Chawhmeh zawrhna hmun leh dah ṭhatna aiin thawmhnaw dâwr changkang kan sa hmasa a. Motor man to tak taka kan chil per leh kan pal khûk chawhmeh chu 'Show room' ami 'branded' thawmhnaw ha chungin kan khai hâwng ve hnak hnak a!

Aizawl BazaarKut hnathawktute khêlmual 'Agriculture Field' aiin 'Golf Field' kan ngaipawimawh zâwk si a. Kan ngaihsan lêm loh thingtlang lo neitute chawhmeh thar hmuh hlân nghakhlel reng rengin kan ring kan fan ang tak ṭâwk ṭâwk chu a ni si a!

Biakbûk kawngka a inkhar a. Zirtawp zâna bazar tûra khawlai dunga bengchheng kan tih viau ṭhinte leh tlaivara bazara riak thâwm an reh zova. Mahni thlai thar zawrhna hmun pawh chang ve lo kawngsir kama mi dawr inhawn hma leh khar hnu a inpho chhuak ve thei ṭâwk te hmêl hmuh tûr an awm ta lo.

Khêlmuala kan phul lem phah chu an la hring ṭhup a, kan chawhmeh bâwma kan thlai hnah erawh an ro ṭhiap thung si!

'Red Carpet' zawhtute aiin ni tina feh kawng zawhtute kan ṭangkaipui zâwk a. Sum tam tak neitute aiin thlai hnah hring hmeh theite chuan kan chil a ti pût ta!

Foreign-a zin chhuak tam te aiin mahni chuktuah huana feh ṭhin te thla a muangin an mu tui zâwk a. Thlawhna thâwm leh thlâwk ri a reh a, Sava thlâwk ri leh nungcha hram ri a ring ta!

Khawlum ber ni paw'n kan ralthuam neih ṭhat ber chu puan pan te a hmai tuam a ni a, in chibai ringawt pawh silai mu ai paw'n a hlauhawm ta.

A ni; Hun hi a inthlak thut thut a, hringnuna kan zir tel loh harsatna leh vanduaina hian hri chhia angin min tuam vêl a, mi hausa ber pawh a thih hun chuan vaivutah tho a ni a kir leh dâwn ni. He hripui hian mi rethei leh hausa tû mah a thliar hrang si lo.

Engtik niah emaw he hripui lêng hian kian zai a la rêl ve êm ang a, chutih hun chuan ngawi renga kan lo kal pelh fo ṭhinte hlutzia kha kan hrethiam ve tawh ngei ang.

Aw.... He hripui vang tal hian Zoram hi han ṭhanharh phah ve hlauh tehrêng i la aw!

@ziakmi_biru
-08042020

Post a comment

Powered by Blogger.