Beautician LalthangpuiiKuminah Mizoram district hrang hranga Mizoram Journalists Association (MJA) ten Miss Mizoram intihsiakna turah an district aiawhtu tur an thlang a, MJA Lungleiin Miss a tana a thlan R. Lalsangzeli mawi taka cheitu beautician kha Lalthangpuii a ni.

S. Lungleng a  F. Lalremruata leh Lalpêkthangi te fanu a ni a, tunah hian Ramthar Lungleiah a khawsa mek.

Mi ti thawt thawt lo, nun zawi tak, zakzum tak a ni a, zirna lamah B.A. a zo tawh a, sorkara luhna remchang ngaihtuahin DIET Lungleiah a training a,  hemi result a nghah chhung hian,  GLOW Beauty Parlor, Venglai Lungleiah a inhlawh a. Heta a thawh atang hian beauty culture hi a tui zawng tak mai a lo ni tih a inhrechhuak ta a ni. Thuk zawka luhchilh duhna neiin rilru a siam chho a, Chhungkaw dinhmunah mite anga khawsak awlsam leh nu leh paten an chawm mai theihte a nih ve loh avangin he beauty culture lama a zir chhunzawm lehna atan hian dawrah inhlawhfain a sum hmuh theih ang ang te chu a inkhawl.


Kum 2006 khan HLUTEA HAIR AND BEAUTY, Aizawlah hair and make-up lam tih tak tak a zir a luhchilh turin a sum khawl tlemte nen a phei a, a tum ber a zir a, ei leh in tur mamawh dangte dap a ngai bawk a, theihtawp takmeuh a chhuah a, ‘Pathian leh min duhsaktute zarah training paha inhlawhna turte ka hmu ve zel a ni’ a ti. 
2007 -ah a zir chhuak a, sum neihsa a nei lova, heti chung hian indapchawp bawkin Lungleiah dawr a hawng.

Malsawmna a dawng hle a, a kutchhuak chuan ngaihhlut a hlawh a, dawrah chauh ni lovin, In lamah te an ko chamchi ta a, chu mai a ni lova, a hnena training diltute pawh an awm chho zel a, inneihnaa mo chei tura sawmna te a dawng nasa a, a indaih ta lo hle a ni. 

Hetianga indaih lo khawpa hna a nei ta chu, Pathian vang a ni tih a hria a, ‘Ka tan chuan hlawhtlinna hlu tak a ni’ a ti.

Hetiang dinhmun a thlen chhoh hnu hian duh tawk mai lovin, zir belh a, thiam belh zel duhna lian tak a neih avangin, a mah leh a naute enkawl chungin kum 2019 khan  In zir belh zel duhna neiin a mah leh a naute enkawl a inchawmin 2019 khan Joseph Hauzel, Aizawlah hair colouring leh sam chei a enkawl dan a va zir belh leh. Thangpuii chuan, Josepha hnen atang hian thil tam tak ka zirchhuak a. Ka hlawkin ka lawm em em a ni. Ka chhungten ka hmalakna leh hnathawhnaah min thlawp that em avangin, ka lawm a, min fuihtu tha tak an ni’ a ti.
Lunglei Times in Thalaite hnena thuchah duh a neihte sawi tura a ngen angin hetiang hian Thangpuii chuan a sawi : - 
"Ka thalaipuite hnenah hei hi chah ve ka duh a. “Beauty Culture hi miin tih takzeta a beih a, a tuipui chuan eizawnna tling a ni a. Mahse mi tih vang emaw chhungte nawrna vang emaw a, mahni a tumna leh tuina awm si lova tih mai mai erawh chuan engmah lovah a chan theih a. Mahse taima leh rinawm takin, tuichilh a kan thawh erawh chuan eizawnna tling a ni tih hi kan hriat ka duh. 

"Hlawhtling tur chuan taihmak, tumruh, tuarchhel a ngai a. Mite tih duhloh tha zawng zawng kan tih a ngaih hun te a awm a. Min dawrtute zahawmna kan zah sak fo pawh a ngai a. Pathian hriatna nena tih takzeta kan beih chuan Beauty Culture hi eizawnna atan a tling em em a ni.

Lockdown chhunga a hun hman dan hetiang hian a sawi : - 
Kan hriat theuh angin khawvel pum Covid19 in min tihbuai vanga lockdown a kan awm chhung pawhin in lamah ka theih ang angin Youtube te en in makeup te ka practice  pah renga he hun hi tangkai takin ka hmang a ni, a ti.

LUNGLEI TIMES

Post a Comment

Powered by Blogger.