Covid-19 avangin C. Lalzarmawia’n hla thar pahnih Pathian hnen atangin a dawng


Hlaphuah thiam leh zaithiam ni bawk C. Lalzarmawia chuan, Covid-19 avanga Lockdown a hmang tangkai hle a, a hlaphuah chi hrang hrang zinga 70 vel zette chu Zaipawl in an sak dawn pawha a aw kim a solfa a an en vek theihna turin a buaipui char char a; hengte hi a bu a siam a tihchhuah a tum.

Lunglei Times palaiin a kawmnaah Zarmawia chuan, Covid-19 avangin Pathian-in hla thar pahnih a pe, tih a sawi a, 'Nang ka himna i ni' tih leh 'I lam kan lo hawi' tihte a ni a, hengte hi miin lyrics video an siam sak a, 'Nang ka himna i ni' tih hi a nupui Mamuani'n a sa a, youtube-ah dah a ni ( https://youtu.be/e-KYJiN_0n4 ) a ni a, 'I lam kan lo hawi' tih hi a mahin sain hei pawh hi Youtube-ah (https://youtu.be/Nglqc MbMdzY ) dah a ni.

Covid-19 hri leng mek chungchangah Zarmawia chuan, Joba kha fiahna a tan Pathian remtihnain Setana'n a khawih a, a nunna erawh zuah a ni a, hetiang tho hian tuna hri leng mekah pawh hian a fapa min pe phaltu Pathian hriatpuina a thleng a nih avangin, a thlamuan thlak a, Ringtu tan hlauh lutuk pawh niin ka hre lo, a ti.

Zawhna chhangin Zarmawia chuan, Mizote-ah Kristian chi hi tuh a ni tawh a, Mizoram pawnah pawh, sakhaw dang tam takin an hual vel kara Mizo lo awmte reng reng hi Kristian an ni zel a, Mizoram hi Pathian zawnchhuah ram a ni, an ti thin a, a dik hlein ka hria. Heti chung hian a zawnchhuah nih hlut zia erawh kan hre ta lo deuh niin a lang, a ti.

Kumin January 11 khan Zarmawia hnenah hian Union Biblical Seminary, International House of Prayer Kansas City, Texas, USA., Imanuel Thelogical Institute leh Online Bible College Myanmar te tawngkawpin rimawi lama a thawh hlawk em avangte, a rawngbawlna avangtein Master of Music nihna an pe.

Hemi chungchanga Lunglei Times palai zawhna chhangin, Hetiang hi pek tlak niin ka inhre lova, dawn loh mai ka duh laiin, ka nupui Lalrammuani'n, ‘Chennai a Music i zirna zawng zawngah certificate nei lovin i awm a, Pathianin Certificate a pek che a ni' min ti a, insit tak chungin ka dawng a ni, a ti.

Zarmawi chuan, Chennai a music ka zir laiin, thlabi a fee pek a ngai a, Exam fee a grade a zirin a sang em em a, pek tur ka neih loh avangin Certificate nei lovin ka lo chhuak a, mahni in khawngaihna avangin vawiin thlengin ka ngaihtuah chang chuan hrehawm ka ti em em thin a, mahse, Pathianin a hria a, ti hian min pe ta niin ka ngai, a ti.

Tun hmaa Live album an lo siam tawh thin C. Lalzarmawia Hlate tia zaithiam hrang hrangin an sak ang kha kuminah siam tumin, an inbuatsaih nasa hle a, Aizawlah hla zirin final rehearsal chiah an hmabak tawh tihin Covid-19 avangin a tih theih ta loh a, hun remchang hmasa berah tih puitlin a tum.

Lunglei Times
C. Lalzarmawia Chhiato

Post a Comment

Powered by Blogger.