A zaithiam avanga hriat hlawh tak C.R. Laldingliani chu, Myanmar Evangelical Fellowship Conference, Tahan, Kalay Myo-ah zai tura sawm a nih angin a kal a, 10th March 2020-ah Lunglei a lo thleng leh. Mizoramah Covid-19 avanga ram dang atanga lo lutte quarantine tura tih a nih angin, quarantine a ni a, he a hun hi a hmang zo daih tawh a, a mahah virus kai nia rin hlelhna engmah a awm lo.
Lunglei Times pa laiin be pawpin, Foreign-a a zin avangin, eng angin, nge miin an ngaih a, Covid-19 avangin, tawngka eng engte nge i dawn? tiin a zawt a, CRi chuan, Tahan kan thlen tirh phat atangin China ram a hnaih tak deuh avang a ni maithei, Mizoram atangin min rawn thinhrik nghal em em ringawt.
A awm kan tih pui viau a, min en dan hi awm tiin kan in pawm viau a, inthlahrung takin mahni ram ngeiah kan rawn haw leh a, sorkarin tih tur a tih leh tih loh a tihte chu zawmin home quarantine pawh kan ti ve thlap a ni.
Pathianin min hum a, virus kan kai lova, kan lawm khawp mai a, hetih lai hian tawngkam deng khawng leh na tak tak kan tawng chhunzawm ta zel mai a, a mak ka ti hle.
Quarantine complete hmasa pawl ka ni a, ni 40 a liam tawh a, heti chung hian nimin thleng khan phone mai bakah hmaichhanah ngei pawh ‘ Nang hi i hlauhawm’ tih tawngkam leh hriat nuam lo tak tak ka la dawng zel a, a hrehawm khawp mai, a ti.
CRi chuan, Kei chauh lo pawh Mizoram pawn atanga rawn haw quarantine ve te pawh hetiang tho hi an lo ni a, rilru na tak tak pawh an lo awm nual mai a, inthlahrung tak a mahni ram a haw ten hetiang kan tawk hi a hrehawmin a pawi ka ti a, a hman leh thei nazawngin lo tawng khum a, chet zia a lan tir hi Mizote hian kan sim a ngai hlein ka hria a, hrehawm takin mi nun kan siam tihte hi kan ngaihtuah a ngai khawpin ka hria a ti.
Cri hian zirna lamah MA a zo tawh a, zaia sawmna a dawn tam avangin, a tei chhuak reng a, zirna lam pawh chhunzawm lovin enge maw chen a awm hnuah, DIET Lungleiah B.Ed ti lehin tunah hian 4th semester zirlai a ni a, Home quarantine a zawh fel hnua Lockdown chhungin eng angin nge zirna lamah hian a inbuatsaih tia zawhna chu chhangin, ‘Class kan kal thei ta si lova, kan zirtirtuten min duhsak a, online notes bakah practical leh assignment te min rawn pe nual a, hengte hmang hian ka in zirna a, lockdown hi ka hmang tangkai hlein ka hria’, a ti.
Mizorama Lockdown neih mekah mipuiin invenna a tana a pawimawh tih hriain thu an awih viauin i hria em? tia zawhna chu, ‘A nawlpui chuan kan awih a tih theih mai a, mahse, tlangau an au zin danah thu hian awih vak lo pawh an awm a nih a rinawm’ a ti.
Tuna Mizo mipuiin an ngaihven em em, IR Battalion a Sipai pahnih Chakma hovin kut an thlak chungchangah hian sawi duh i nei ve hrim hrim em? tiin Lunglei Times palaiin a zawt a, a chhanna chu ‘Mizo mipaten chakma kut an tuar hi pawi ka tiin ka rilru a na tak zet a ni. Tuna hripui boruakah lehnghal, kan himna tura min vengtuten hetiang ang an tawk hian ka thinlung a ti na tak zet a, kutthlaktute hi a na thei ang bera hrem nise, ka duh’ a ti.
-Lunglei Times
Post a Comment