IAS HNA THAWK ṬHA 10 THLAN CHHUAH ZINGA PAHNIHNA

SHASHANKA ALA, IAS

LAWNGTLAI DEPUTY COMMISSIONER:

IAS HNA THAWK ṬHA 10 THLAN CHHUAH ZINGA PAHNIHNA

Shashanka Ala, IAS chu Lawngtlai DC-a a kal hlim phei chuan a fapa naupang tê chu Aganwadi Centre-ah a kaltír ve a. A fapa chu aganwadi centre aṭanga a lo haw chuan dailuah leh buhfai chhum loh hi a rawn hàwn a.; Shashanka Ala chuan a fapa thil rawn hawn a hmuh chuan mak a ti hle mai!

Thil a han chhui chian hnûah chuan aganwadi centre leh sikul-a naupangte chu ei leh bàrah an mamawh ang an hmu zo lo tih a hmu chhuak a. Chu bákah chuan aganwadi centre-te chu a changtlung lo hle tih a hre ta bawk a; naupangte chu chaw ei tùr an pe lo a, thei tharlâm an pe hek lo a, thlai ei tùr lah an nei hek lo.

Lawngtlai chu Mizoramah pawh a hnufual ber páwl a ni a. An mamawh tam ber chu Assam rama Silchar aṭanga rawn phurh luh, ni hnih ni thum thang ngai a ni. An thil rawn phurh thlen tam tak chu chhe ṭawih tawh te a nih bákah a ṭha awm chhun pawh a man a to hle bawk.

Héng harsatna ching fel tùr hian Shashanka Ala leh a hote chuan “Kan Sikul, Kan Huan” (My School, My Farm) tih chu an din a; chûng huanah chuan thlai an chíng ta a ni. A tìrah chuan harsatna tam tak an táwk a; thlai chi lah duh ang táwk an hmu thei hek lo. Tui an tlachham hle bawk.

Nimahsela, Shashanka Ala chu a thil tumah chuan a ding nghet tlat a; a project chuan tûnah chuan aganwadi centre leh sikul 713 a thleng tawh a ni.

‘Kan Sikul, Kan Huan’-ah chuan thlai inbànlet thei chite an chíng a; thlai chi kûi ṭiahna (nursery beds) an siam bawk a; thlai hnah hring ei chi te, thei te, mosola lam chite thlengin an chíng a. Mizoram sawrkar chauh ni loin Central sawrkar beng a thleng ta hial a ni. Central sawrkar pawhin ṭanpuinate pawh a rawn pe ta a ni.

Tûnah chuan Shashanka Ala chuan ran leh ár vulh lamte pawh tih tùrin a ruahman ta zél a; chutianga an tih hlawhtlin chuan sikul naupang ei leh in chhe lutuk pawh a lo ṭhat phah thei dâwn a ni.

Shashanka Ala chuan, “Hmun pilril záwkah bul ṭan kan duh a. Harsatna tam tak a awm ngei ang; mahse chûngte chu kan tân chona nasa tak a ni. Mipui rin hlawh a ngai a; an rin kan hlawh chuan mipui pawhin min ṭanpui zél ang. Kan thil tih tam tak hi thil thar a ni lo; thil hlui, theihnghilh tawh hnû kha kan ti thar chauh zâwk a ni,” a ti.

Shashanka Ala pasal Bupesh Chaudhuri, IAS hi Siaha DC a ni thung a; ani pawh hian Siaha District tân thil ṭha tam tak a tihsak tawh a ni. Hmân ni lawk pawh khân Maraland hmarcha her dip an rawn pho chhuah kha. Bupesh Chaudhuri hi Mamit DC, Bru voters chungchâng avànga an duh loh, an ûm chhuah kha a ni a; Siaha-ah erawh chuan DC ṭha tak leh inpe zo tak a ni a; thil thar tam tak a tihsak tawh a ni.

Shashanka Ala hi Kristian a ni a; chawlhkár tàwpah Siaha-ah a pasal hnénah a chho ṭhin a; Pathianniah chuan ECM Biak Inah an chhûngkuain an inkhâwm ṭhin.

-Rev. Chuauthuama

Revd CHṬ—26.5.2020