Pi C. Lalhmangaihtluangi hi a naupan laiin a pain a thihsan a. Harsatna tam tak paltlangin a nu-in a naute nen a enkawl chho va. Amah hi rilru nei tak a nih avangin zirna lamah te pawh mi pangngai chunglam a ni a. A nihna te chu a ṭhian ṭhenkhatte chuan an chhungkaw dinhmun ringawt ngaihtuaha hnuai en nan te an hmang lehling ṭhin a. Ṱum khat phei chu a tih loh tawp ti-a an zirtirtu hnena hệkin a ṭhiante chuan, “Hmeithai fa tệ tệ si” tih ṭawngkam te hial an hmang a ni. Ani chuan hetiang harsatna te pawh hi rilru hnual nana hmang lovin intihpachan nana hmang zawkin tumruhna nen hlawhtlinna kawng a zawh phah zel zawk a ni. Retheihna leh harsatna tam tak tuartute tana beiseina leh fuihna ṭha tak pe theitu, “Hmeithai Fa Tệ Tệ Si” bu a ziak ta nghe nghe a ni.
Hun rei tak chhung chu ‘brain tumour’-in a tlakbuak a. Rinna nghet tak neia a ṭawngṭaina chhangin Pathianin a tihdamsak ta bawk a ni. A lo puitlin chuan a nu hovin sikul ṭha tak an chệnna Luangmual/Zonuam-ah an din ta nghe nghe a. Tunah chuan pasal duhawm leh fel tak neiin Shillong-ah an awm a. Fate pawh duhawm tak tak an nei tawh a ni.
A dinhmun harsatna te chuan amah anga harsatna lo tâwk tawh ṭhin Pi Hmingliani a hmelhriattir a. A chanchin ngaihnawm tak chu lehkhabu ṭha takah a chantir ta a ni. Pi Hmingliani chanchin sawifiah thiam bertu Dr. C. Lalhmingliana chuan, “Mi dangte retheihnain a rahbeh laiin Pi Hmingliani chuan retheihna a rapbet a ni,” a ti a. Mizo fate zingah kei chuan Pi Hmingliani aia ngaihsanawm zawk ka hre chuang lo a ni.
Mipate Harh a Hun Ta Tak Zet, article hi tun hma kum 10 dawnlai tawha a ziak a ni a. Ṱha ka tihzawng tak a nih avangin Zoram Kalsiam V-ah khan ka telh nghe nghe a. Kan tunlai khawvelah hian kan mamawh lehzual tawh te pawh niin a hriat a, ka rawn chhuah leh a ni e.
MIPATE HARH A HUN TA TAK ZET.
- C. Lalhmangaihtluangi
Engnga tih tehreng nge maw ni, ka thil vei ve te hi a thi thei reng reng lo mai. Reh ahnekin nitin mai hian ka ngaituahna a luah tual tual bawk si a. Mahse, vei viau e ti lo chuan duh angin ka sawi chhuak thiam leh si lo.
Kristianna kan rama a lo luh hnuah nasa tak maiin kan Mizo hmeichhiate’n dinhmun ṭha leh hlu (a hma-a hmeichhe tih theih loha an lo ngaih) kan nei chho mek a, kan mithiam rual hmeichhiaten nasa takin hmeichhiate dinhmun chawikan nan tan an la reng bawk a, tih theih nei loa kan lo ngaih hmeichhiaten tih theih an lo nei tak meuh mai. Lehkha zir santir pawh ngai lova an lo ngaih hmeichhiaten Mizorama competition chi hrang hrang result-ah hma an hruai ta fo mai te, chhungkaw khaidingtu mipa ni thin kha vawiin ni kan Zoramah hian a ni ta lo emaw ni, nupui-pasal zawn kawngah te hian thil awmdan a inlet thawk niin a lang. Tunhma chuan nulain nupui fanaute chawm thei tur pasal an zawng ṭhin a, tunlaiah ve thung chuan mipain Hmeichhe sawrkar hnathawk chawmtheitu neih tur ringawt an melh tawh zawk emaw ni, bialnu atan pawh chutiangin, Kum tam liam hmaa hmeichhe rilru kha mipaten an rawn pu ta mai a ni lo maw! Zirnaah hmeichhiaten hma an hruai a, chhungkaw eizawnna lamah lah hmeichhe thawk chhuak an tam ta hle tih kan bazar atang te, office atang te leh kawng dang tam takah hmuh tur a awm. A ropuiin heng zawng zawngte hian kan Pi leh Pute ngaihdan pawh a tidanglam chiang kher mai. Hmeichhia te hian Zoram tlu chhe mek tur leh chhungkaw rethei tak te khaichhuakin, kawng engkima hmasawnna lian tak thlentu an nih hi an fakawm khawp mai.
Amaherawh chu, hetiang reng hian kan ram hi kal chho mup mup ta sela, eng nge a nghawng tur hi ngaihtuah ngam pawh niin ka hre lo. Tun atanga kum rei lo tệ-ah chuan eng emaw buaina kan hmachhawn ngei dawn ni hian ka hre tlat a, chung harsatna kan hmachhawn theih tam tak zinga thenkhat lo tarlang ta ila:-
Mipa hlutna a tla hniam ang:
Mithiamte’n upa thu hnungzang ruh, vengtu, khaidingtu, hmahruaitu, etc. tiin an hrilhfiah a. Pathianin mipa chu dinhmun sang tak leh mawhphurhna rit tak a aiawha chhungkaw enkawltu atan te, rorel feltu atan te, thlamuantu atan te,etc. a ruat a, Bible pawhin dah pawimawh berin Mipa chu hai rual lohin Hmeichhe lal (lu) a nih thu kan hmu. Chhungkaw hotupa chu kawng engkimah nupui fanaute mamawh kutkentu tur a nih laiin kan ramah hian chutianga mawhphurhna pawh hre lo leh mahni nupui fanaute tana rin ngam loh an nih tlat chuan hmeichhiaten theihtawpa hmalak a ngai a, mipa rintlak loh leh mahni nupui fanaute tana engmah ti thei lo an awm belh zel chuan mipa hlutna hre lo chhungkua pung tual tualin, chu chuan kawng chi hrang hrangah rah chhe tak a thlen thei a. Chung zing a pawi ber tur chu Upa ngaihsanna leh hlutna tla hniam tur hi a ni.
Sualna ṭhalai zingah a pung ang.
Mipain mipa an nihnaa nupui fanaute chawm an tum loh a, rintlak an nih tlat loh chuan chhungkaw nu berin fate ngaihsak hman lệk loin ei leh bar zawn a ngai ang a, kan ramah sualna a doa do tham a awm laia nu ber In-a a awm tlat loh chuan tunge fate enkawl ta ang?. Fate enkawl tur chuan khawvelah mahni hringtu nu tluk an awm si lo. Naupang tệ an nih lai atanga kaihruaitu an neih loh chuan an tamna ber tur chu khawlai a ni, khawlaia an tam tlat chuan naupang tệ e ti lovin sual chi hrang hrang an khawih thei tlat a. Zilhna ringawt hi kan rama fa inenkawlnaah a tawk tawh si lo. Nu, fate tana an pawimawh zia chu sawi tam ngai loin mitin thinlungah hian a chiang vek awm e. Naupang tệ tệ ruihtheih thilin a tihbuai hi tuna kan dinhmun aia nasa hian a thleng thei tlat a ni.
Broken family a pung ang.
Nu berin pa-a engtin nge ni dawn? tia zahtaka a rawn tlak pasal a neih miau loh chuan Lal lo tur zawk inchhung khurah a lal ang a. Chu chuan chhungkaw inkaihhruaina-ah nasa takin nghawng a nei ngei ang. Hmeithai chhungkuaah chuan Hmeichhia an lal tur a ni. Amaherawhchu, Pa ber awm na ve si a nu berin Lalna a neih tlat chuan chhungkaw inrelbawl dan chu a tha tawh lo hleah a ngaih theih a. Chutihrual erawh chuan engvanga nu berin lalna chang ta nge a nih ngaihtuah zui tham tak a ni. Pasal Patling tak nei chhungkuaah chuan mipa an zahawmin ṭhenawm khawveng tan pawh an zahawmzia hmuh tur a awm. Amaherawhchu, Pa ni ve ringawt a, patling leh si lo te chhungkuaah inṭhenna a thleng tam ber niin a lang. Hmeichhiain mahnia awm thlakhlelh zawkna a nei thei a, chu chuan inṭhen mai duhna a hring hmain, Broken family a pung zel dawn niin alang.
Nula, Pasal nei peih lo an pung ang.
Hmeichhia amah a inchawm zawh a, mipa tel lova fa enkawl theihna a neih tawh bawk chuan pasal neih peih lo nula an pung tual tual ang a. Mipa hlutna pate atanga an hmuh loh miau avangin Pasal neih chakna nei lo nulaten falak neih a, ṭulpui an thlang zawk thei tlat a ni, chu chuan kan ramah nghawng ṭha lo tak a nei thei a ni.
Hmeithai Chhungkua an pung ang.
Mipain tun ang zela zu leh ruihtheihthil an uar chhoh zel chuan kum naupang tệ-a thi an tam tulh tulh ang a. Hmeithai naupang tệ tệ leh Pa nei lo fahrah an pung zel thei. Heng hian nghawng tha lo tak tak leh harsatna chi hrang hrang rawn hrin chhuah belh zelin, chu harsatna chu tunah pawh kan hmachhawn mek a nih hi.
Sawi tur tam tak a awm âwm e. Tunlai mipaten ṭan in lak loh chuan kan ram hmabak tur hi a ệng lam aiin thim lamin min hmuak tlat niin a lang. Mipa chu hmeichhia hian eng ang pawhin tluk tum che u mah ila, kan tum nasat poh leh kan nih theih lohzia a chiang. Mipa mawhphurhna la ngam mipa Zoram hian kan va mamawh tak em! Hmeichhiaten heti taka chakna an neih chuan nangni Mizo mipa te u, a lệt tam chakna in nei tih hre thar ula. Rilru thar puin Hmeichhia te hmasawnna lệt tama hma in sawn theihna kha han lantir ve tak tak teh u. Thatchhiatna leh dawngdahna te, ruihtheih thil te, nawmsak tum rikngawtna te dah boin zahawmna leh taimakna, huaisenna leh dikna hmangin bul han ṭan ula, Mi zahawm chu an nunah hmuh tur a awm angin in zahawmna bo mai tur hi in nunin han lan chhuahtir hram hram teh u. Chuti lo zawngin kan ram hmabak hi a thimin ngaihtuah ngam pawh a ni lo. Mizo mipa kan chhuan ve em em te in ni si a. Belhchian dawl nun nei turin keini hmeichhia te hian kan beisei che u a ni. Pasal tha tak leh rintlak tak neih duh kan ni asin, in nupui leh Mizo nula te hi. Nangmahni avangin ram nuam leh chhungkaw hlimna thar a thleng thei a ni.
Chutih rualin Mizo hmeichhia te paw’n hei hi i hre thar ang u. Kan hmasawnna leh tih theih lo pung zel hi chhiatna thlentu-ah hmang loin, inngaitlawm leh thuhnuairawlh tak chungin kan mipa te zai i ngai thiam ang u. Pasal rawn tur nei tan Pasal te kutah intulût thiamin, kawng engkimah ‘pa-a’ tia rawn thlaptu nu hi fate leh ṭhenawm khawveng paw’n zahin, hmeichhe tih tur a ni tih theihnghilh lo ila. Chhungkaw ropuina chu in leh lo mawi, hausakna ni lovin mahni mawhphurhna ṭheuh hlena zahawm taka khawsak relthiamte hi an ni si a. MIZO MIPATE U, IN DINHMUNAH NGEI DING NGAM TEH U.
~Michael Lalmanzuala
Post a Comment