka lo chawlh takah chuan keima mimalin ka nei si lo, chu pawh chu ka buaina tling a, lo nei pawh ni ta ila, tun hmaa ka hmaa motor tlan ngai thei lo lehpel zel ṭhin kha, Lunglei leh Aizawl inkara ka tlan phei chuan ka hmaa mi chu ka pel vek ṭhin, horn pek pawh a ngai hranpa lutuk lo, min kian mai zel, chutianga motor khalha fi t inti ve ṭhin kha, ka khalh leh thei a ngem aw, tia inngaihtuah a lo tul ta zawk a.

Khatiang khawpa rei sawrkar zara lo kawl ve ta chu motor han neih loh chu a khawharthlak riau mai a ni ngawt lo va, mamawhna hi tunlai khawvelah a lo awm ve thin a. Chutiang chu a nih avangin ka pension te sawrkarin min tifelsak a, ka lak ve tur awm ang angte min pek ve hunah chuan motor te deuh man tam lo ka phutawk te chu ka la lei ve thei em em ang chu, tiin mahni leh mahni ka inhnem a, ka inkhap ka inkhap ve thin.

Chutiang dinhmuna han din takah chuan ṭhenawmte huan vela theihai parte chu kan hmun phak tawk a ni tain zing tin chhun ni sat lai leh tlai ni nema ka thlir ṭhin a ni ta. Ka hminga Ramfangzauva tih an lo sa lo hlauh chu tihzia hle ten kan hre leh hnuhnawh a. Lalfela, Lalṭhafamkima tih ni ve si, rukruk thubuaia mana tan ina tang deuh reng ka ang ang tih ka hlau a ni ber awm e.

Kan kawmthlanga theihai chu a vul em em a, kumin chu theihai par nasat kum a nih dawn hi, theihai a par nasat kum hi chuan thli a na duh tia an sawi ṭhinte chu ka ngaihtuah a. Ka bial a zim ang bawkin ka khawhawi pawh a zau lo tih chu rei pawh a nih hmain ka hre chhuak a. Kan sir leh chhak lam chu ka ka han hawi kual a, theihai kung dang a lo awm thluah a, theihai zawng zawng chu sawi loh, ka hmuh phak chin zim te maiah pawh a lo par vul vek awzawng lo mai le. A vul deuh a awm a, a para par reng reng lo pawh a lo awm hi a lo ni a.

Theihai par chu a mawi, tia han sawi tur a ni lo, a vula chu a vul hle a, a hnah pawh a hliahin a par lo chu hmuh tur pawh a awm meuh lo. Ni dang a par loh lai pawhin tlaiberh chu an fu fo thin a, sava dangte pawh. Tum khat chu a par a zar hmawr che liai liai chu ka hmu a, a han en chianga tlaiberh hi a lo awm reng mai a. Chutia ka en reng lai chuan a dang pahnih hi a bul lawkah chuan an lo awm a, ngai teh, mitkhapkar maiah chuan a dang pakhat hi a lo la awm cheu a. An vaiin pali lai an lo tawm hi a ni a, an hlim em em a, an hram a, tumah rengin engtin mah an ti si lo va. Mahse a par chuan zu thlum tak a nei lo va, a thlum lo pawh a nei chuang lo.



"Dante pawh hian vul lai an nei a, a vul leh vul lo pawh dan tho an ni"

Mizo AdvocateNakin deuhah chuan daikat sava te reuh te hi a lo kal a, a fu ving veng a, a par zu tlan turin a lo kal a nih hi tih mai awl a ni a, mahse a parin zu a neih loh avangin a vak velin chawlh hahdam nan a rawn hmang a lo ni a. Zu thlum tak nei se chuan maw, hla tak atangin khawivah an lo kal ang a, khawi aṭanga lo kal nge tih tumahin an hre lo ang a, khaw nge an haw leh ang tih lah an hre hek lo vang. 

Khawivahte chuan an awmna aṭanga hla tak taka pangpar rimte chu an hre thei ṭhin a, chutiang tur renga Khuanu duan leh ruat a ni si a. An taksate chu a vangtan zawngin a ṭial bing beng a. Khuaivah chang lo, zu nei chi khuaite chuan chutiangin parzu an dawtin an hawn ṭhin a ni. An ke an kaizaah hian parzu an zu lak khawm kha an dah bawk thliah a, engtin nge pangpar zu thlum tak, tuisik ang maia tui kha a khala an ke hnung lama an dah theih tih chu kan suangtuahna hian a pha zo lo hial a.



Chutiang chuan tlem te tein an theih anga tam siin pangpar zu kha an hawn khawm a, mahse theihai erawh chuan zu a nei lo thung. Chutianga khuai te tak te tein pangpar zu tlem te tea an lak khawm kha a then chu a bal a ni a, a then chu a zu a ni thung. Chu chu an tan chaw tui leh an rinpui ber a ni a. An tana khati khawpa tam lak khawm a harsata hun a duh rei dawn nen khan, keini a anpui ngeia a siam mihring zawkte khan khuai kan la a, an zute chu kan sawra kan hralh ta ṭhin a nih hi. Anni a neitu leh siamtute erawh chuan an hralh ve ngai si lo. Mahni ta ni lova mi dang thil pawisa hmuh nan leh mahni tana hlawk nana lo hman phet tum pawh thil siam dang ni loin a anpuia a siam keimahni bawk kan ni leh si ṭhin.

Khuaite tan malsawmna ni ve turin theihai chuan parzu a nei ve lo va, mahse kha a par aṭang khan a rah sen te tak te te a lo uai thiah thiah ang a, chu chu zawi zawiin a thang lian zel ang a, a tawpah chuan a lian chite phei chu kuttum aia lian lianten an lo rah hmin ang a, a kung a len avangin a rah a lian ngawt lo va, a tet vangin a te ngawt hek lo. Chi hrang hrang a awm a, anmahni awm dan tur leh nihphung tura Siamtu ruat ang angin an awm mai ṭhin.

Chung a rahte chu a lo hmin a, a thlumin a tui em em a, a hmin hma pawhin a thur a, chungte pawh chu mihringte tan chuan a tui a, an lo a, a rah chu a kawr an vel a, chi nen hmarcha nen tuiti em emin an ei a, kan tan chuan malsawma a ni ṭhin. A lo hmin a, chu chu a thur tawh lo va, a thlum em em a, kan ei ṭhin. Mi tam takin theihai an nei a, a rah chu an tan malsawmna a lo ni a, an ei a ni mai loin an hralh a, pawisa lak luh nan an hmang ṭhin a nih hi.

A par a ṭhen a vulin a langsar em em a, chutihlaiin a ṭhen an lo vul ve lem lo va, mahse theihai tho an ni. Chutiang chuan dante pawh hian vul lai an nei a, a vul leh vul lo pawh dan tho an ni e. PC Act, eiruk khapna dan hi theihai par ang khan vul sela, ram hmasawnna tur leh rethei chanai eiruk hmangho chu manin hrem hmiah hmiah mai ila, chung lam tan khian kan par a vul phian lo ang maw? Theihai par vul ang khan. 

Post a comment

Powered by Blogger.