FAK HLAWH LO LABORATORY TECHNICIAN
Langlo lama an thawhrimna hian kan dinhmun dik tak min hriattir ṭhin, i ṭawngṭaipui zel ang u
Hmatawng(frontliner) kan tihte zingah Laboratory Technician te hi kan sawi ri tam lo viau awm mang e. Ngawi reng chunga an thawhrimna leh an hnathawh rah(result) hi Zoram mipuite benga fah chhawn leh ṭhin kan ni tih te hi i hriatsak nawn awn awn ang u. Laboratory chhunga thawktu leh enfiah(test) ngai enfiahtu/endiktu te an ni si a. An hah rimtawng hle tawh ngei ang le! Fak hlawh tura an hming lam rik hi zing lo deuhin lo ri ring vaklo mah se, fak mawlh mawlh an phu a ni.
Râl hmatawnga ding kan tih dangte fakna thu hi chu chhiar tur leh hmuh tur a tam viau tawh na a, Laboratory Technician kan han tih ho bik te hian a seat hnung an chang deuh ṭhin em aw a tih theih. Hmatawnga ralveng(duty) dangte sawinep tur a ni hauh lo, an thawkrim vek mai, fak zui zel pawh an phu em em. Chutih ruala fak nawn awn awn phu te zingah Laboratory Technician te hi hmaih theih miah loh tur zinga mite an ni a, fak mawlh mawlh tur kan ni e. Natna hrik hlauhawm tak kai an hlauh avang ngawtin an endik hna thawh mek chu an tlanbosan daih thei biklo a, an hriselna thap reng chunga rim taka hna thawktute tho an ni. Laboratory chhungah chauh nilovin, tangkhang rawn haw te lo dawnsawnna hmun hrang hrangah te khan a hah zual zinga mi te an nih kha.
COVID-19 hrik ṭihbaiawm takin a thara bu a rawn khuar leh tak hnuah phei hi chuan COVID damlo enkawlna hmunpui ber ZMC Laboratory chhunga hnathawktute rim turzia hi sawiin a siak awm lo e. Endik(test) tur sample lak a ṭhahnem chho deuh deuh zel a, endik hna thawktute tan chhuanlam siam theih map loh leh hah pawh sawi theih miah lohvin an endik mar pat a ngai bawk si. An tan tihsual neih emaw, endik peih loh emaw, tha thlah mai mai a thiang chhete eih lo lehnghal; an va han hah dawn tawh tak em! Anni leh anni ang bawka hah, kan ral hmatawngte tan Zoram mipuite hian i ṭawngṭaisak chhunzawm zel ang u.
Fakna dawngtu bik nih an duh kherlo thei e. 'Midang keini aia hah an tam alawm' tiin fakna nopui dawm an duh a rinawm miahlo na a, an hah rimtawng turzia hmuh thiampuitute tan chuan fak loh erawh an har thung a ni. Fak phu chu i fak mawlh mawlh zel mai teh ang. Fak hlawh loh Laboratory Technician an tih hlek lohna turin, langsarlo tak leh inkharkhip deuha anni ho hnathawh zarah hian Zoram mipuiten COVID-19 laka kan ram dinhmun chiang zawk kan lo hriat theih phah a ni si a.
Laboratory pindan chhungrila natna hrik hlauhawm tak kai palh theih hmachhawn reng chunga kan dinhmun dik tak kan hriat theih phahna tura in thawhrimna zozai hi Zoram mipuite hian kan hriat hmaih hauh lo a. Kan ram tan theihtawp chhuahin han ṭang zel teh u. Pathian hnenah in tan kan lo ṭawngṭai zel ang a, Engkimtithei Pathian chuan chakna leh finna tharin thuam chak deuh deuh che u rawh se. @Grace-i pa, Zarkawt
Post a Comment