Zofa Mizoram chhung leh khawvel hmun hrang hranga awm te Good Friday chibai ka buk a che u, he Kristiante hunpui hian kan ramah thlamuanna leh beiseina thar min siam sela tih hi ka tawngtaina a ni.
Pathian leh Mizoram sorkar duhsakna avangin mawhphurhna sang tak, ramchhung mipui te hriselna ngaihtuah tura mawhphurhna chu ka chungah nghah a ni a. Tuna medical lam Health department-in hlawhtlinna kawng hranga kan neihte hi ka thawhpuite inpekna leh thawhrimna piah lamah mipuite tanpuina vang a ni tih ka sawi duh a. A bik takin tun Covid-19 hripui laka kan him theihna tura sorkar department hmalaknate theihtawpa min thlawpna avangin mipui te hnenah lawmthu department aiawhin ka sawi a, hun lo kal zelah pawh in tanpuina kan mamawh zel dawn a ni.
Kan khawvel hun tawng mek kan hria khawchhak, khawthlang, chhim leh hmar ram hrang hrangah hripui avangin thihnain thla a zar a. Ram ropui leh ram thang lai, ram rethei thiar lovin hripui chuan a Iuhkhung zel a. Khawchhak ram ropui leh thiltithei China chu nasa taka a tihchhiat hnuah khawthlang lam ram hrang hrangah chhiatna a thlen zel a, tunah chuan kan ram India ngeiah lo lutin Mizoram thlengin min tibuai tan ta.
Globalisation avangin khawvel ram hrang hrangte inkalpawhna siamin hausakna intawm hmasawnna a thleng a. He khawvel hmasawnna, Global Village ngei chu he hripui Covid-19 pawh hian remchanga hmangin a thiltihtheihna thehdarhna hmanrua atan a hmang a, khawvel pumpui chu thla tam pawh a vei hmain a vel chhuak ta. Globalisation-in ram hrang hrangte fan chhuak inkalpawhna tur kawngpui a sial a, Covid-19 chuan ram hrang hrangte chu tumah lutchhuak thei lo turin a inkharkhip tir thung a. Engtinnge he hripui hian khawvel a tihdanglam ang tih hi tumahin kan sawi thei lo, engtin nge India ram hi a kal zel ang a, Mizoram hi engtin nge a awm tih pawh kan sawi thei lo.
Pathian rinna leh beiseina nei lote tan chuan he hun thim hi a va hrehawm lehzual dawn em! Ringtute erawh kan danglamna chu Good Friday hnuah Thawhlehna Ni a awm tih beiseina kan neih hi a ni. Isua Krista chu bawhchhiatna sual avanga mihringte thih aiin Krossah tuarin a thi a. Krossa a thihna leh thlana phum a nih kha a tawpna ni ta sela, sual Setana leh a thuihruaite chuan hnehna an puang ang a, Pathian fapa nia inchhal Isua kan ngam ta tiin hnehna hlado an chham ngei ang. Nimahsela, Pathian thu ang zelin, Isua chu ni thum niah ropui takin a tho leh ta. "..muhilte thawh hmahruaitu a lo ni ta. Mihring avanga thihna a lo awm avangin, mihring avang vekin mitthi thawhlehna a lo awm ta bawk a" (1 Kor 15:20-21). Isua thawhlehna chuan sual avanga tawrhna zawng zawng te, bawhchhiatna sual avanga thihna leh lungngaihna zawng zawng te chu Isuan a hneh tawh tih a entir a ni. Ringtute tan chuan Good Friday hi a hlu a, a chhan chu Easter-in a zui vang a ni. Chuvangin, khawchhak mi, Pathian rawngbawltu pakhat C.S. Song chuan khawiah pawh Kross a awm chuan thawhlehna a awm thin, a ti hial a ni. Tuna kan harsatna pawh a ropuina turin Pathianin min hnehsak dawn tih hi i beisei ang u.
Tun tum hripui hi khawvel sorkar ropui leh thiltitheite, mifing leh Pathian awm pawh ring tawh lo khawpa mihring hriatnaa innghat te tan fiahna a ni. Mihring chu Pathianin ama anpuia siam thil tihtheihna nasa nei nimahsela, Siamtu Pathian tel lo chuan a famkim lo tih hi a tilang chiang hle mai. Tin, chubakah, mihring ropuina chu mihring nihna hriat chianna hi a ni tih tun tumah hian a langchiang bawk. Bawhchhiatna avanga mihring nihna dik tak pawh hrechiang tawh lo chu hriatna thar a pe a. Khawchhak lama chengte leh khawthlang lama chengte hi kan in ang lo emaw kan inti a, chutiangin tawng hrang leh culture hrang hrang te hian mihring nihnaah danglamna a siam emaw kan ti a. He hripui hian mihringte ang khatin danglamna awm lovin a sawisa a. Vun rawng avanga danglamna, mi ngo, mi eng, mi hang te tan pawh he hripui hi a hlauhawm vek a. Politics avanga inngeih lo te thlengin mihring nihnaah tan hona a siam a, chu chu Pathian anpuia danglam taka thil titheia siam kan nihna pawh a ni. Hawh u, Pathian ring tlatin khawvel a damlehna turin i thawk zel ang u.
Good Friday hian khawvel thiamloh a chantir lova, Good Friday chu Pathian hmangaihna avanga khawvel damlehna a ni zawk: "Khawvel thiamloh chantir turin Pathianin a fa khawvelah a tir lo, khawvel amah avanga an dam theihna turin a tir a ni zawk e" (Johana 3:17).
Pathianin awmpuiin veng zel che u rawh se.
~Dr. R Lalthangliana
Health Minister
Govt. of Mizoram
Post a Comment