Ramthar Lunglei a Pu F. Lalzarliana leh KC Thanseii te fapa F.Malsawmkima (Malsawma Fanai) hi M_SPACE PRODUCTION neitu a ni a, film siam kawngah Mizoram mipuiten a kuthnu hmua an duh em avangin, demand nasa tak dawngin tunah hian a awm mek a ni. A film lo siam tawhte chu : - (1) Anabaino (2) Lungloh Tui (3) Damna kim (4) Kima's Lode (5) WHERE (6) Thingtlang Tlangvalte an ni.

Malsawma FanaiMalsawma Fanai tia kan hriat lar F. Malsawmkima hi Zoram khawvelah tunlaiah ngat chuan, a ni tluk a, Film siam kawngah Zoram mipuiin an mamawh hi a awm lovang a tih theih awm e.

M_Space Production tih kan hmuh rual hian Malsawma Fanai tih hi rilruah lang nghal se a tha awm e.

Lungleiah media lamah tawn hriat ngah tak a ni tawh a, Doordarshan stringer niin MJA Lungleia member hun engemaw chen a lo ni tawh a, tunah hian a hna avangin Aizawlah a awm mek. Hemi chungchangah hian Lunglei Times in a biak pawhnaah Malsawma Fanai (MSA) chuan, Hnathawh tak tak kan duh a, Aizawl atangin project a tam lo thei lova, ‘Lungleiah puk chawpa film siam kan tih laiin, Aizawlah chuan, hetiang hi a ni lova, kan hnathawhna a tan khawpuia awm a tul avangin Aizawlah ka nupui fanau te nen kan awm a ni’, tiin Lunglei Times palai a hrilh.

Msa hian, DDK stringer kalsan a, film lam a luhna chhan Lunglei Times in a zawt a, ‘Musicvideo siamin bul kan \an a, mimal leh zaipawlte nen chuan musicvideo hi 100 chuang kan siam ve tawhin ka hria a, Pensy, Bethsy leh Temii te trio musicvideo te hi kan siam a ni ve a, Bethsy hla ‘Min Hmangaih si a’ tihte leh Pensy hla engemaw zattte hi kan siam a, helamah hian demand a san avangin kan kal lo thei lo, a ti.

Tunlai hian Baptist Church of Mizoram (BCM) hruaituten Mizorama missionary hmasa ber Sap Upa leh Pu Buanga te chanchin film a siam an duh a, MSA hi an dawr mek a, he film siam tur hian thutlukna MSA hian a la siam lo. An la inbe chho mek.

A film siam zinga mi ‘Grace’ chu a OST (Original soundtract) chiah lockdown hmain tihchhuah hman a ni a, hmun hrang hrang 100 chuangah show tura sawmna a awm laiin, Covid 19 lockdown avangin an ruahman ang hian an kal thei ta lova, mi tam takin ticket an lo lei tawh a, hengte hi refund lovin tihchhuah theih a nih huna an hman turin ruahmanna siam a nih thu Msa Chuan Lunglei Times a hrilh.

Grace film OST tihchhuah hian, hlut a hlawh hle a, Msa hian comment tam tak a dawng tawh a, he film OST avang ringawt hian piangthar leh harhthar engemaw zat an awm tawh thu feedback a dawng tawh tih Lunglei Times a hrilh.

Msa hi MSACS hnuaiah hun enge maw chen AIDS Project ah a lo thawk ve tawh a, chu mi hnuah Doordharshan Aizawl hnuai ah Lunglei District a tan a Stinger in Kum 6 vel a thawk tawh a, Film making lam a a kal tak a vang hian DDK lam a a hna hi a bansan ta a ni.
Central KTP nen ‘Lungloh Tui’ film an lo siam ho tawh a, MTKP nen ‘WHERE’ Human trafficking film an lo ti dun tawh bawk a. Heng bak ah hian DDK tan Serial engemaw zat a lo buaipui ve tawh bawk.

Msa chuan, Pathian khawngaihna in Film hi ka lo siam ve ta nual a, a tam zawk hi mi dang nen a thawk ho a siam te an ni hlawm a, keima Direct na hnuai a ka siam hmasak ber chu ‘Thingtlang Tlangval’ kha a ni. Mahni pual a Christian film siam hi ka chak em em thin a, Chu ka duh na chu Pathian in min hriat sak a GRACE film hi tun hnaiah khan kan han siam puitling ve leh ta, Mizoram hmun hrang hrang 100 chuang a tang in booking a rawn lut a, Covid 19 a vangin show hi kan nei thei ta rih lo a ni, a ti.

Mizoram pawn lamah hian Zuala chhangte Direct na hnuaiah Kima's Lode hi kan buaipui ve tawh a, he film hi Children Film Society of India lam ta niin Cinematographer hna ka thawk a, he film hian National Award pawh a dawng nghe nge a ni, a ti.

Msa chuan, thuchah duh a neihte hetiang hian a sawi : - - A hmasa ber ah chuan Pathian hi Tih phawt mai ila thil dang hi chu a fel maiin ka hria. Kan ram ah pawh Pathian tih lo kan tam lutuk tawh hian kan ram hmel a ti chhia in ka hria. Kan Pathian thu in "Lalpa tihnain miin sual a kalsan thin" a tih ang khan Pathian kan tihna a vang a eizawnna hmun ah, hnathawhna hmun ah sual kalsan ngam kan nih hi a pawimawh hle in ka hria.

Media line a kal mi tha tak tak leh thiam na ril tak tak nei mahse rei daih ta lo ka hre nual mai. An chet sual fo thinna chu ZU leh ruihtheih thilah an tlan avang leh mipat hmeichhiatna (Sex) lam ah an tlan vang a ni. Chung mi te chuan rei an daih ngai lo. He lam a kan tui a he lam kawng hi kan zawh dawn a nih chuan rilru nghet tak nei a he line hi kan luh a tha hle in ka hria. Media line ah hian heng ang thil hi a awlsam bik tlat thin, a ti.

Msa film siam hit zet mai ‘Thingtlang Tangval’ Youtube lama lo thlir duhte tan a link hetiang hi a ni e : -
https://youtu.be/aXzB3nyLD-w

Lunglei Times

Post a comment

Powered by Blogger.