COVID 19 DAMLO ENKAWLNA - PLASMA THERAPY HI ENG NGE A NIH?
(Damlo dam chhuak ten immunity an nei ang em?)

By: Dr. J. Lalramchhuanga MD (Medicine)

Covid 19 hripui lêngin khawvel a tuam mek a. Hei hian mi nawlpui zingah medical science a tui tharna leh hriat châkna nasa tak a neih tir a. A lawmawm hle mai.


Damdawi engpawh hi natna atana hmantlak ni tur chuan, enchhinna (clinical trials) vawi tam tak paltlang angai á¹­hin a. Enchhin dan pawh uluk tak a duan a ni a (RCT, meta-analysis leh peer review etc te paltlang vekin), chung zawng zawng a paltlang hnuah hmantlak tiin nemngheh ani chauh á¹­hin.

Covid 19 thlentu virus hi virus thar a nih avangin, a kim chang hriat a la ni lo. Hriat belh zel a ni a, a damdawi leh a vaccine tur pawh enchhin mek zel a ni. Damdawi á¹­henkhat enchhinna á¹­antirh lam a chanchin lawmawm tak nei tawh pawh, enchhinna uluk leh zau zawk neih hnu a hmantlak ta lo te pawh an awm. Mi á¹­henkhatin Hripui leng chanchin ngaihven a nih avangin, heng enchhinna te hi hmanhmawh takin an lo tlangzarh ta á¹­hin a. Mipuiten thudik zik tluaklo kan hriatphah ta á¹­hin a ni. Chuvangin, source pakhat a inziak chauh beh chhan a, thu theh darh hi a fuh ber lo thei a ni.

A NATNA KÂI DAMCHHUAKTEN A NATNA DOTU AN NEI ANG EM?

Virus in kan taksa a beih hian, kan taksa a natna dotu khâwlpui hian,natna hrik a luh aṭang a engemaw ti hnuah natna dotu (antibody)a siam chhuak ṭhin. Chung natna dotu te chuan natna hrik kha lo beiin, kan taksa in a tawrh lutuk hmain an lo hneh thei a ni (Humoral immunity). Kan taksa in natna a beih dan hi hei chauh lo pawh kawng tam tak a awm bawk. Damlo a dam hnuah pawh kha natna lakah khan, heng natna dotute (antibodies) hian hun engemaw chen chu veng thei tur a ngaih a ni a. Heng natna dotu antibody-te hi an damloh aṭanga kar 2-na velah a insiam tlangpui a. Antibody-te hi taksa a an cham rei zawng a in ang lo, a ṭhen chu thla engemaw zat an awm thei a, a ṭhen chu kum engemaw zat pawh a ni thei bawk. SARS (2002-03) vei tawhte'n natna dotu (IgG antibody) an neih hun chhung zirchianna ah chuan, kum 2 naah zaa 90 in natna dotu an la nei tih finfiah a ni a. Kum 3 hnuah erawh za 50 velin an la nei a hmuh a ni bawk. A natna a zirin a vên theih hun chhung a in anglo tihna a nih chu.

He Covid 19 thlentu bikah hian, a natna dotu antibody chu a awm ngei tih hi zirchianna hrang hranten an nemnghet a. Natna dotu tam lam ( antibody titre) erawh a in ang lo. A á¹­henah a tam deuh a,a á¹­henah a tlem deuh thung. Amaherawhchu, _natna dotu engzat in nge (antibody titer) min veng thei ang tih te? Eng chen nge a ven theih dawn?_ tihte chu hriat vek theih a la ni lo. Hun a kal zel ang a, an zir zel a, kan la hre thuai thei ang.

Khawvel ram á¹­henkhatin heng natna dotu (antibody) te hi dam chhuak tawhte thisen aá¹­angin an test a (Rapid antibody test) . Chu test result a zir chuan *Immunity passport / risk free certificate* pe chhuakin, hna an thawh á¹­an tir leh ta a. Hei tak hi WHO chuan tun dinhmun atan chuan, hnathawh tir phalnan leh pawn chhuah phalna atan a hman chu a la hma mah mah tiin, midang an kaichhawng theilo tih leh natna dotu engzahin nge (antibody titre) mihringte veng thei tih ala chiang lo a ni a ti a. Hetiang certificate nei te hian a invenna lam an ngaih pawimawhloh phah a hlau a ni.

A DAMLO DAMCHHUAKTE THISEN HI DAMLO TAN A DAMPUI THEIH RENG EM NI?

Thei e.
Covid 19 damlo dam chhuakte thisen hi Covid 19 damlo ah vek an pe leh a, hei hi "Plasma Therapy" an tih chu a ni . Dam chhuak tawhte thisen a natna dotu (antibody) insiam sa kha Covid 19 damlo vêk an pe a , chu chu natna do nan a lo hmang thei ta a ni.

India ramah pawh damlo kum 49 mi Max Hospital Delhi a Ventilator hman tir tawh, hetiang ang thisen an pek aá¹­anga hma rawn sawn a, damdawiin chhuah san thei chanchin kan hria a. A lawmawm tak zet a ni. Midang pawh Plasma therapy a enkawl mek an awm.

Virus hrik hi kan kâ, hrawk leh hnar aṭanga a lo luh khan, a ṭan tirh ni 7 aṭanga ni 8 chhung hi nasa takin a inthlahpung (viral replication) a. Hemi hun chhung hian damdawi antiviral hmangin a natna hi enkawl theih ani a, virus inthlahpung tur leh kan taksa a tichhe tur a veng thei a ni. Hetiang a hman tur Antivirals te hi enchhin mek an ni.

Tichuan, natna a lo serious zel khan. Virus chuan chuap a beiin a hliam ta a. An thâwkte alo hah a, pneumonia leh ARDS te an nei ta ṭhin a ni. Mahniin thawk an lak hleih theihloh a vangin, taksa in Oxygen mamawh khawp a hmu thei ta lova, Ventilator ah dah an ngai ta ṭhin a ni.

Natna kha a kal zel chuan, taksa in Cytokines tam tak siam chhuakin, chu chuan natna hrik a beih bakah taksa khâwlpui bei telin a tichhe ta ṭhin a ni ( Cytokine storm). He stage ah hi chuan kan taksa in natna dotu tur antibody a siamchhuak thei tawh lo. Kan taksa khawl pawimawh Lûng, Chuap, Kâl, Thin, Thluakte'n hna an thawk thei ta lova, organ failure alo awm ta a ni. Hetiang dinhmun a dingte tan chuan damlehna chance hi a hniam hle nghe nghe.

Chuvangin, damlo serious tawh, enkawlna kan hman mêkte sawt lutuk tawh lo hô-ah, Plasma therapy hi hman a ni tlangpui. An hman tawh hovah, an taksa in hma a sawn a. Ventilator aṭangin an lachhuak thei a,Oxygen pawn lam aṭanga pek an ngai tlem tial tial a, an chuap thlalak (imaging) pawhin hmuhtheihin hma a sawn chak bawk a ni an ti. Covid 19 avanga Plasma therapy pek tawh erawh mi tam tak an la ni lo.

He Plasma therapy atan a thisen pe turte hi an dam ngei tih finfiah nân, test (RT-PCR) vawi hnih a negative a ngai a . Antibody testing neiin, natna dotu an nei ngei tih fiah a ni bawk. An dam aṭanga kar 2 hnu ah an thisen hi lak a ni tlangpui.

Chu thisen chuan natna dotu (antibodies) engemaw zat a keng tel a, chu chu damlo serious tawh ten natna do nan an lo hmang thei ta a ni. Chu chuan beiseina sâng tak mithiamte a neihtir a. Ram engemaw zatah enchhin mek niin, India ramah pawh state 5 ah hman phalna ICMR in a pe tawh nghe nghe a ni. US FDA pawhin enchhinna (Clinical Trials) a tan leh emergency a hman atan a phal tawh bawk.

Plasma therapy hi Covid 19 mai bakah SARS, H1N1, MERS, Ebola leh natna dangah te pawh an lo hmang tawh á¹­hin a ni.

THISEN PETUTE TAN A HLAUHAWM EM? AN TAKSAAH NATNA DOTU A TLEM PHAH ANG EM?


Hlauhawm lo ve. Thisen vawi khat pek hian dose hnih zel a daih thei a. Tin, thisen ah pawh blood cells (RBCs, WBC, Platelets) ni lovin, a tuisik lai hi pek ani bawk. Heng hi mihringah a insiam chak hle a. I pek chhuah khan, a insiam leh zung zung thei. Mi pakhat pawhin vawi engemaw zat pe thei a sawi a ni. Hriselna in a tawrh phah lo. A lâkna Khawl (plasmapheresis) bik a awm a, hei hi Mizoramah pawh kan nei nghe nghe.

Plasma therapy atan a thisen pe theitu turte chu, Covid 19 avanga damlo damchhuak leh te chauh an ni.

Chutih rualin, thisen pek (blood donation) hrim hrim hi, engtik lai pawhin Blood bankah pek theih reng a ni. Hripui lenlai a ni a, thisen pe an thlahniam a, damdawiin ten thisen pektur kan mamawh reng bawk si. Hun khirh tak karah hian nunna chhan nan i thisen rawn pe ve ngei ang che.

Hripui lengin mihring nunna tam tak a suat mêk kârah. A damdawi diktak la hmuhchhuah loh leh a Vaccine enchhin mek a nih lai hian, Plasma therapy hian Covid 19 vanga damlo serious takte tan beiseina káwl êng a pe a ni kan tilo thei lovang.

28/04/20

Post a Comment

Powered by Blogger.