Patling nawi si hi kan chhiatpui ni ta berin ka hria, kei zawng!

PATLING NAWI

Dr. Hrekima Titi Hmeichhia hi ka khawngaih thin. Nu leh pa duat lai kha palai tir meuhin an bulaizawl atangin kan va sawm chhuak a. "Hmangaih a, enkawl a, rawngbawlsak" intiamin a hmaa an chenna aia nuam zawk hauh loah kan luhpui ve khat khat a. Vawi khat pawh chaw la barh lotu kha an lo luh zan atanga 'ka nu, ka pa' an tih theih nghal loh chuan chum zawt kan inpeih leh si! An la hmuh than ngai hauh loh lam hla deuh ami thlengin chhungte ang chiaha en turin kan han beisei nghal a. An tih theih loh vaih chuan 'mo sual' hming kan pe thuai bawk si. A harsat ka rin thin tehlul nen, anni lah hian an thei nghal zel mai bawk a. Hmeichhia hi an fakawm asin!

An innghahna ber, an thlamuanna tur ber an pasalte chu an thutiama an din phawt chuan hmeichhia hian hmachhawn ngam loh an nei lo a ni ber. Pasal tha hi an mamawh ber a ni tawp mai. Chutiang pasal tha, innghahna tlak, hmangaih a, enkawl a, rawngbawlsaktu an neih phawt chuan rethei deuh pawhin, ei tur tha mumal awm lo pawhin, kekawrte mawng tet leh elastic rul deuh ha chung pawhin hlim takin an awm thei nia! A pasal ber awmah thlamuang taka a bei theih chuan 'mother in law syndrome' te hi chu an paltlang thei zel nia!!

Mahse nupui nei ve ngam ngat zingah hian patling nawi fe fe hi kan lo tam em a. Nupui neihin a ken tel mawhphurhna hre hauh lo, zir thar tum chuang lo, hriat sa pawh nun pui peih chuang lo, a hminga 'pa' ni satliah ho hian hmeichhe rilru tha hi kan tichhe fo a, an nulat laia hlim thei em emte khan țap chungin rilru daktawr an pan phah țhin a nih chu!

Nupui neih tuk atanga zu rui tlat, zing atanga zan thlenga khum beta thla khat tawp zu in ra mai mai, in loh ve lai pawha engmah thawh tum chuang si lo, nupui thlavang hauh ngam lo, nupuite hlim leh hlim loh ngaihtuah miah lote pa thenkhat an awm nia!

Nupuite zawk chawhmeh zuara eizawng thawhchhuah sa ring ve ngawt patling, zan rei tak tak thleng leng kual a, phone games addict ve tawp, ina awm tum pawha nupui fanaute biak ngam loh khawpa vin hlur, phone khal nileng zan khua țhin pate hi zuk awm bawk a!

Engvangin nge mipain nupui kan neih? Chhungkaw thar din zel hi Pathian remruat a nih miau avangin remruattu remruat chhan hre chiang mang lo pawh hian nupui neih nachang hi kan hre riau a ni. Original chhungkua ațanga inla hranga chhungkaw thar din a, chhungkaw thar din leh zel thei tura thlah nei chhawng leh zel tur kan ni. Nupui fanau chawm a, ngaihsak a, an hlimna zawn a, an thlavang hauh a, venhim a, an taksa leh rilru leh thlarau mamawh phuhruk hi patling mawhphurhna a ni. Chu chu nupui kan neih chhan chu a ni.

Pumruaah chuan puitling ve si, mipat hmeichhiatna thua thiam thui ve zek si, nupui neih nachang hre fu zingah hian mahni mawhphurhna hre lo, patling nawi tak tak hi kan tam awm mang e ka ti!

Nupuite thlavang hauh ngam leh si lo tur te, nupui fanau chawm tura kut zungte pakhat pawh phut euh peih leh si lo tura thatchhia te, zu leh ruihhlo dang baka phone thlenga nupuite addict san leh tur si te, hmeichhia leh naupang takngial pawh control zo loa kaihruai leh thiam lo tur si te, Biak in leh Pathian hnen hruai thleng zo lo leh tur si te, hmeichhia leh naupang tithlabar tawk leka inti mipa ve satliah te, chhungkaw tak tak, tupawh an zalen a, an hlim a, hma an sawn vek theihna tur chhungkua din thiam lo leh si turte hi chuan nupui hi neih loh tawp tur a ni.

Pasal nihnain a ken mawhphurhna keng tlang ngam tur chauh hian nupui nei ila, chhungkua din ila, kan ram hian hma kan sawn chauh ang. Ram leh hnam thu hi chhungkuaah bawk bul țan a ngai țhin si a.

Patling nawi si hi kan chhiatpui ni ta berin ka hria, kei zawng!

Post a comment

Powered by Blogger.