Mizo Writer1971-a India leh Pakistan an indo khan Punjab-a Fazilka hmun chu an inkahna hmun lian ber pakhat a ni a, India leh Pakistan inrina hmun, a lehlam lehlam tan ral lehlam mai chu ral awmna hmun a ni.

Fazilka sector-ah chuan 3rd Bn Assam Regiment an tel a, he battalion hi Mizo tlangval thahnem tham tak awmna niin, a hmatawngah, Pakistan sipai hnaih bera rammu an ni.

Pakistan lama an hmatawngte chu an sipai chhuanvawr, Baluch Regiment an ni a, huaisen hmingthang Pathan-ho an ni tlangpui. Pathan sipai huaisen, hleitling leh hratkhawkhengte chu Mizo tlangvalin arpa chan an channa Assam Regiment nen an inep a nih ber chu. Pathan leh Mizo tlangvalte an inlen hleih bakah India leh Pakistan sipai kha an intam hleih hrim hrim a, kha indona hmunah khan Pakistan sipai pathumin India sipai pakhat an beihrawn zel ang a ni.

Silai a puak a, a hmetpuak hmasatu chu a tam zawk Pakistan lam an ni. Laipuiin bul an tan a, India lam an insiam chuk chuk laiin Pakistan sipaite chuan ramri an lo kan hman. Pakistan lamah Pakistan sipai, India lamah Pakistan sipai bawk; an inkarah Mizo tlangvalte telna India sipai. Chu chu a ni Mizo sipai an thi zo vek tawh tih thu a than tum kha ni.

Mizo sipai an thi zo vek lo; zanlaiah platoon commander Sub Thangnawna a 'round' a, thlasik khaw vawt 3°C velah thlan tuiin a bual huh hnep! Hav Doliana pawh "Sir, tunah firing order pe rawh," tiin a au. Sub Thangnawna leh Hav F Aihnuna te'n hahchawlh nan bunker-ah thingpui an lum! Hav Aihnuna'n cook house-ah thingpui lumna tur a va la vang vang a, bunker-ah chuan stove hmangin an lum ta a ni! India sipai pali an hmu a; pakhatin rifle a keng, pakhatin rizai a sin, a dang pahnihte chu pheikhawk pawh bun lovin an awm!

"Silai nen chuan kan tlan chak thei lo ang tih kan hlau a," tih chu silai an ken loh chhan an zawha an chhanna a ni a, tlan chak theih loh hlauva silai pawh keng ngam lovin rizai an sin leh tlat chhan chu "Khaw vawtin min hmet hlum ang tih kan hlau alawm," tih a ni. Mizo tlangvalin huh hnep khawpa an beih laiin an thiante chu rizaiin an lo intuam hlun!

Chu mite pali chu Mizo tlangvalte chuan thingpui an intir a!

An lawm turzia leh vai lawmin lawmthu an sawi thiamzia te ka ngaihtuah hian, an lawmthu sawi vel dan tur hi hriain ka inhre deuh reuh e a!

Khua a var ta; platoon commander Sub Thangnawna chuan an naute a'n fang kual leh a, chutih lai chuan Hav Aihnuna te awmnaah chuan Sapchhunga (sepoy) a rawn lang hlawl mai.

"Sub Thangnawna'n, 'Sapchhung, thingpui in lak ngam leh lak tur a awm,' min tia , keini ang meuh tan lak ngam loh tur a awm dawn em ni ka ti a, ka rawn la dawn," tih chu Sapchhunga tawngkam a ni.

Chung laia Mizo sipaite fiamthu tawngkam lar chu "KEINI ANG MEUH" tih a ni a, indona karah fiamthu te thawhin an han nui leh rih!
An thiante hlauva an khurh lai pawhin "keini ang meuh" titute chuan hlauh an sawi lo; 'Tu mah tlanchhe suh u,' tia an lam pawlte tlanchhe lo tura aute chu bai ei thin, tlak tui hawp thinte an ni a, hnungtawlh tura order an dawn avanga an hnungtawlh tum pawhin silai leh bomb puak ri dup dup karah an kalsan tak hmuna an chaw bel an va zawn leh ngat! Officer pakhat an kap hliam a, hmun hima hruai a ngai. An kal tur chu, chu officer chu a khur ta mai! Amah hruaitu tur Hav Zathangliana chuan, 'Hlau suh, silai mu lo kalna lamah hian ka awm zel dawn alawm,' a ti a, tiang chuan an inhliah phei ta a ni! chu havilder chu 'Hliahduailova pa' a ni ta nghe nghe!

Chu'ng chu ngaihnawm hi ka ti a, mak erawh ka ti lem lo - 'Mizo tlangval an ni tlat alawm' ka ti.

Mak tih pakhat erawh ka nei: ni thum an inkah hnuah, Pakistan sipai bei tura an insiam sang sang laiin an commanding officer, hming bula 'Lt Col' tih dah hial tawh khawpa lal chuan a thir lukhum a hmu zo ta tlat lo. An han zawnpui ngial pawhin an hmu thei ta si lo a, Hav F Aihnuna chuan ama thir lukhum khum lai chu zu kian a!

Hav F Aihnuna'n a kian hi ropui ka ti a, mahse mak ka ti vak chuang lo - 'Mizo tlangval a ni tlat alawm,' ka ti. An puin a lo duh kha a ni mak ka tih zawk chu!

Kha sipai officer kha Mizo tlangval ni se chu, 'A ngai lo e, ka lawm e,' a ti ang - a ti khawp ang - a ti tur a ni - a ti tur hi a ni ringawt!

Hnam ropuite u, tho teh u le. Chak tak leh chhel takin, fim tak leh fing takin, thiam tak leh thuawih takin aw.

ᴢɪᴀᴋᴛᴜ: 𝓛𝓪𝓵𝓱𝓻𝓾𝓪𝓲𝓽𝓵𝓾𝓪𝓷𝓰𝓪 𝓒𝓱𝓪𝔀𝓷𝓰𝓽𝓮

(𝙰 𝚣𝚒𝚊𝚔𝚝𝚞 𝙿𝚞 𝙷𝚛𝚞𝚊𝚒𝚝𝚎𝚊 𝚑𝚒 𝙼𝚉𝙿 𝙰𝚍𝚟𝚒𝚜𝚎𝚛 𝚗𝚒 𝚕𝚊𝚒 𝚊 𝚗𝚒.)

Post a Comment

Powered by Blogger.