Covid-19 avanga inkhãrkhip hun chhüng chhūtin thla hnih zet chu a liam ta. Tãn ina tãng ni ta ila hrehawm kan ti teh ang chu aw!!! Tãng ni ēm lo mah ila hrehawm kan ti ngawih ngawih a ni tih chu hai rual a ni lo. Khawlaia vah chhuah chãkin a zatin ka za chung ni berin a lang.
Ramri vēn a tul em? tih chhannaah chuan- "Tūl teh rēng mai" tih a ni. Mahse, a vēng lo turte'n kan vēng erawh a dik tawk lo. Khawii ram pawhin an ramri chu an vēnhim a tūl a; an vēng uluk thei hle bawk.
India hian ram dang nena inrina pasarih a nei. Chungte chu- Bhutan, Bangladesh, China, Afghanistan, Myanmar, Nepal, Pakistan & maritime borders - Sri Lanka, Maldives leh Indonesia-te a ni. Hengte hi Km. 15,106.7-a thui leh coastline Km 7,516- a thui a a ni. Ramri veng tur hian Border Security Force (BSF) Dec. 1, 1965 khan din a ni a, Central Armed Police Forces 7 zinga mi a ni. BSF-te hian Indo-Pakistan & Indo-Bangladesh ramri an veng a. Sashastra Seema Bal (SSB)-te'n India-Bhutan leh India-Nepal ramri an vēng thung. Kum 1963-a din a ni a, thawk lai mi 94,26 an awm mek. Indo-Tibetan Border Police (ITBP)-te hian Sino-Indian border an vēng a, Oct. 24, 1962-a din niin tunah thawk lai mi 89,432 an awm mek. Assam Rifles-te'n Indo-Myanmar border an vēng a. Kum 1835-a din niin thawk lai mi 63,747 an awm. India hian Central Armed Police Force 7 lai nei mah se an vaiin ramri vēngtu atan a dah lem lo.
Mizoramah Myanmar ramri 510 Km veng turin Assam Rifles leh Bangladesh ramri 318 Km veng turin BSF dah an ni. India ramri vēn ngai 15,106.7 Km atanga chhūtin Mizoram ramri vēn ngai chu 828 Km chauh kan nei a nih chu! BSF tang lai hi 257,363 an awm a, Assam Rifles hi 63,747 an awm bawk. , An pahnih belhkhawm ringawt hi 321,110 an ni. Central Armed Forces 7 hi an vaiin nuai 10 chuang zet an tling a, Mizoram mihring zãt thuak an awm tihna a ni.
Heng bakah hian kan tualchhunga duty tur leh thenawm state ramri vēng tur Mizoram Armed Police (MAP) battalion 3, IR battalion 5 & MRP 1,000 chuang vel an awm. MAP & IR-te hi battalion khat zelah chawhrualin mi 650 awm anga chhutin mi 5,200 an awm tihna a ni a, MRP nen belhkhawmin mi 6,200 chuang an awm nia ngaih theih a ni. Kan State police bikte hian state ramri pathum Assam, Manipur & Tripura-te hi hneh takin an vēng thei a; International ramri 838 km vēng tur BSF & AR-te hi an indaih hle niin a lang. Ramri vēn hi a tul takzet a, mahse, covid-19 avanga civil miin kan vēng erawh hi chu kan tih tur a ni lo tih kan hriat a, huaisen taka kan inhnuhkir ngam a ngai niin a lang.
MNF Founder President Pu Laldenga (L) kha a huaisen hle. A rorel hun lai (1986--87) vela Assam Rifle-in Civil mi an kah chiam tum khan Central Sorkarah zualkovin Assam Rifles-te kha *Hel*(rebel) an ni e" tiin a puh hmiah a, Central Sorkarin a rang a rangin Assam Rifle awm laite sawn chhuakin a hmaa awmsaho a rawn dah let leh hmiah mai a nih kha!
Khawii ramah mah ramri vēngtu atan civil mi an awm ngai lo niin a lang. Civil mi chu venghimtu sipai leh police-ho venhimna hnuaiah thlamuang tak leh zalēn takin an awm zãwk thin.
Kan Sorkar chak tak hian civil mi ramria duty-te hi huaisen takin kokir ngam se; Pu Dēnga ang bawk khan huaisen takin tuna ramri civil-in an vēnna khãn zawng zawng hi hneh taka vēng thei turin Central Sorkarah BSF & AR dil belhin a ramg thei ang berin inthlak nghal vat se a duhawm hle. A chhan chu:
1. Ramri duty-te'n hripui avanga harsatna tawkte sum bãwm CM Relief Fund leh thawhlãwm dangte an pawhhêkpui reng a ngai niin a lang a, hei hian retheihna min thlen nasat lehzual phah niin a lang.
2. Ramri duty tlawhtute leh duty-te'n Social distancing an zawm tha lova, SOP an ngai pawimawh tawk lo niin a ngaih theih bakah hripui pu darhtu an ni thei.
3. Ramri duty-te PPE leh invēnna hmanrua pēk ve reng an ngai a, Healthcare personnel-te tan harsatna thlen phahtu a la ni thei.
4. CM Relief Fund leh thawhlawm dangte pēk ve ngai tawh lo, hlawh neisa police leh sipai duty an awm a, buai belhchhahna mai leh hna chuang tlai thaawhna mai niin a lang.
5. Central & State sorkarin tling tãwka sipai atana a lakte rin tãwk lohna tilangtu lian tak a ni thei.
CM leh Council of Ministers, MLA's -te'n an hlawh thenkhat ui lovin covid Fund atan an thawh a, alawmawm takzet a ni. Tin, NGO, mi thahnemngai, company, sorkar hnathawk thenkhat leh mi chihrang hrangte'n CM Relief Fund etc. an thawh tawhin an thawh mek bawka a laawm hle. Tin, Council of Ministesr-in inrenchemna tur a duang zui bawk a, duh ang thlap la ni lo mah se a lawmawm thawkhat hle.
Sorkar hnathawk tam zawkte pawhin a hmaa rawt chhinna kha siamrem ngai siam remin kaltlangpui mai se'ng chuan a tha ni mai tur. Tunah State sum dinhmunin a zir loh avangin 10-15% Sorkar hnthawk hlawh bat thensak an ngai leh dawn tho si niin a lang. Kan budget pumpui atanga chhūtin sorkar hnathawk hlawh leh pension hlawhah 84.20% hman a ngai a; chutiang tur chuan Central atanga sum dawn tur a awm si loh chuan State Sorkarin a hnathawkte hlawh pek kim ngaihna a hre tawh lo a ni ber a, ministry a lu a haiin a khawngaihthlak hle.
Tuna kan CM zahawm tak hi a khawngaihthlak hle a. A hun lai apiangin harsatna liantham a thleng emaw tih tur a ni leh nghal a, ram mipuite'n theihtawp chhuaha kan tawngpui a ngai takzet niin a lang.
Sorkar hnathawkin hlawh an lãk mumal loh rual rualin ram mipui, sumdawnna, kohhran, public & private sector-in a tuar nghal a; kan zavaiin kan tuar thin. Chuvangin, tūl lova ramria sum sēnna hautak tak kan insiambelh mēk hi tãwpsan ngam ila, State dang leh rampãwn lama kan mizopui unau mangang tangkhang mēkte hi ko khawm vat vat thei turin ngaihtuah tlang zawk ila a finthlak zawk ngei ang State Sorkarin sum a neih mumal loh avangin state pãwn leh ram pãwna kan unaute hian harsatna nasa tak an tãwk mek a, an khawngaihthlak takzet a ni. Kan Sorkar hian ramria civil duty chungchang hi ngaihtuah rang se a va'n tha dawn em!
Ziaktu: Dr. C. Lalrampana
Post a Comment