PIC kan hmuh hi Coronavirus hripui leng mek lakah kan ram leh hnam a him theih nana ram mu te EK IN a ni a, an lainatawm hle mai. Mihring te hian inthiar hun kan neih dan te hi a inang hlawm si lo va, kan ram leh hnam damna tura ram mu mek hian mamawh an nei tam chho tial tial dawn niin a lang bawk, Fur khua kan hnaih tial tiala, inthiarna mumal tak, ruahsur leh thli tleh karah pawh hmun him nuam taka an inthiar theihna turin kan Sorlar pawh hian ram mu te hi an mamawh tur te a ngaihtuah mai ni lovin, a tak ram a thlen tir nghal zel a ṭul tak zet bawk.
Khawvel chawkbuai a ti mangang a, ti ralkheltu, Coronavirus hripui hlauhawm leh tawrawt, mihring nunna nuaih tam tak suattu chuan duhtawk tih reng ni nei lovin khawvel hi thihna hlim kawr ruamah chan tir tumin a vawk lal len mek zela, a hmaah chuan mi fing leh hausa te pawhin an nihna an hmachhuan thei lo va, Politician hmelhriat neih ṭhat lahin kori a tu hek lo. Minister leh MLA vuah leh vang nih pawhin awmzia a nei lo va, hmuh theihin a inlar lo va, a thlenchin leh awmna chin hriat theih turin ri emaw, thawm ri va emaw a nei hek lo!! A hming leh a tûr hlauhawm tak hmanga a man tawh te chanchin hriat zawng pawha hmulthi ti dinga, thauvah min ṭham thei, a lakah chuan leilung hi hlauvin a khur a ni ber.
Chutiang hripui hruanghrau leh tawrhhlelhawm tak chuan vanduai thilthuah he kan ram neih chhun hi min rawn luhchilh ve ta mai sela, a rapthlak tur zia chu sawi hian a siak lo va, kan tan chuan tawrh zawh rual a ni dawn lo va, a ram pum mai hian nau vei na tuar thawm ang maiin a khat anga, ṭah leh ha ṭhialna mai bakah, he zoram luahtu Mizo hnam tlemte hi min ṭingmit thei hial ang. Chuti taka hripui hlauhawm chuan kan ṭhenawm State te luhkhungin mangangin an chiau vawng vawng a, an ram hruaitu te lu haia, hun thim chhah takin a tuam mek zel a, keini ram ngei pawh hi he hripui ṭihbaiawm hian min la rawn luhchhuah lovang tih pawh sawi lawk theih a ni ta lo ve. India hmar chhan ram, Meghalaya, Assam, Manipur leh Tripura-ah te chuan nitin Covid19 hri kai thar hmuhchhuah belh an la awm zel leh nghal nen, an ni ho next hi ni lo hram ila kan va ti em.
Chuti anga lungngaih chhumpui zing chuan khawvel ram tam tak a rum tir a, India hmar chhak ram thlengin chu lungngaihna hripui chuan a rawn luhchhuah ve ta, a va pawi vawng vawng em. He hripui laka tun thlenga kan himna kulhpui ber chu Pathian vang tih loh rual a ni lo va. A pahnihna erawh chu, mahni hrehawm pawisa lo va, kan ram leh kan hnam he hripui laka a lo him theih bana ram palai lengah riahbuk suala RAMRI venga ram mu mek te vang a ni tih haider emaw, theihnghilh phal chi a ni tawh ngai lo vang a; he Khawvelah a tawp hma leh Zofa ten he leilung hi kan luah chhung chuan hriatreng a ni tawh thung anga, zofate History ah hmun lailum a luah hial bawk ang.
By: ZR Lalthlanmawia
Post a Comment