Contact Form

Name

Email *

Message *

Iklan

Zoram, ṭang fan fan (Tun hi 'fimkhur hun' tak a ni e)

ToMZ
2 Apr 2020, Thursday, April 02, 2020 IST
Tetea HmarMarch 22 khan Prime Minister-in Janata Curfew nei turin mipuite a ngen a, Mizoram sorkarin Lockdown a lo puang chho bawk nen, Covid-19 kha kan 'hlau' a, kan phili buai a nih kha.

Ni a liam hret a, India ramah Covid-19 kai thar an pung zel a, March 25 khan Prime Minister chuan India ram pum ni 21 lockdown tur tih a puang ta. Mizoram sorkarin lockdown hi a lo kalpui sâ a ni bawk a, a boruak a rit a, kan hlauthawng dep dep hle.

KAN HLÄU, KAN KHÛR



Vanduaithlak takin Mizo zingah Covid-19 positive an awm tih hmuh chhuah a ni zui a, mipuite kan hlauthawng satliah tawh lo a, kan ralkhel a, kan phili a, kan chiai a, kan buai a ni. Khatih hunlai khan kan buai hle tih a hre chiangtu chu keimahni theuh hi kan ni.

Social media kan en a, Covid-19 chanchin hlir chhiar tur a awm a, chanchinbu leh TV lam pawh chutiang tho chu a ni. Covid-19 chungchang thudik tluantling lo a lo darh nasa, a buaina chinfelna lam aiin a buai belhchhahna lam hlir kan chhiar a, social media chu rilru tihahtu a ni.

Khaw tualah Local Level Task Force kan lo nei chho a, an tlangau dum dum a, hrui thlungin veng leh khúa an veng a; invenna hmanrua (PPE, mask, glove) indaih loh thu a lo ri ve sek bawk a, chhungril ah kan buai tlâng a, chu kan buaina chu kan social media nungchangah a hmuh theih.


KAN THA KHÛR A REH

Chutia hläu leh khura kan awm meklai chuan, Khilam remruatna tih loh theih loh turin TV kal tlangin rawngbawlna nung zet mai a lo lang ta - mipui rilru buai chu Pathian thuin an rawn thlamuan a, ngui leh zuai tawh chu kan lo phur leh ṭan ta. Muthlu naran pawh ni lo, hawi chhuak ngam tawh miah loa kun tlat tawhte pawhin beiseina thar an nei a, harhnate hial kan lo chang ta.

Kan boruak rit zualpui a reh deuh duak a, Mizoramah Covid-19 kai thar hriat belh a ni lo zel bawk nen, kan thlà a muang chho ṭan. A tira truck driver tlan tlang pawh phal lo khuate khan truck driver-te ei leh in tur an pe 'ngam' ta a; hlauh vanga inkharkhip thingtlang lam pawhin an chawhmehte la khawmin khawpuiah an thawn lut leh ta.

KAN 'CONFI' LEH ṬAN

Thlawhtheihna leh khualzin phur lirthei tlan ta lo chu Task Force lam pawhin a ven hna aiin ṭanpui hna an thawk chho a; khawpuiah Task Force member-ten ei leh in tur an zuar chho tan a, thlai hring chenin zawrh tur an nei chho. Inkharkhip a, inkhung reng e ti lo chuan kan nunphung a 'normal' chho ta lek lek mai.

Chanchin ṭha lo leh hlauhawm lam hlirin min bawhbeh hnuah chanchin ngaihnawm a lo lang tam chho zel a, mite inphalna leh inpekna kan hmu chho zel a, mahni thlà khat hlawh pe tawp ngamte hial an lo chhuak ta. A hma khan thim hlir kan hmu a, tunah êng a lo chhuak ?an a thim pawhin chu êng chu zawi zawiin a tlan bosan ve mêk.

Aizawlah veng tam takin an hrui thlun an phelh a, thlawhtheihna leh lirthei ber a luh tâk loh hnuah khaw thenkhatin 'venhimna' an thlah dul ta hret bawk - mipui kan kânglâng leh ṭan ta.



E KHAI, FIMKHUR ANG U!

Mizo mipuite u, hei hi fimkhur hun chu a ni. Hei hi nun uluk hun a ni. He hun tak hi pawn chhuak lo tura uar zawka infuih hun a ni. Tun hi inven hun pawimawh a ni. A ṭul a nih chuan Police leh Local Level Task Force tan pawh khauh that sawt hun a ni.

Tun kar hnih khat hi thuawihin inkhung ila, Covid-19 laka kan him theihna chance hi a säng hle niin lang. Kan inthlahdaha kan tihsual vaih chuan, a hmaa kan invenna leh beihna kha a thlawn a chang palh thei.

Mizote hi rik hluaiah kan ṭha a, kan teirei peih lo an ti leh ṭhin a, tun ṭum erawh thih leh dam chungchang a ni a, teirei peih a ngai a ni mai lo, a tawp thlen a ngai - chuti lo chu kan tawp daih thei!

Police-te pawh hah tawh hle mah se han bei leh ṭang ṭang se, Local Level Task Force lam pawh an chau tawh deuh a nih pawhin ṭan mar tlat hun a nih avangin insang mar thar leh hram se, an tlawmngai ta sâ sâ han bei leh fan fan teh se. Mipui pawh inkhung turin rilru siam thar zel ang aw.

Kan tih ve tur hi a tam lo a, chhuak loa inkhung a ni mai. Veng leh khaw tam takah chhuanchham vengtu tur Task Force an la awm zui bawk a, ram chhanna atan inah i tawm ang u khai. Hmanah kan pipute'n ram chhanna'n silai an lek chhuah a ngai a, hmun ralṭi tak taka an kal a ṭul - keini erawh kan ina kan awm mai hi ram chhanna tura kan tih tur chu a ni - i thei em em ang.

Heti zawng hian a hlimawm zawngin ngaihtuah teh - "Thuawih leh hram hram ang aw, kar hnih bâk 'mut mai mai' a ngai tawh dâwn lo e - Zoram, ṭang fan fan..."



- Lalnghinglova Hmar
Covid19 Road block Mizoram
Socia Distancing Mizoram
Socia Distancing Mizoram
Visitor's Voice

Click to Comment

No comments:

Mizo Nula Khal

+