Ka mikhualna khuaa vêng pakhat, Hmar Veng kawng hnuai bul maia Assam type rangva in chu han en mai pawhin a chhunga chengte khawsak dan tur awm tâwk inzawh a ngai lo. Mahse chu in leh a chhunga chengte chuan ka thinlung hi an luah reng a. A bikin an fate zinga upa ber, nula inngaitlâwm tak, khawvel mawina thil ropui inbel tur reng reng nei lo chuan ka khawvel nun hi a her danglam bawih a. Chu tak chu ka tana thawnthu ngaihnawm, thawnthu lungchhiat thlâk, mittui titlatu a nih avangin ka theihnghilh thei lo. Theihnghilh tum ila ka thei dawn chuang lo va, chuvangin ka tum buai lo law law.

Khawiah Tuan Che Maw            Middle School sport lai a ni a. Playground sira sikul naupang zi mur mur leh sport entu mipui tlim hmur kârah chuan nula sam tawi hmeih hmawih, a koki vaw pha chang chang, hnawihsen vang ni lo, a pianpui tisa mawinain a ken tel avanga hmui sen ling hlar mai leh ir no chek mai chu ka va melh a. Vanneih asiamin kan mit leh mit chu a intawng siah; a zak sen ap ap chu hmuhnawm tham a ni. 
            Kan inbiak hmasak ber tum chuan zahzum hmel takin atawng bah deuh niaih a. Ka hmêl en ngam lo niawm takin a kun ngaih a. Chuta a rawn hawi chhuak leh chu a nui var var a.   
          An ina ka lên hmasak ber zan chuan keimah zâwk ka tawng tha ngam lo va; min lenpuitu ka thianpa lo zei deuh lo phei se ka mualpho der ang chu. Sawi tur a vang thei khawp mai. Chumi zan ka haw tur chu sekawtrawlh thleng min thlah a. “Mang tha mai le,” a tizo chiahin inthlahrun hmel taka, “Naktuk zanah i lo leng leh dawn nia aw,” a tizawm tluka chanchin tha dang awm thei hian ka hre tawh lo. 

            A zan thumna-ah chuan an bangkil thlang lama an tape recorder te reuh tê chu a han zaitir a. Dan McCafferty-a chuan

“Every single day
I think of the times
When you were still mine
And I’m blue,”

tih hla chu a rawn thlawh ta vau vau mai a. Kan boruakin a zir bawk a, ni dang zawng aiin a mawi ka ti. Chu hla chu ka thinlungah hian a châm reng a. Chu hla vêk chuan he thu hi min ziahtir ta a ni. 

            Engkim mai chu duhthusam a ni ber e. Chawlhkar hnih a han liam meuh chuan a tir lama rawn leng lût ve thin tlangval dangte hmêl pawh hmuh tur an awm ta lo va; a nu leh pate pawhin dip enah min en lo. A kut bâwr lum thar thar ka vawnsak hmasak ber tum chuan a khur dar dar a. Min hnial lo naa a zam hle tih hai rual a ni lo. Nula naran kut bawrte chu kan lo vawnsak nawk nawk tawh a, engahmah an ngai lo va, keini pawhin engahmah kan ngai lo. Chumi zan chuan thua sawifiah rual loh leh hlaa phuah chhuah rual loh thil eng engemaw, inhmangaihte pahnih kâra thil pawimawh, damchhung daih hial tur, kan thinlung chhun tlanga kan rilru zawng zawng min khawrh chhuahsak vektu thil a thleng chho reng a. Sawi chhuah dawna thil ho tê, a tawngtu tâna sawifiah rual loh thil thleng chuan khawvel hi a tinuam hliah hliah mai a ni. 

            Ni leh thla a ral a, kan induhna pawh a la pângngai reng. Mahse khawvel chu keini pahnih duhdan ngawta her thei a ni si lo. Ni khat chu ka thawhna lama kan hotute hnen atangin khaw dang hla tak, mêl sang chuang fêa insawnna tur thupêk ka hmu ta a. Hna ka thawh dawna rinawmna thu ka tiam zawng zawngte kha sirah hnawlin chu khaw te reuh têah chuan ka cham hlen mai dâwn em ni? Rilru a buai nak mai. 

            Ka insawn hmâ zan, kan zan hnuhnung berah chuan ni danga a zahzum thin tehreng nen; a zak zo ta bik lo va. Ka nghawnga mi uai pah chuan a chhing diar diar a. A mittui a tling piau va, chutah a rawn far fap fap a.

“I tel lovin engtin nge ka awm ang? Kal lo mai rawh.”

Kal lo thei ka ni si lo va, ka chhâng thei lo. Ni danga a hmui te chu a sen mawi a, a biang te chu a mam nalh thin nen, a hmui chu a dâng lêp a, a mittui luanna biang chu thinlung tihnim tur tâwk lek hian a rang niau lehnghal! 

Zing lam dâr hniha in ka thlen phei leh chuan sakawr sawi hlim ang mai ka ni,  ka thu zawi hnawk a. Ka tlaivar chiang ngei mai. Zing ni chhuah rual velin chu khaw te reuh tê, map-ah pawh lang pha mang lo tur chu beidawnna kâra beiseina tlêm tê la awm nen chuan ka chhuahsan ta hnak hnak a.

   Eng tin tin emaw ni kum chu a lo ral ve mai. Lehkha kan inthawn thin a; mahse a khât tial tial. A kum hnihna chanve-ah phei chuan a reh ta hmak mai.

   Kan inthen atanga kum thum a pumhlum têp tihah chawlh ka la a. Ka chhungte hnenah chuan eng tin tin emawni chhuanlam siamin an khua chu ka va tlawh leh a. Hmar Veng kawng hnuai ka va thleng a, thin a phu dup dup mai. An kawt ka thleng chu an inhmun kha a lo ruak huai a. Tunhmaa Assam type rangva in dinna-ah chuan bawng in niawm tak a lo ding a. An choka hmun phei chu a awl der. 

Chutia hrilhai taka ka din lâi chuan ka hmêlhriat an thenawm nula chu a rawn kal hlauh mai a. Thil awm dan ka lo zâwt. 



Kha tia, ka insawn hnu lawk khan a pain nupui dang a nei a. Chutia chhungkaw chawmtu berin nupui dang nei ta daih chu a nu mangang chuan thingtlang khuaa a nutate belin a fate chu a pem pui a. Chuta an va pemna-ah chuan ka thiani chuan hum sual daiin thla khat kal ta khan pasal a nei a nih chu. Thil awm dan min hrilhtuin ‘hum sual’ a tih tak mai chu tun thleng hian ka la hre thiam lo va, eng dictionary mahin min hrilhfiahsak lo vang. Zawh belh pawh ngaiin ka hre lo. 

Ka mitthla chuan a sam leng vawn vawn ka hui khawmsak lâia a nui ar ar te, ka awm bawra a biang no thep mai thukru pah a, “Kal lo mai rawh,” a tih lâi te kha a rawn lang zut zut a. Kan intawn hmasak ber ni atangin ka han chhui kir leh a. Ka rilru-ah chuan an tape recorder te reuh têa

“Every single day
I think of the times
When you were still mine
And I’m blue,”

tih hla kan ngaihthlâk dun thin kha a rawn ri leh a. Ni e, hmanah chuan ka ta a ni thin a, kan pahnih chauha kan hlim dun theihzia kha ka theihnghilh ngai lo asin.
           
"I don’t miss all the fun that we had
You were always around me"

Tunah erawh khaw’ nge a awm pawh ka hre tawh si lo. An khua ka chhuahsan hmasak tum aia beidawng zâwkin chu khaw te reuh tê chu damchhunga tlawh leh tawh ngai lo turin ka chhuahsan leh ta hna hna a.

~Dana Khiangte

Post a comment

Powered by Blogger.