MIZO HMEICHHE DAM REI BER Pi Darrohnuni A CHAWL TA

ToMZ
29 May 2020, Friday, May 29, 2020 IST
MIZO HMEICHHE DAM REI BER Pi Darrohnuni Kum 108 (1912-2020) A CHAWL TA.

Pi Darrohnuni 28th May, 2020 (KPNS) :- Tunlaia Mizo Hmeichhe zinga dam rei ber nia ngaih, Pi Darrohnuni chu May 28, 2020 chawhnu lam dar 1:10 khan a chennain Kawrthahah a boral. Zanah men tlaivar pui a ni ang a, may 29,2020 chawhma dar 10:00 ah Rev. C. Lalmalsawma chuan a vui ang. Amah hi Presbyterian Kohhran a ni.

Pi Darrohnuni hi Pi Chempuii leh Pu Sena te fa piang 10 zinga parukna niin August ni 1, 1912 khan Thaidawrah apiang a. Hetih hunlai hian an pem kual nasa hle a. Pukzing, Thaidawr, Mauro leh Kawnpui-ahte an awm hnu in, 1925 bawr velah Kawrthahah an lo lut a. A thihni thlengin Kawrthahah hian a awm ta a ni.

1938 khan Upa Liankhuma Khiangte nen inneiin fa pahnih Rev. K. Lalchhuangliana h/o Lianthangpuii, Kawrthah. leh Lalnunmawii w/o Challiana, Kawrthah. an nei a, Fa pahnih chauh an la nei tihin a pasal Upa Liankhuma hian vanduaithlak takin Biakin hmanraw laknaa chesualin 1947 khan a boral san a, Pasal dang nei lovin a fate hi a ṭulpui ta a ni. Khup thum hmu a damin tu leh tuchhuan 41 a nei .

Amah hi mi hlim thei tak mai a ni a. Hei hi a damrei chhan ber pakhat pawh a ni awm e. A mit hi a sawisel avangin Doctor hnenah inentirin a mit hi thai sak tawh a ni a. Chumi atang chuan a mit pawh hi a sawisel leh ta lova. 2012-a kum 100 a tlin lawmna ruai tur buhfai pawh la thlei ve thei khawpin a hriselin a mit pawh a fiah rei hle a ni. Hemi kum vek hian Kawrthah khaw Centenary lawmnaah Meichher chi kaitu niin a hlim ber te zing a mi a ni.

2018 MLA thlan pawh khan vote la thlak ve hram hramin Mizorama hmeichhe vote thlaktu upa ber - “Oldest Female Voter” nihna hauhin Chawimawina certificate pawh Sawrkarin a hlan nghe nghe a ni. Hetianga a damrei chhan han zawh chang hian, "Pathian khawngaihna vang alawm," tiin a chhang mai ṭhin.

Pi Darrohnuni
Dammawh hritlan leh khawsikte hi a nei khat khawp mai a. Tun hnai deuh khan a thawk a hah a. Âwmna a nei nia hriat a nih avangin May ni 10, 2020 khan Kawrthah damdawiinah admit a ni a. Oxygen pek niin damdawia enkawl a ni a. Zanhnih vel an riahpui hnuah amah hian haw a ngen reng avangin in lama inenkawl chhunzawm turin May ni 12, 2020 khan hawpui a ni leh ta a ni.

A tu leh fate’n an tlaivarpui thin a. A chang chuan phone hmangin hlate an zaitir chu lo zawm ve in thei leh thei lovin a kutte pharin a lo beng ve thin a. Amah hian “Dam hi ka ning tawh ani, min kaltir tawh mai rawh u, min hruaitu tur pawh Vantirhkoh hmeltha tak tak an lo kal tawh hi,” te a ti thin a ni.

Oxygen nena enkawl reng a ni chung pawhin ṭhat lam a pan hlei thei ta lova, Ni 27.05.2020 zan atang phei chuan engmah a eiin a lem thei tawh lova. Zawi zawia hniam lam pan hret hretin ni 28.05.2020 chawhnu dar 1:10 ah Lalpa hnenah a chawl ta a ni. A kalsan tak, a chhung leh khat te bakah Kawrthah khawtlang chuan an uiin, 'Kan khaw ro hlu kan chan ta," tiin an sûn nasa hle a ni.

Source: S Marema Khiangte‎
Visitor's Voice

Click to Comment

No comments:

Mizo Nula Khal

+