Lunglei ZaithiamF. Nghakliana @Nghaktea Fanai tia zoram khawvelin a zaithiam vanga hriat hlawh thin khan, rimawiah hun a hmang tam thei tawh lova, zirna lamah chhuanawm tak a ni a, helamah hian a rilru pein M.Sc a zawh hnuin a mahin a lo chak em em thin research lamah a lut a, Mizoram University-ah Cancer & Molecular Biology lamah Ph.D a ti mek.December ni 2, 1992 kumah piangin, tunah hian Ramzotlang, Serkawn, Lungleiah an khawsa mek.

Lunglei Times palaiin nen Nghaktea Fanai Inkawmna:

Zai lamah hian eng hunlai atangin nge i in hman tan a, rimawia i kawng zawh chhoh dan tur engtingnge?
Nghaktea : Naupan tet atanga zai tui ka ni a, ka hriat theih chinah mahni inchhungah dawhkan chunga dingin ka zai nasa thin hle. Chanmari, Lungleia kan awm laiin KNP kan hotuten min zai luih tir a, mipui hmaa ka zaina hmasak ber hi 2002 kum a ni a, chuta tang chuan Gospel rimawi khawvelah ka lut chho ta a ni. Tunah hian Music Video puitling hi 5 ka nei a, heng bakah hian midang nena kan zai hona video dang a awm nual bawk a. 2012 kumah Radio Artistes atan lakluh ka ni a, tunah hian All India Radio-ah hla 18 ka dah tawh a, tin, DDK lamah hla 12 ka dah tawh bawk. Mizoram hmun hrang hrang bakah Mizoram pawn leh India ram pawn thlengin zaia rawngbawlin ka lo kal kual tawh a ni.

Zirna lamah insawrbing ka duh chhoh tak avangin zai ka chhunzawm lutuk thei ta loa, Pathian rem a ti anih chuan zir tur zualpui kan zir zo tawh bawk a, zaia rawngbawlna lamah hmalak chhoh leh chu ka tum mek a ni. Zai ka chhunzawm theih tawhloh hnuah pawh Pathianin a rawngbawlna kawng dang min hawnsak zel a. Lehkha ka zirna hmuah rawngbawlna lam zirlai pawl hrang hrang- Evangelical Union leh Campus Fellowship hrang hrangah hruaitu nihnate tlinglo takin ka lo chelh ve thin, a ti.

Zirna lama i kawngzawh dan engnge?
Nghaktea : Zirna lamah Pathian malsawmna ka dawng nasa em em a, Southern Flower School, Chanmari, Lunglei atangin zirna ka tan a, hemi hnuah Holy Faith English School, Venglaiah ka lut chho a. He school atang hian HSLC distinction-ah ka pass a. Chumi hnuah Baptist Higher Secondary School atangin Class XII Science 1st division-ah ka pass leh a. Hemi hnu hian B.Sc Zoology zir zawmin Lungei Gov’t College ah ka lut a. B.Sc hi distinction-ah tho passin, Mizoram pumah 3na ka ni nghe nghe a ni. 

B.Sc zawhah hian Mizoram University lamah M.Sc Zoology ka zir zawm a, hetah pawh hian University Gold Medalist ka ni a, M.Sc ka zir lai vekin, ka vawi khat exam naah CSIR-NET te pawh ka paltlang a ni. M.Sc ka zawh hnu hian ka chak ber thin research lamah ka lut a. Tunah hian MZU-ah vek Cancer & Molecular Biology lamah Ph.D ka ti mek a ni. Heng bakah hian school, college leh university ka zir lai hian intihsiakna hrang hrang (essay writing, drama writing, poetry writing, debate,etc) ah te lawmman hrang hrang ka la thin bawk a, heng zingah hian State level leh intercollege intihsiakna an awm nual bawk.

Thalaiteah i vei zawng han sawi teh?
Nghaktea : Tunlai thalaite, a bikin tleirawl rual zinga ka vei em em chu mahni tana thahnemngaihna chang hrelo kan tam em em a, taihmakna kan tlachham hle. Zirna emaw kawng dangah emaw pawh ni se, theihtawp chhuah meuha bei hi Lunglei thalaite zingah an tamlo hle a. Lunglei thalaite hi district dang aia kan thiamloh bikna a awm lova. Tunlaiah phei chuan thiamna a sang tawh a, mahni awm hmunah duh duh a her chhuah theih tawh avangin sap ram thlengin kan fang thei a, zirna atan an zirlaibute kan zir theia, sport lamah ni se an hman ang hmanrua kan chah thleng thei tawh bawk, chutiang zelin, khawvel hmun hrang hranga an hman ang ang hi helaiah kan hmang ve thei reng tawh a. Hei hi remchanga la thiam, taima tan chuan dinchhuahpuina tham a ni.

Lunglei atangin kawng hrang hrangah mithiam tak tak leh hlawhtling tak tak an lo chhuak tawh a, an chhuak mek zel bawk a. Hmun danga thalaite thianghim takin an in el nasa em em a, keini pawh chutianga zelin, kan thil tih engah pawh theihtawp chhuah ila. A pawimawh berah chuan malsawmna leh hlawhtlinna bul chu Pathian a ni a, Pathian bel tlat chung theihtawp chhuahin, Lunglei ti hmingthatu ni zel ang u. Lunglei hmakhua hi tu kutah mah a awm bik lova, kan zavai kutah a awm e.

-Lunglei Times

Post a Comment

Powered by Blogger.