Mizo film lar tak taka kan hmuh thin Isaak Rosangliana hi Salem, Lunglei a cheng a ni a, C. Saihmingliana leh HC Pari te fa Pali zinga pathumna a ni.
Zirna lamah Kum 2016 khan Mizoram University atangin MSW a zo tawh a, an chhungkuain Lungleiah Classic Restaurant neiin hemi enkawl pui leh catering lamte tiin a hun a hmang chho mek.
Rimawi lamah a inhmang nual tawh a, rimawi ngaina tak a ni a, musical instrument-ah chuan drums a khawih tam ber a, MTKP Inkhawmpui ah House Band-ah te pawh lo tang tawhin C. Lalzarmawia Album-ah te pawh hnuhma a lo nei tawh.
Infiamna lamah football leh futsal a ngaina hle a, taksa sawizawi leh physical exercise maintain ngai pawimawh tak mihring a ni bawk.
Salem TKP film siam Damna kim leh Leitlang Picture in Norah film a siamah te khan a chang a, a channa Dengi I Love You tih chu, peih mai tawh tur a nih laiin, lockdown avangin chhunzawm theih a ni ta lova, kumin tawp lamah chuan a chhuak hman tura ngaih a ni.
A thalai puite hnena a thuchah hetiang hi a ni : -
Mahni engmah nilo mah ila, ka thalai pui te zinga chah duh ka neih ve leh ka phak ang tawka ka vei ve em em thin chu, thalai ten thawh hreh kan ngah ta lutuk te, hna kan tih hian eng chin nge kan huam tir a, eng chin hi nge hna tak tak anga kan ngaih tih lai hi ngun taka kan ngaihtuah a ngai tawh in ka hria.
Zir san lamahte kan intlansiak suau suau a, a tha lutuk e, mahse heng te hian engmah thawh nei siloa hna thenkhat thawh zahna leh thawh hrehna min thlen tam tir ta lutuk te hi a pawi ka ti, mahni thalai pui ngei pawh hna chungchang ah a thawh a hmaa duhâm kan han tan ringawt te, engmah thawh nei hauh siloa hna kan han hmu hniam nghal em em ringawt te hi kan insiamthar a ngai takzet in ka hria.
Hnam changkang apiangin mahni in chawm thei hi an ngaisâng a, chutiang chiah chuan mahni kan in chawm theihna te, chhungkua kan chawm theihna eng hna pawh hi kan hausak pui emaw hausak pui lo emaw, a zahawm in hna tling tak a ni tih hi kan hmuhthiam a hun tawh in ka hria.
Inti changkang taka thawh neih siloh te, thawh hreh ngah em em si te hi thalaite hian kan sim a hun tawh takzet ka ti a ni.
-Lunglei Times
Post a Comment